Josué 7:1-26

  • Izraél lakon funu iha Ai (1-5)

  • Josué nia orasaun (6-9)

  • Izraél lakon funu tanba halo ona sala (10-15)

  • Jeová hatudu sai Acan nia sala no povu tuda mate nia (16-26)

7  Maibé ema Izraél la hatudu laran-metin hodi la halo tuir mandamentu kona-ba buat neʼebé tenke harahun tiha, tanba Acan,+ husi suku Judá, foti buat balu neʼebé tenke harahun tiha.+ Ho ida-neʼe, Jeová sai hirus tebes hasoru ema Izraél.+ Acan mak Karmi nia oan-mane, Zabdi nia bei-oan, neʼebé husi Zerá nia umakain.  Tuirmai Josué haruka mane balu atu sai husi Jerikó hodi bá Ai,+ sidade neʼebé besik Bet-Aven no iha Betel nia sorin parte leste,+ no nia dehan ba sira: “Saʼe bá hodi hafuhu rai neʼe.” Entaun mane sira-neʼe bá hafuhu sidade Ai.  Bainhira sira fila fali ba Josué, sira hatete: “La presiza tropa hotu atu saʼe bá neʼebá. Ita presiza deʼit mane naʼin-2.000 ka 3.000 atu manán sidade Ai. Keta halo tropa hotu sai kole hodi haruka sira saʼe ba neʼebá, tanba sidade neʼe iha ema uitoan deʼit.”  Entaun maizumenus mane naʼin-3.000 saʼe bá neʼebá, maibé sira tenke halai husi ema Ai sira.+  Ema Ai sira oho mane Izraél naʼin-36. Ema Ai kontinua duni tuir sira husi sidade nia portaun oin tun toʼo Sebarim* no kontinua oho sira tuir dalan. Entaun povu Izraél lakon aten-brani no sai taʼuk.*  Ho ida-neʼe, Josué no Izraél nia katuas sira lees sira-nia roupa, no sira hakneʼak no hakruʼuk ho oin ba rai iha Jeová nia Arka oin toʼo kalan, no sira soe rai-rahun ba sira-nia ulun.  Josué hatete: “Oh Jeová, Naʼi Ukun-Naʼin Boot Liu, Ita-Boot lori povu neʼe laʼo dook hodi hakur Mota Jordaun, agora tanbasá mak Ita entrega sira ba ema Amoreu atu halakon tiha? Diʼak liu uluk ami hela deʼit iha Mota Jordaun nia sorin seluk!*  Deskulpa oh Jeová, agora saida mak haʼu bele koʼalia tanba ohin ema Izraél halai* ona husi sira-nia inimigu?  Bainhira ema Kanaan no ema seluk hotu iha rai neʼe rona kona-ba neʼe, sira sei haleʼu ami no halakon ami-nia naran husi rai. Saida mak Ita sei halo atu defende Ita-nia naran neʼebé boot?”+ 10  Jeová hatán ba Josué: “Hamriik bá! Tanbasá mak ó hakneʼak ho oin ba rai? 11  Ema Izraél halo ona sala. Sira kontra ona haʼu-nia aliansa+ neʼebé haʼu haruka sira atu halo tuir. Sira foti ona buat balu neʼebé tenke halakon tiha,+ sira naʼok+ buat sira-neʼe, no ho subasubar sira tau hamutuk ho sira-nia sasán.+ 12  Tan neʼe, ema Izraél labele hamriik hasoru sira-nia inimigu. Sira sei halai husi sira-nia inimigu, tanba sira sai ona nuʼudar buat neʼebé tenke harahun tiha. Haʼu sei la hamutuk tan ho imi se imi la halakon husi imi-nia leet buat neʼebé tenke harahun tiha.+ 13  Hamriik bá, halo povu neʼe santu!*+ Hatete ba sira: ‘Aban imi tenke halo santu imi-nia an, tanba Jeová, Izraél nia Maromak, dehan nuneʼe: “Oh ema Izraél, buat neʼebé tenke harahun tiha mak iha imi-nia leet. Imi labele hamriik hasoru imi-nia inimigu toʼo imi halakon tiha husi imi-nia leet buat neʼebé tenke harahun. 14  Iha dadeer imi tenke halibur hamutuk, suku ida-idak, no suku neʼebé Jeová hili+ tenke hakbesik mai, família ida-idak, no família neʼebé Jeová hili tenke hakbesik mai, umakain ida-idak, no umakain neʼebé Jeová hili tenke hakbesik mai, mane ida-idak. 15  Kuandu imi hatene ema neʼebé foti ona buat neʼebé tenke harahun tiha, imi tenke sunu tiha nia,+ no mós sunu buat hotu neʼebé ninian, tanba nia kontra ona Jeová nia aliansa+ no tanba nia halo buat neʼebé aat tebes iha Izraél.”’” 16  Entaun iha dadeer-saan tuirmai, Josué hadeer sedu no haruka ema Izraél sira hakbesik mai, suku ida-idak, no Maromak* hili suku Judá. 17  Nia haruka umakain sira husi suku Judá hakbesik mai no Maromak hili Zerá nia umakain.+ Depois neʼe, nia haruka umakain Zerá hakbesik mai, mane ida-idak, no Maromak hili Zabdi nia umakain. 18  Ikusmai nia haruka Zabdi nia umakain hakbesik mai, mane ida-idak, no Maromak hili Acan, Karmi nia oan-mane, Zabdi nia bei-oan, neʼebé husi Zerá nia umakain, husi suku Judá.+ 19  Entaun, Josué dehan ba Acan: “Favór ida, haʼu-nia oan, hatudu respeitu ba Jeová, Izraél nia Maromak, no fó sai ó-nia sala ba nia. Favór ida, fó-hatene haʼu saida mak ó halo ona. Keta subar neʼe husi haʼu.” 20  Acan hatán ba Josué: “Tuir loloos, haʼu mak halo sala kontra Jeová, Izraél nia Maromak, no neʼe mak buat neʼebé haʼu halo. 21  Bainhira haʼu hateke ba sasán sira neʼebé tropa hadau ona, haʼu haree roupa furak husi Sinear+ neʼebé karun no mós haree osan-mutin 200* no osan-mean grama 570,* no haʼu kaan sasán sira-neʼe, entaun haʼu foti sasán sira-neʼe. Haʼu subar hela buat sira-neʼe iha rai-okos iha haʼu-nia tenda, no haʼu tau osan iha roupa neʼe nia okos.” 22  Entaun Josué haruka kedas ema no sira halai ba Acan nia tenda, no sira hetan roupa neʼebé subar hela iha ninia tenda, no osan tau iha roupa neʼe nia okos. 23  Tuirmai, sira foti sai buat sira-neʼe husi tenda no lori ba Josué no ba ema Izraél tomak no tau buat sira-neʼe iha Jeová nia oin. 24  Depois neʼe, Josué hamutuk ho ema Izraél hotu lori Acan,+ neʼebé husi Zerá nia umakain, no lori mós osan-mutin, roupa furak neʼe, osan-mean,+ ninia oan-mane sira, oan-feto sira, ninia karau, kuda-burru, ninia animál sira seluk, ninia tenda no buat hotu neʼebé ninian, no sira lori buat sira-neʼe hotu ba Rai-Tetuk Akor.+ 25  Josué hatete: “Tanbasá mak ó lori susar ba ami?+ Iha loron neʼe kedas, Jeová sei lori susar ba ó.” Ho ida-neʼe, ema Izraél hotu tuda mate nia,+ no depois neʼe, sira sunu nia.+ Iha dalan hanesan neʼe mak ema Izraél tuda mate sira hotu. 26  Tuirmai sira hada fatuk butuk boot iha ninia leten no neʼe sei iha toʼo ohin loron. Ho ida-neʼe, Jeová hatún ninia hirus neʼebé makaʼas.+ Tan neʼe mak ema bolu fatin neʼe nuʼudar Rai-Tetuk Akor* toʼo ohin loron.

Nota-rodapé

Naran neʼe katak “Fatin neʼebé keʼe fatuk”.
Orj., “povu nia fuan sai nabeen tiha no suli sai hanesan bee”.
Neʼe katak sorin parte leste.
Ka “fila kotuk”.
Ka karik “Josué”.
Orj., “siklo 200”. Neʼe katak 2,28 kg. Haree Ap. B14.
Orj., “siklo 50”.
Naran neʼe katak “Susar”.