Josué 4:1-24

  • Fatuk sira neʼebé sei fó-hanoin povu (1-24)

4  Bainhira nasaun tomak hakur ona Mota Jordaun, Jeová dehan ba Josué:  “Hili mane naʼin-12 husi povu neʼe, mane ida husi suku ida-idak,+  no fó mandamentu neʼe ba sira: ‘Foti fatuk 12 husi Mota Jordaun nia klaran, husi fatin neʼebé amlulik sira-nia ain sama bá,+ no lori fatuk sira-neʼe hamutuk ho imi no tau iha fatin neʼebé imi sei toba iha kalan neʼe.’”+  Entaun, Josué bolu mane naʼin-12 neʼebé nia hili ona husi Izraél, mane ida husi suku ida-idak,  no Josué dehan ba sira: “Laʼo ba Mota Jordaun nia klaran iha Jeová, imi-nia Maromak, nia Arka oin, no imi ida-idak tenke foti fatuk ida no tau iha imi-nia kabaas, hodi tuir númeru ba Izraél nia suku sira,  no fatuk sira-neʼe sei sai nuʼudar sinál iha imi-nia leet. Se aban-bainrua imi-nia oan sira husu ba imi: ‘Tanbasá mak imi tau fatuk sira-neʼe?’+  imi tenke hatán ba sira: ‘Fatuk sira-neʼe atu fó-hanoin ema Izraél ba nafatin,+ tanba bee iha Mota Jordaun para tiha iha Jeová nia Arka+ Aliansa oin, bainhira sira hulan Maromak nia Arka hodi hakur Mota Jordaun.’”  Entaun ema Izraél halo tuir duni buat neʼebé Josué hatete. Sira foti fatuk 12 husi Mota Jordaun nia klaran, tuir matadalan neʼebé Jeová fó ona liuhusi Josué, hodi tuir númeru ba Izraél nia suku sira. Sira lori fatuk sira-neʼe ba fatin neʼebé sira sei toba kalan neʼe no hada iha neʼebá.  Josué mós hada fatuk 12 iha Mota Jordaun nia klaran, iha fatin neʼebé amlulik sira-nia ain sama bá,+ katak amlulik sira neʼebé hulan Arka Aliansa nian, no fatuk sira-neʼe sei iha neʼebá toʼo ohin loron. 10  Amlulik sira neʼebé hulan Arka hamriik nafatin iha Mota Jordaun nia klaran toʼo povu halo tuir buat hotu neʼebé Jeová hatete ba sira liuhusi Josué, hodi tuir mandamentu hotu neʼebé Moisés fó sai ba Josué. Durante tempu neʼe, povu sira lalais atu hakur mota neʼe. 11  Bainhira povu hotu hakur ona mota neʼe, amlulik sira mós hakur hamutuk ho Jeová nia Arka, no povu neʼe haree hela.+ 12  Suku Ruben, suku Gad, no suku Manasés nia sorin balu hakur hanesan tropa+ uluk liu fali ema Izraél sira seluk, hodi halo tuir liafuan neʼebé Moisés hatete ona ba sira.+ 13  Maizumenus tropa naʼin-40.000 neʼebé kaer armas funu nian, sira hakur mota neʼe iha Jeová nia oin hodi toʼo iha rai-tetuk maran Jerikó nian. 14  Iha loron neʼe Jeová foti aas Josué iha ema Izraél hotu nia oin,+ no sira hatudu respeitu neʼebé kleʼan ba nia* durante ninia moris tomak, hanesan uluk sira hatudu respeitu neʼebé kleʼan ba Moisés.+ 15  Tuirmai Jeová dehan ba Josué: 16  “Haruka amlulik sira neʼebé hulan hela Arka+ Aliansa nian* atu sai husi Mota Jordaun.” 17  Entaun, Josué haruka amlulik sira, hodi dehan: “Sai husi Mota Jordaun neʼe.” 18  Bainhira amlulik sira neʼebé lori Jeová nia Arka+ Aliansa nian sai husi Mota Jordaun nia klaran no bainhira amlulik sira-nia ain sama rai maran, bee iha Mota Jordaun suli fali no sai nakonu toʼo liu mota ninin+ hanesan uluk. 19  Povu neʼe sai husi Mota Jordaun iha loron sanulu fulan-primeiru no sira hela iha Gilgal+ neʼebé iha Jerikó nia baliza sorin parte leste. 20  Kona-ba fatuk 12 neʼebé sira foti sai husi Mota Jordaun, Josué hada fatuk sira-neʼe iha Gilgal.+ 21  Tuirmai nia dehan ba ema Izraél: “Iha futuru bainhira imi-nia oan sira husu ba imi: ‘Fatuk sira-neʼe katak sá?’+ 22  imi tenke esplika ba imi-nia oan sira: ‘Ema Izraél hakur Mota Jordaun liuhusi rai maran+ 23  bainhira Jeová, imi-nia Maromak, halo bee iha Mota Jordaun maran iha sira-nia oin toʼo sira hakur hotu tiha, hanesan Jeová, imi-nia Maromak, halo ba Tasi Mean bainhira nia halo maran tasi neʼe iha ami-nia oin toʼo ami hotu hakur tiha.+ 24  Nia halo nuneʼe atu ema hotu iha mundu bele hatene katak Jeová nia liman mak iha kbiit boot,+ no atu imi nafatin hamtaʼuk Jeová, imi-nia Maromak.’”

Nota-rodapé

Orj., “sira taʼuk nia”.
Orj., “Arka Testemuñu nian”.