Deuteronómio 24:1-22

  • Kaben no soe-malu (1-5)

  • Respeitu ba moris (6-9)

  • Hanoin ema kiak (10-18)

  • Lei kona-ba hili ai-han restu iha toʼos (19-22)

24  “Se mane ida kaben ho feto ida maibé nia sai la kontente ho feto neʼe tanba nia haree buat ruma neʼebé la loos, nia tenke hakerek surat soe-malu nian+ no entrega surat ba feto neʼe, no haruka feto neʼe sai husi uma.+  Bainhira feto neʼe husik ona mane neʼe nia uma, feto neʼe bele bá no sai fali mane seluk nia feen.+  Se mane ida segundu odi* nia no hakerek surat soe-malu nian ba nia, no entrega neʼe ba nia no haruka nia sai husi uma, ka se mane segundu neʼebé nia kaben mate ona,  ninia laʼen primeiru neʼebé haruka nia sai labele hola fali nia nuʼudar feen bainhira nia sai la moos ona, tanba neʼe mak buat neʼebé Jeová hakribi. Imi labele lori sala ba rai neʼebé Jeová, imi-nia Maromak, sei fó ba imi nuʼudar liman-rohan.  “Kuandu mane ida foin kaben, nia labele serbí nuʼudar tropa ka halo knaar sira seluk. Nia labele halo knaar ruma ba tinan ida, no nia tenke hela iha ninia uma no halo ninia feen haksolok.+  “Ema ida labele foti ema nia fatuk dulas trigu nian nuʼudar garantia ba debe ida,*+ tanba ida-neʼe hanesan hadau buat neʼebé ajuda ema* atu moris.*  “Se imi hetan ema ruma naʼok ninia maluk ema* Izraél ida no halo aat ba ninia maluk neʼe no faʼan ninia maluk,+ ema neʼebé naʼok tenke mate.+ Imi tenke hasai tiha buat aat husi imi-nia leet.+  “Kuandu mosu moras-lepra,* imi tenke kuidadu tebes hodi halo tuir matadalan hotu neʼebé amlulik Levi sira sei fó sai ba imi.+ Imi tenke halo tuir ho didiʼak mandamentu neʼebé haʼu fó sai ba sira.  Hanoin-hetan buat neʼebé Jeová, imi-nia Maromak, halo ba Miriam bainhira imi laʼo hodi sai husi rai-Ejitu.+ 10  “Se imi fó-empresta buat ruma ba imi-nia maluk ida,+ imi labele tama ba ninia uma hodi hadau buat neʼebé nia dehan ona atu fó nuʼudar garantia. 11  Imi tenke hamriik deʼit iha liʼur, no ema neʼebé debe osan tenke lori sai ba imi buat neʼebé nia dehan atu fó nuʼudar garantia. 12  No se ema neʼe mak kiak, imi labele bá toba kuandu imi sei rai hela buat neʼebé nia fó nuʼudar garantia.+ 13  Kuandu loro-matan monu, imi tenke fó fali kedas buat neʼebé nia entrega nuʼudar garantia, no nia sei bá toba ho ninia roupa,+ no nia sei husu Maromak atu haraik bensaun ba imi; no Jeová, imi-nia Maromak, sei haree ida-neʼe nuʼudar hahalok loos. 14  “Imi labele lohi hodi hamatak imi-nia serbisu-naʼin neʼebé iha susar laran no kiak, maski nia mak imi-nia maluk ida ka ema estranjeiru neʼebé hela iha imi-nia rai, iha imi-nia sidade sira.*+ 15  Antes loro-matan monu, imi tenke fó ninia osan iha loron neʼe kedas+ tanba nia kiak no ninia moris depende ba kolen neʼebé nia simu. Se lae, nia sei halerik ba Jeová kona-ba imi, no imi sei hetan sala tanba ida-neʼe.+ 16  “Aman ida labele mate tanba sala neʼebé ninia oan halo, no oan ida labele mate tanba sala neʼebé ninia aman halo.+ Ema ida tenke mate tanba ninia sala rasik.+ 17  “Imi labele bobar lia-loos bainhira tesi-lia ba ema estranjeiru ka oan-kiak,*+ no imi labele hadau feto-faluk nia roupa hodi sai nuʼudar garantia ba buat neʼebé nia debe.*+ 18  Hanoin-hetan bá katak uluk imi sai atan iha rai-Ejitu, no Jeová, imi-nia Maromak, sosa fali imi husi neʼebá.+ Tan neʼe mak ohin haʼu haruka imi atu halo ida-neʼe. 19  “Kuandu imi koʼa trigu iha imi-nia toʼos no imi haluha trigu-futun ida iha toʼos laran, keta fila fali atu foti ida-neʼe. Imi tenke husik deʼit ida-neʼe ba ema estranjeiru, oan-kiak no feto-faluk sira,+ atu nuneʼe Jeová, imi-nia Maromak, bele haraik bensaun ba buat hotu neʼebé imi halo.+ 20  “Kuandu imi baku imi-nia ai-oliveira nia sanak sira, imi labele halo ida-neʼe fila-fila. Oliveira-fuan neʼebé restu tenke husik hela ba ema estranjeiru, oan-kiak, no feto-faluk sira.+ 21  “Kuandu imi halibur uvas-fuan husi imi-nia toʼos-uvas, imi labele fila fali hodi halibur uvas-fuan neʼebé restu. Imi tenke husik ida-neʼe ba ema estranjeiru, oan-kiak no feto-faluk sira. 22  Hanoin-hetan bá katak uluk imi sai atan iha rai-Ejitu. Tan neʼe mak ohin haʼu haruka imi atu halo ida-neʼe.

Nota-rodapé

Ka “lakohi ona”.
Ka “nuʼudar peñór”.
Ka “tanba ida-neʼe hanesan foti ema nia moris”.
Liafuan Ebraiku neʼebé tradús nuʼudar “moras-lepra” bele refere ba moras kulit oioin neʼebé bele daʼet. Karik inklui mós infesaun ruma neʼebé mosu iha roupa no uma.
Orj., “portaun laran”.
Ka “labarik neʼebé la iha aman”.
Ka “nuʼudar peñór”.