Josué 11:1-23

  • Manán sidade balu iha parte norte (1-15)

  • Rezumu kona-ba rai neʼebé Josué manán (16-23)

11  Bainhira Liurai Jabin husi Hazor, rona kona-ba neʼe, nia haruka lia-menon ba Liurai Jobab husi Madon,+ ba liurai husi Sinrom, ba liurai husi Aksaf,+  ba liurai sira neʼebé iha área foho nian iha parte norte, ba liurai sira neʼebé iha rai-tetuk* iha parte súl husi Kineret, ba liurai sira neʼebé iha área Sefela no foho-lolon Dor+ iha parte oeste,  ba ema Kanaan+ iha parte leste no parte oeste, ba ema Amoreu,+ ema Hetes, ema Perizeu, ema Jebus iha área foho nian no ba ema Heveu+ iha Foho Hermon+ nia hun iha rai-Mizpa.  Nuneʼe sira sai ho sira-nia tropa hotu, sira barak tebes toʼo sura labele hanesan rai-henek iha tasi-ibun, no sira mós lori kuda no kuda-karreta funu nian barak tebes.  Liurai sira-neʼe hotu konkorda atu hasoru malu. Sira mai no hela hamutuk besik bee-dalan sira iha sidade Merom hodi halo funu hasoru ema Izraél.  Ho ida-neʼe, Jeová dehan ba Josué: “Keta taʼuk ba sira,+ tanba aban iha oras hanesan neʼe, haʼu sei entrega sira hotu ba ema Izraél atu oho. Ó tenke tesi sira-nia kuda nia ain-uat,+ no sunu sira-nia kuda-karreta sira.”  Tuirmai Josué hamutuk ho tropa sira hotu ataka sira-nia inimigu derrepente deʼit besik bee-dalan sira iha Merom.  Jeová entrega sira ba ema Izraél nia liman+ no ema Izraél manán sira no duni tuir sira toʼo sidade boot Sidon+ no Misrefot-Maim+ no toʼo Rai-Tetuk Mizpe iha parte leste, no ema Izraél oho sira hotu hodi la husik ema ida moris.+  Josué halo ba sira tuir buat neʼebé Jeová hatete ona ba nia. Nia tesi sira-nia kuda nia ain-uat no sunu sira-nia kuda-karreta sira.+ 10  Liután neʼe, Josué fila fali no manán sidade Hazor no oho ninia liurai ho surik,+ tanba uluk Hazor mak sidade neʼebé forte liu sidade sira-neʼe hotu. 11  Ema Izraél oho ema* hotu neʼebé iha sidade laran ho surik no halakon sira.+ Sira la husik ema ida moris.+ Depois neʼe, nia sunu sidade Hazor. 12  Josué manán liurai sira-neʼe nia sidade hotu no oho liurai sira-neʼe ho surik.+ Nia halakon sira+ hodi halo tuir mandamentu husi Jeová nia atan Moisés. 13  Maibé, ema Izraél la sunu sidade sira neʼebé harii iha foho-oan leten, Josué sunu deʼit sidade Hazor. 14  Ema Izraél foti sasán no animál-hakiak hotu iha sidade sira-neʼe nuʼudar sira-nian.+ Maibé sira oho ema hotu ho surik toʼo la iha ema ida mak moris.+ Sira oho ema hotu.+ 15  Hanesan Jeová fó mandamentu ba ninia atan Moisés, Moisés mós fó mandamentu ba Josué,+ no Josué halo tuir duni. Josué kumpre ho didiʼak mandamentu hotu neʼebé Jeová fó sai ona ba Moisés.+ 16  Josué manán rai sira-neʼe hotu, área foho nian, área Negeb tomak,+ rai-Gosen tomak, área Sefela,+ área Araba,+ no mós área foho nian iha rai-Izraél no rai sira neʼebé iha foho hun, 17  husi Foho Halak neʼebé iha dalan atu saʼe ba Seir, toʼo Baal-Gad+ iha Rai-Tetuk Líbanu neʼebé iha Foho Hermon nia hun.+ Josué manán sira-nia liurai hotu no oho sira hotu. 18  Josué halo funu ho liurai sira-neʼe ba tempu kleur. 19  La iha sidade ida mak halo dame ho ema Izraél, só deʼit ema Heveu neʼebé hela iha Gibeão mak halo dame ho sira.+ Ema Izraél manán sidade sira seluk hotu liuhusi funu.+ 20  Jeová mak husik ema sira-neʼe sai ulun-toos+ atu sira halo funu hasoru ema Izraél, hodi nuneʼe nia la presiza hatudu laran-sadiʼa bainhira halakon sira.+ Sira tenke lakon mohu tiha hodi tuir mandamentu neʼebé Jeová fó sai ona ba Moisés.+ 21  Iha tempu neʼebá, Josué halakon ema Anac+ husi área foho nian, husi Hebron, Debir, Anab no mós husi área foho tomak iha Judá no área foho nian tomak iha Izraél. Josué halakon sira no sira-nia sidade.+ 22  La iha tan ema Anac iha rai-Izraél; só deʼit iha Gaza,+ Gat+ no Asdod.+ 23  Ho ida-neʼe, Josué domina rai neʼe tomak hodi tuir buat neʼebé Jeová promete ona ba Moisés.+ Tuirmai Josué fó rai sira-neʼe nuʼudar liman-rohan ba ema Izraél, suku ida-idak simu parte ida.+ Nuneʼe rai neʼe hakmatek husi funu.+

Nota-rodapé

Ka “Araba”.