Deuteronómio 26:1-19

  • Fó ai-han primeiru ba Jeová (1-11)

  • Porsentu sanulu ba dala segundu (12-15)

  • Izraél sai povu espesiál ba Jeová (16-19)

26  “Ikusmai bainhira imi tama ba rai neʼebé Jeová, imi-nia Maromak, fó ba imi nuʼudar liman-rohan no imi foti ida-neʼe nuʼudar imi-nian no hela ona iha neʼebá,  imi tenke foti ai-han primeiru husi buat hotu neʼebé imi halibur husi imi-nia toʼos iha rai neʼebé Jeová, imi-nia Maromak, fó ba imi, no imi tenke tau buat sira-neʼe iha raga laran no laʼo ba fatin neʼebé Jeová, imi-nia Maromak, sei hili atu lori ninia naran.+  Imi tenke bá hasoru amlulik neʼebé serbí iha tempu neʼebá no dehan ba nia: ‘Ohin haʼu fó sai ba Jeová, Ita-nia Maromak, katak haʼu tama ona iha rai neʼebé Jeová jura ba ita-nia beiʼala sira atu entrega ba ita.’+  “Tuirmai amlulik sei foti raga husi imi-nia liman no tau neʼe iha Jeová, imi-nia Maromak, nia altár oin.  Depois neʼe, imi tenke fó sai iha Jeová, imi-nia Maromak, nia oin, hodi dehan: ‘Haʼu-nia beiʼala mak ema Aram+ neʼebé laʼo-rai,* no nia tun ba rai-Ejitu+ no hela iha neʼebá nuʼudar ema estranjeiru, hamutuk ho ema balu husi ninia umakain.+ Maibé iha neʼebá nia sai nasaun boot ida neʼebé forte no barak.+  No ema Ejitu halo aat ba ami, hanehan ami no obriga ami atu serbisu makaʼas nuʼudar atan.+  Entaun ami komesa halerik ba Jeová, ami-nia beiʼala nia Maromak, no Jeová rona ami-nia lian no haree ami-nia terus, susar no oinsá ema hanehan ami.+  Ikusmai Jeová lori ami sai husi rai-Ejitu ho liman neʼebé forte, ho liman neʼebé iha kbiit,+ ho hahalok neʼebé hamosu taʼuk no ho sinál no milagre sira.+  Tuirmai nia lori ami mai iha neʼe no fó rai neʼe ba ami, katak rai neʼebé iha susubeen no bani-been barak.+ 10  Agora haʼu lori ai-han primeiru husi rai neʼebé Jeová fó ona ba haʼu.’+ “Imi tenke tau neʼe iha Jeová, imi-nia Maromak, nia oin no hakruʼuk iha Jeová, imi-nia Maromak, nia oin. 11  Tuirmai imi no ema Levi no ema estranjeiru iha imi-nia leet sei haksolok ho buat diʼak hotu neʼebé Jeová, imi-nia Maromak, fó ona ba imi no ba imi-nia umakain.+ 12  “Tuirmai iha tinan terseiru, kuandu imi halibur ona porsentu sanulu husi buat neʼebé imi koʼa,+ imi tenke fó neʼe ba ema Levi, ema estranjeiru, oan-kiak* no feto-faluk, no husik sira han toʼo bosu iha imi-nia sidade sira.*+ 13  Depois neʼe, imi sei fó sai iha Jeová, imi-nia Maromak, nia oin, hodi dehan: ‘Haʼu hasai tiha ona parte santu neʼe husi haʼu-nia uma no entrega ona ba ema Levi, ema estranjeiru, oan-kiak, no feto-faluk+ hodi halo tuir buat neʼebé Ita haruka mai haʼu. Haʼu la kontra no la haluha Ita-nia mandamentu sira. 14  Haʼu la han ida-neʼe bainhira haʼu triste hela tanba ema mate, no haʼu la hasai ida-neʼe bainhira haʼu la moos,* no la fó buat balu neʼe ba ema mate. Haʼu halo tuir Jeová, haʼu-nia Maromak, nia liafuan no halo tuir mandamentu hotu neʼebé Ita fó sai mai haʼu. 15  Agora hateke tun husi lalehan, Ita-nia hela-fatin neʼebé santu, no haraik bensaun ba Ita-nia povu Izraél no ba rai neʼebé Ita fó ona ba ami,+ katak rai neʼebé iha susubeen no bani-been barak,+ hanesan Ita jura ona ba ami-nia beiʼala sira.’+ 16  “Ohin Jeová, imi-nia Maromak, haruka imi atu halo tuir ukun-fuan no lei sira-neʼe. Imi tenke halo tuir no kumpre buat sira-neʼe ho imi-nia laran tomak+ no ho imi-nia moris tomak. 17  Ohin imi simu ona Jeová nia liafuan katak nia sei sai imi-nia Maromak, tanba imi laʼo iha ninia dalan sira no halo tuir ninia ukun-fuan,+ ninia mandamentu,+ no ninia lei sira,+ no mós imi rona ba ninia lian. 18  No ohin Jeová, imi-nia Maromak, simu ona imi-nia liafuan katak imi sei sai ninia povu neʼebé espesiál,*+ hanesan nia promete ona ba imi, no katak imi sei halo tuir ninia mandamentu hotu 19  no nia sei foti imi aas liu fali nasaun sira seluk hotu neʼebé nia halo,+ no fó hahiʼi ba imi no fó naran-boot no glória ba imi bainhira imi hatudu imi-nia an nuʼudar povu santu ba Jeová, imi-nia Maromak,+ hodi tuir buat neʼebé nia promete ona.”

Nota-rodapé

Ka karik “besik mate”.
Ka “labarik neʼebé la iha aman”.
Orj., “portaun laran”.
Ka “sai rikusoin neʼebé nia hafolin tebes”.