Josué 18:1-28

  • Fahe tan rai iha Silo (1-10)

  • Suku Benjamim nia liman-rohan (11-28)

18  Tuirmai povu Izraél hotu halibur hamutuk iha Silo,+ no sira harii tenda reuniaun nian iha neʼebá,+ tanba sira manán ona rai neʼe.+  Maibé ema Izraél nia suku hitu tan seidauk simu liman-rohan.  Entaun Josué hatete ba ema Izraél: “Toʼo bainhira tan mak imi sei demora atu tama hodi foti rai neʼebé Jeová, imi-nia beiʼala nia Maromak, fó ona ba imi?+  Hili mane naʼin-tolu husi suku ida-idak no haʼu sei haruka sira bá haleʼu rai neʼe no halo mapa ba rai neʼe tuir sira-nia liman-rohan. Depois neʼe, sira tenke fila fali mai haʼu.  Sira tenke fahe rai neʼe ba parte hitu.+ Suku Judá sei hela nafatin iha sira-nia rai iha sorin parte súl,+ no José nia umakain sei hela iha sira-nia rai iha sorin parte norte.+  Kona-ba imi, halo mapa ba rai neʼe hodi fahe ba parte hitu no lori neʼe mai haʼu; no haʼu sei dada sorteiu*+ ba imi iha Jeová, ita-nia Maromak, nia oin.  Maibé ema Levi sei la simu liman-rohan iha imi-nia leet,+ tanba sira-nia knaar nuʼudar amlulik ba Jeová mak sira-nia liman-rohan.+ Kona-ba suku Gad, suku Ruben, no suku Manasés nia sorin balu,+ sira simu ona sira-nia liman-rohan iha Mota Jordaun nia sorin parte leste, katak rai neʼebé Jeová nia atan Moisés fó ona ba sira.”  Mane sira-neʼe sai prontu ona atu bá, no Josué fó mandamentu ba sira neʼebé atu halo mapa ba rai neʼe, hodi dehan: “Bá laʼo haleʼu rai neʼe no halo mapa ba rai neʼe no fila fali mai haʼu. Depois neʼe, haʼu sei dada sorteiu ba imi iha Jeová nia oin iha Silo.”+  Ho ida-neʼe, mane sira-neʼe bá atu laʼo haleʼu rai neʼe no halo mapa hodi fahe ba parte hitu tuir sidade sira, no hakerek neʼe iha livru ida. Depois neʼe, sira fila fali ba Josué iha Silo. 10  Tuirmai Josué dada sorteiu ba sira iha Silo iha Jeová nia oin.+ Iha neʼebá Josué fahe rai parte ida-idak ba ema Izraél.+ 11  Liuhusi dada sorteiu, suku Benjamim simu rai tuir sira-nia família ida-idak, no sira-nia área neʼe mak entre área Judá nian+ no área José nian.+ 12  Iha parte norte, sira-nia baliza hahú husi Mota Jordaun, no saʼe ba foho-lolon Jerikó+ iha parte norte no kontinua saʼe ba foho neʼe iha parte oeste, no baliza neʼe toʼo rai-fuik Bet-Aven nian.+ 13  Sira-nia baliza kontinua husi neʼebá toʼo Luz nia foho-lolon iha Luz nia parte súl, neʼe katak Betel;+ no baliza neʼe tun toʼo Atarot-Adar+ iha foho neʼebé iha Bet-Horom Kraik+ nia sorin parte súl. 14  No baliza neʼe kontinua husi parte oeste no fila ba parte súl husi foho neʼebé hateke ba Bet-Horom iha parte súl no remata iha Kiriat-Baal, neʼe katak Kiriat-Jearim,+ sidade ida iha Judá. Neʼe mak sira-nia baliza iha parte oeste. 15  Iha parte súl, sira-nia baliza hahú husi Kiriat-Jearim nia ninin, no kontinua ba parte oeste; no toʼo bee-matan Neftoa.+ 16  Baliza neʼe tun toʼo foho hun neʼebé hateke ba Foho-Leet Hinom,*+ neʼebé iha Rai-Tetuk Refaim+ iha parte norte, no baliza neʼe kontinua tun ba Foho-Leet Hinom, toʼo foho-lolon ema Jebus nian+ iha parte súl, no tun toʼo En-Rogel.+ 17  Sira-nia baliza neʼe kontinua ba parte norte toʼo En-Semes no tuirmai toʼo Gelilot, neʼebé iha dalan atu saʼe ba Adumim nia oin,+ no baliza neʼe tun toʼo fatuk+ Bohan nian.+ Bohan mak Ruben nia oan-mane. 18  Baliza neʼe kontinua ba foho-lolon iha parte norte iha área Araba nia oin no tun toʼo área Araba. 19  Baliza neʼe kontinua ba foho-lolon Bet-Hogla nia parte norte,+ no remata iha Tasi Masin*+ nia ninin parte norte neʼebé iha Mota Jordaun nia rohan iha parte súl. Neʼe mak sira-nia baliza iha parte súl. 20  Mota Jordaun mak sai baliza iha parte leste. Neʼe mak liman-rohan ba Benjamim nia bei-oan sira tuir sira-nia família ida-idak, no neʼe mak sira-nia baliza iha sorin hotu. 21  Tuirmai neʼe mak suku Benjamim nia sidade sira, tuir sira-nia família ida-idak: sidade Jerikó, Bet-Hogla, Emek-Keziz, 22  Bet-Araba,+ Zemaraim, Betel,+ 23  Avim, Pará, Ofra, 24  Kefar-Amoni, Ofni no Geba,+ neʼe hamutuk sidade 12 ho sira-nia knua sira. 25  Gibeão,+ Ramá, Beerot, 26  Mizpe, Kefira, Moza, 27  Rekem, Irpeel, Tarala, 28  Zela,+ Ha-Elef, Jebusi, neʼe katak Jeruzalein,+ Gibea+ no Kiriat, neʼe hamutuk sidade 14 ho sira-nia knua sira. Neʼe mak Benjamim nia bei-oan sira-nia liman-rohan tuir sira-nia família ida-idak.

Nota-rodapé

Orj., “Foho-Leet Hinom nia Oan-Mane”.
Neʼe katak Tasi Mate.