Josué 14:1-15

  • Fahe rai iha Mota Jordaun nia sorin parte oeste (1-5)

  • Caleb simu Hebron nuʼudar liman-rohan (6-15)

14  Tuirmai neʼe mak rai neʼebé ema Izraél foti nuʼudar liman-rohan iha rai-Kanaan, neʼebé sira simu husi amlulik Eleazar hamutuk ho Nun nia oan-mane Josué no ulun-naʼin sira husi suku Izraél.+  Sira simu liman-rohan liuhusi dada sorteiu,*+ hodi tuir mandamentu neʼebé Jeová fó sai ona liuhusi Moisés ba suku sia ho balu.+  Moisés fó ona liman-rohan ba suku rua ho balu iha Mota Jordaun nia sorin seluk,*+ no nia la fó liman-rohan ida ba ema Levi iha sira-nia leet.+  Jerasaun husi José sai suku rua,+ Manasés no Efraim;+ no ema Levi la simu rai, sira simu deʼit sidade+ neʼebé sira bele hela bá no fatin ba sira-nia animál-hakiak.+  Nuneʼe ema Izraél fahe rai tuir mandamentu neʼebé Jeová fó sai ona ba Moisés.  Depois neʼe, mane sira husi suku Judá hakbesik ba Josué iha Gilgal,+ no tuirmai Jefuné nia oan-mane Caleb,+ ema Kenizeu, dehan ba Josué: “Ó hatene ho didiʼak buat neʼebé Jeová hatete ona+ ba Maromak loos nia atan Moisés+ kona-ba ó no haʼu iha Kades-Barnea.+  Haʼu tinan 40 bainhira Jeová nia atan Moisés haruka haʼu sai husi Kades-Barnea atu hafuhu rai neʼe,+ no haʼu fila fali hodi koʼalia buat neʼebé loos no koʼalia nakloke.*+  Maski haʼu-nia maluk sira neʼebé bá hafuhu rai hamutuk ho haʼu halo povu nia laran taʼuk,* maibé haʼu halo tuir Jeová, haʼu-nia Maromak, ho laran tomak.+  Iha tempu neʼebá Moisés jura dehan: ‘Rai neʼebé ó sama ona sei sai ó-nia liman-rohan no mós ó-nia oan-mane sira-nian ba nafatin, tanba ó halo tuir ona Jeová, haʼu-nia Maromak, ho laran tomak.’+ 10  Agora, hanesan Jeová promete ona,+ nia proteje haʼu-nia moris+ ba tinan 45 ona, hahú husi tempu neʼebé Jeová fó sai promesa neʼe ba Moisés bainhira ema Izraél laʼo iha rai-fuik;+ haʼu sei moris hela toʼo ohin, no haʼu tinan 85 ona. 11  Ohin haʼu sei forte hela hanesan mós iha tempu neʼebé Moisés haruka haʼu bá hafuhu rai neʼe. Haʼu-nia forsa agora sei hanesan hela iha tempu neʼebá, atu halo funu no atu halo serbisu seluk. 12  Tan neʼe, fó área foho nian neʼe ba haʼu, tuir buat neʼebé Jeová promete ona iha tempu neʼebá. Maski ó rona iha loron neʼebá katak ema Anac+ hela iha fatin neʼe no sira-nia sidade iha moru aas,+ maibé haʼu fiar katak Jeová sei hamutuk ho haʼu+ no haʼu sei duni sai sira, hanesan Jeová promete ona.”+ 13  Nuneʼe Josué haraik bensaun ba Jefuné nia oan-mane Caleb, no fó Hebron ba nia nuʼudar liman-rohan.+ 14  Tan neʼe mak toʼo ohin, Hebron sai nuʼudar liman-rohan ba Jefuné nia oan-mane Caleb, ema Kenizeu, tanba nia halo tuir Jeová, Izraél nia Maromak, ho laran tomak.+ 15  Uluk Hebron nia naran mak Kiriat-Arba,+ no Arba mak mane neʼebé naran-boot liu iha ema Anac nia leet. No rai neʼe hakmatek husi funu.+

Nota-rodapé

Neʼe katak sorin parte leste.
Ka “ho liafuan neʼebé tuir haʼu-nia laran”.
Orj., “halo povu nia fuan sai nabeen”.