Josué 5:1-15

  • Sirkunsizaun iha Gilgal (1-9)

  • Povu selebra Páskua; maná la mosu tan (10-12)

  • Ulun-naʼin ba Jeová nia tropa (13-15)

5  Bainhira ema Amoreu+ nia liurai sira hotu neʼebé iha Mota Jordaun nia sorin parte oeste no ema Kanaan+ nia liurai sira hotu neʼebé hela besik tasi rona katak Jeová halo maran ona Mota Jordaun iha ema Izraél nia oin toʼo sira hakur tiha mota neʼe, liurai sira-neʼe hotu sai taʼuk*+ no lakon aten-brani* tanba ema Izraél.+  Iha tempu neʼebá, Jeová dehan ba Josué: “Halo tudik husi fatuk-ahi no halo sirkunsizaun*+ ba mane Izraél sira ba dala segundu.”  Nuneʼe Josué halo tudik sira husi fatuk-ahi no halo sirkunsizaun ba mane Izraél sira iha Gibeat-Aralot.*+  Josué halo sirkunsizaun ba sira tanba razaun tuirmai neʼe: Mane hotu neʼebé sai husi rai-Ejitu, katak mane funu-naʼin hotu,* mate ona iha rai-fuik durante sira-nia viajen.+  No mane sira-neʼe hetan ona sirkunsizaun, maibé mane hotu neʼebé moris iha rai-fuik durante sira-nia viajen bainhira sira sai tiha husi rai-Ejitu seidauk hetan sirkunsizaun.  Ema Izraél laʼo iha rai-fuik durante tinan 40+ toʼo mane funu-naʼin hotu mate ona, katak sira hotu neʼebé sai husi rai-Ejitu maibé la halo tuir Jeová nia liafuan.+ Jeová jura ba sira katak nia sei la husik sira atu haree rai+ neʼebé Jeová jura ona ba sira-nia beiʼala atu fó ba ninia povu,*+ rai neʼebé iha susubeen no bani-been barak.+  Entaun nia troka sira ho sira-nia oan-mane.+ Josué halo sirkunsizaun ba oan-mane sira-neʼe tanba sira seidauk hetan sirkunsizaun durante sira-nia viajen.  Bainhira nasaun hotu hetan ona sirkunsizaun, sira kontinua deskansa iha sira-nia hela-fatin toʼo sira sai diʼak fali.  Tuirmai Jeová dehan ba Josué: “Ohin haʼu hasai tiha ema Ejitu nia liafuan aat husi imi.” Nuneʼe, ema bolu fatin neʼe Gilgal*+ toʼo ohin loron. 10  Ema Izraél kontinua hela iha Gilgal, iha rai-tetuk maran Jerikó nian, no sira selebra Páskua* iha loron 14 husi fulan neʼe+ bainhira rai kalan ona. 11  Iha loron tuirmai, depois Páskua, sira komesa han ai-han husi rai neʼe. Iha loron neʼe sira han paun neʼebé la iha fermentu+ no trigu* neʼebé sona ona. 12  Iha loron neʼe bainhira sira han ona ai-han husi rai neʼe, la mosu tan maná ba ema Izraél atu han,+ maibé sira komesa han ai-han husi rai-Kanaan iha tinan neʼe.+ 13  Bainhira Josué besik Jerikó, nia hateke saʼe no haree mane ida+ neʼebé kaer surik hamriik iha ninia oin.+ Josué laʼo besik nia no husu: “Ó apoia ami ka apoia ami-nia inimigu?” 14  Nia dehan: “Lae, maibé haʼu mai nuʼudar ulun-naʼin ba Jeová nia tropa.”+ Ho ida-neʼe, Josué hakneʼak no hakruʼuk ho oin ba rai no husu: “Saida mak haʼu-nia naʼi hakarak fó sai ba Ita-nia atan?” 15  Ulun-naʼin ba Jeová nia tropa hatán ba Josué: “Hasai ó-nia sandálias husi ó-nia ain, tanba fatin neʼebé ó hamriik bá mak santu.” Josué halo tuir kedas.+

Nota-rodapé

Orj., “sira-nia fuan sai nabeen”.
Orj., “espíritu”. Haree “Ruah” iha Glosáriu.
Naran neʼe katak “Foho-oan husi oin-lulik nia kulit”.
Ka “mane sira neʼebé tinan toʼo ona atu sai tropa”.
Orj., “ba ita”.
Naran neʼe katak “Dudu; Duir sai”.
Neʼe inklui mós sevada.