Deuteronómio 20:1-20

  • Ukun-fuan kona-ba funu (1-20)

    • Sé mak la presiza sai tropa (5-9)

20  “Se imi bá funu hasoru imi-nia inimigu sira no imi haree sira-nia kuda no kuda-karreta no tropa sira barak liu fali imi-nian, labele sai taʼuk ba sira, tanba Jeová, imi-nia Maromak, neʼebé lori imi sai husi rai-Ejitu mak hamutuk ho imi.+  Antes imi atu tama ba funu, amlulik tenke hakbesik no koʼalia ba povu sira-neʼe.+  Nia tenke hatete ba sira: ‘Rona bá, oh ema Izraél, imi besik ona atu halo funu hasoru imi-nia inimigu sira. Keta sai laran-taridu. Labele sai taʼuk ka nakdedar ba sira,  tanba Jeová, imi-nia Maromak, sei laʼo hamutuk ho imi atu halo funu hasoru imi-nia inimigu no salva imi.’+  “Tropa nia ulun-naʼin sira mós tenke dehan ba povu: ‘Sé mak harii ona uma foun maibé seidauk inaugura ida-neʼe? Diʼak liu ba nia atu fila fali ba ninia uma. Se lae, nia bele mate iha funu no ema seluk mak sei inaugura ninia uma.  No sé mak kuda ona uvas iha toʼos maibé seidauk koʼa ninia fuan? Diʼak liu ba nia atu fila fali ba ninia uma. Se lae, nia bele mate iha funu no ema seluk mak sei koʼa uvas-fuan husi ninia toʼos neʼe.  No sé mak prenda ona ho feto ida maibé seidauk kaben ho nia? Diʼak liu atu nia fila fali ba ninia uma.+ Se lae, nia bele mate iha funu no mane seluk mak sei kaben ho feto neʼe.’  Tropa nia ulun-naʼin sira mós tenke husu ba povu: ‘Sé mak sente taʼuk no laran-nakdedar?+ Nia tenke fila fali ba ninia uma, atu nuneʼe nia labele halo ninia maun-alin sira sai taʼuk hanesan nia.’+  Kuandu tropa nia ulun-naʼin sira koʼalia hotu ona ba povu neʼe, sira tenke hili xefe tropa nian sira atu dirije tropa. 10  “Bainhira imi hakbesik ba sidade ida atu halo funu hasoru sidade neʼe, imi mós tenke hatoʼo liafuan dame nian ba sira.+ 11  Se sira simu imi-nia liafuan neʼe no loke sira-nia portaun ba imi, entaun povu hotu iha sidade laran sei sai imi-nia atan no serbí imi.+ 12  Maibé se sira lakohi halo dame ho imi no halo funu hasoru imi, imi tenke halo serku ba sidade neʼe, 13  no Jeová, imi-nia Maromak, sei entrega duni sira ba imi-nia liman, no imi tenke oho mane hotu iha sidade neʼe ho surik. 14  Maibé, feto, labarik, animál, sasán no buat hotu neʼebé iha sidade laran, imi bele foti ba imi-nia an,+ no imi sei uza buat neʼebé imi foti husi imi-nia inimigu sira neʼebé Jeová, imi-nia Maromak, entrega ona ba imi.+ 15  “Neʼe mak buat neʼebé imi tenke halo ba sidade sira hotu neʼebé dook tebes husi imi, maibé imi labele halo ida-neʼe ba sidade sira husi nasaun neʼebé besik imi. 16  Kona-ba povu husi sidade sira-neʼe, neʼebé Jeová, imi-nia Maromak, sei fó ba imi nuʼudar liman-rohan, imi labele husik ema ida moris.*+ 17  Imi tenke halakon sira hotu, katak ema Hetes, ema Amoreu, ema Kanaan, ema Perizeu, ema Heveu no ema Jebus,+ hodi tuir buat neʼebé Jeová, imi-nia Maromak, haruka imi atu halo; 18  atu nuneʼe sira labele hanorin imi hodi halo tuir hahalok aat neʼebé sira halo ba sira-nia maromak sira, hodi dada imi ba sala hasoru Jeová, imi-nia Maromak.+ 19  “Se imi halo serku ba sidade ida no halo funu ba loron barak hodi manán sidade neʼe, imi labele estraga ai-hun sira hodi taa ho baliu. Imi bele han ai sira-neʼe nia fuan, maibé imi labele tesi ai sira-neʼe.+ Tanba imi labele ataka ai-hun sira iha rai-luan hanesan imi ataka ema, loos ka lae? 20  Imi bele estraga deʼit ai-hun neʼebé imi hatene ona katak laʼós ai-han. Imi bele tesi ai sira-neʼe hodi harii moru hodi serku sidade neʼe, katak sidade neʼebé funu hasoru imi, toʼo sidade neʼe monu.

Nota-rodapé

Ka “labele husik buat ida neʼebé dada iis atu moris”.