Deuteronómio 3:1-29

  • Manán Liurai Og husi Basan (1-7)

  • Fahe rai iha Mota Jordaun nia sorin parte leste (8-20)

  • Moisés haruka Josué labele taʼuk (21, 22)

  • Moisés labele tama rai-Kanaan (23-29)

3  “Tuirmai ita fila no laʼo saʼe liuhusi Dalan ba Basan. No Liurai Og husi Basan sai mai hamutuk ho ninia povu atu halo funu hasoru ita iha Edrei.+  Tan neʼe, Jeová dehan mai haʼu: ‘Keta taʼuk ba nia, tanba haʼu sei entrega nia ho ninia povu hotu no mós ninia rai ba ó-nia liman, no ó sei halo ba nia hanesan ó halo ona ba ema Amoreu nia liurai Sihon, neʼebé uluk hela iha Hesbon.’  Nuneʼe Jeová, ita-nia Maromak, entrega mós Liurai Og husi Basan ho ninia povu hotu ba ita-nia liman, no ita oho sira hotu toʼo la iha ema ida mak moris.  Tuirmai ita manán ninia sidade hotu. Ita foti sira-nia sidade hotu, hamutuk sidade 60 iha área Argob nian, katak rai iha Basan neʼebé Og mak ukun.+  Sidade sira-neʼe hotu mak seguru tanba iha moru neʼebé aas, iha portaun sira, no iha ai-lolon sira atu xave portaun. Liután neʼe, ita mós foti knua kiʼik barak.  Ita halakon sira+ hanesan ita halakon ona Liurai Sihon husi Hesbon, ita harahun sidade hotu, no oho mane, feto no labarik sira.+  No ita mós foti animál-hakiak sira no sasán hotu husi sidade sira-neʼe ba ita-nia an rasik.  “Iha tempu neʼebá, ita foti rai sira husi ema Amoreu nia liurai naʼin-rua+ neʼebé hela iha área Mota Jordaun nian, rai sira-neʼe komesa husi Foho-Leet* Arnon toʼo Foho Hermon.+  Uluk ema Sidon bolu Foho Hermon neʼe Sirion no ema Amoreu bolu foho neʼe Senir. 10  Ita foti sidade hotu neʼebé iha rai-tetuk iha foho leten, katak Gilead tomak, no Basan tomak toʼo Saleka no Edrei,+ katak sidade sira neʼebé Og husi Basan mak ukun. 11  Liurai Og husi Basan mak ema Refaim ikus. Ninia kaixaun* halo husi besi,* no neʼe naruk metru 4* no luan metru 1 ho sentímetru 78,* neʼe tuir sukat neʼebé baibain ema uza. Kaixaun neʼe sei iha hela Rabá, ema Ammon nia rai. 12  Iha tempu neʼebá, ita hadau rai sira tuirmai neʼe: Área Aroer+ neʼebé besik Foho-Leet* Arnon, no parte sorin husi área foho Gilead nian, no haʼu fó ona sidade sira-neʼe ba suku Ruben no suku Gad.+ 13  Kona-ba parte sorin seluk husi Gilead no Basan tomak neʼebé Og mak ukun, haʼu fó ona ba suku Manasés nia sorin balu.+ Uluk ema hatene área hotu husi Argob, neʼebé parte ba Basan, nuʼudar ema Refaim nia rai. 14  “No Manasés nia oan-mane Jair,+ foti área Argob nian hotu+ toʼo fronteira ema Gesur nian no ema Maakat nian,+ no nia hanaran knua sira husi Basan tuir ninia naran, Havot-Jair,*+ toʼo ohin loron. 15  No haʼu fó ona Gilead ba Makir.+ 16  No ba suku Ruben no suku Gad,+ haʼu fó ona rai husi Gilead toʼo Foho-Leet* Arnon, no sira-nia fronteira mak foho-leet neʼe nia klaran, no sira-nia rai toʼo Foho-Leet Jabok, neʼebé mak fronteira ba ema Ammon, 17  no sira-nia rai toʼo área Araba no Mota Jordaun no ninia ninin sira, husi Kineret toʼo Tasi Araba, katak Tasi Masin,* iha foho-lolon Pisga nia hun neʼebé iha parte leste.+ 18  “Tuirmai haʼu fó mandamentu neʼe ba imi:* ‘Jeová, imi-nia Maromak, fó ona rai neʼe nuʼudar imi-nian. Entaun imi-nia mane hotu neʼebé forte tenke foti sira ida-idak nia armas no hakur ba mota sorin iha imi-nia maun-alin Izraél sira-nia oin.+ 19  Kona-ba imi-nia feen, imi-nia oan no imi-nia animál sira (haʼu hatene katak imi iha ona animál barak), sira deʼit mak sei kontinua hela iha sidade sira neʼebé haʼu fó ona ba imi, 20  toʼo Jeová halo imi-nia maun-alin sira moris ho hakmatek, hanesan nia halo ona ba imi, no toʼo sira mós hela iha rai neʼebé Jeová, imi-nia Maromak, fó ba sira iha Mota Jordaun nia sorin seluk. Tuirmai imi ida-idak sei fila fali ba imi-nia rai neʼebé haʼu fó ona ba imi.’+ 21  “Iha tempu neʼebá, haʼu dehan ba Josué:+ ‘Ó haree ona ho ó-nia matan rasik buat neʼebé Jeová, imi-nia Maromak, halo ona ba liurai naʼin-rua neʼe. Jeová mós sei halo hanesan neʼe ba liurai sira hotu iha rai neʼebé imi sei tama bá.+ 22  Imi keta taʼuk ba sira, tanba Jeová, imi-nia Maromak, mak sei halo funu ba imi.’+ 23  “Iha tempu neʼebá, haʼu husu ho laran ba Jeová dehan: 24  ‘Oh Jeová, Naʼi Ukun-Naʼin Boot Liu, Ita hahú ona atu hatudu Ita-nia kbiit boot no Ita-nia liman neʼebé forte+ ba Ita-nia atan, tanba la iha maromak ida seluk iha lalehan no iha rai neʼebé bele halo hahalok boot hanesan Ita.+ 25  Favór ida, husik haʼu bá haree rai diʼak neʼebé iha Mota Jordaun nia sorin seluk, katak área foho nian neʼebé diʼak no mós Líbanu.’+ 26  Maibé Jeová sei hirus nafatin haʼu tanba imi,+ no nia lakohi rona haʼu. Jeová dehan mai haʼu: ‘Toʼo ona! Keta koʼalia tan mai haʼu kona-ba ida-neʼe. 27  Saʼe ba foho Pisga nia leten,+ no hateke ba oeste, norte, súl no leste no haree ba rai neʼe ho ó-nia matan rasik, tanba ó sei la hakur Mota Jordaun neʼe.+ 28  Hili Josué+ no fó aten-brani ba nia no hametin nia, tanba nia mak sei hakur mota neʼe+ iha povu nia oin no nia mak sei lori sira atu hela iha rai neʼebé ó sei haree.’ 29  Buat hotu neʼe akontese bainhira ita sei hela iha rai-tetuk iha Bet-Peor nia oin.+

Nota-rodapé

Ka “Uádi”. Haree Glosáriu.
Ka “kama”. Neʼe mak kama espesiál atu tau mate-isin.
Ka karik “fatuk metan”.
Orj., “kóvado 9”. Haree Ap. B14.
Orj., “kóvado 4”.
Ka “Uádi”. Haree Glosáriu.
Naran neʼe katak “Jair nia suku kiʼik sira”.
Ka “Uádi”. Haree Glosáriu.
Neʼe katak Tasi Mate.
Iha neʼe Moisés koʼalia ba suku Ruben, suku Gad, no suku Manasés nia sorin balu.