Deuteronómio 11:1-32

  • Imi haree ona Jeová nia forsa (1-7)

  • Rai neʼebé Maromak promete nanis ona (8-12)

  • Halo tuir lori bensaun oioin (13-17)

  • Tenke rai didiʼak Maromak nia liafuan iha laran (18-25)

  • “Bensaun no malisan” (26-32)

11  “Imi tenke hadomi Jeová, imi-nia Maromak,+ no kontinua kumpre imi-nia responsabilidade ba nia no halo tuir ninia ukun-fuan, lei no mandamentu sira.  Imi hatene katak ohin haʼu koʼalia ba imi, laʼós ba imi-nia oan-mane sira neʼebé la hatene no la haree dixiplina husi Jeová, imi-nia Maromak,+ no la haree ninia forsa boot,+ ninia liman neʼebé forte+ no ninia liman neʼebé iha kbiit.  Sira mós la haree sinál neʼebé nia halo no ninia hahalok boot sira neʼebé nia halo iha rai-Ejitu ba Faraó, liurai Ejitu, no ba ninia rai tomak;+  no sira la haree buat neʼebé nia halo ba tropa Ejitu sira, ba Faraó nia kuda sira no ba ninia kuda-karreta funu nian, neʼebé mout iha Tasi Mean bainhira sira duni tuir imi, no Jeová halakon sira dala ida deʼit ba nafatin.+  Sira la haree oinsá nia tau matan ba imi iha rai-fuik toʼo imi mai iha fatin neʼe,  no sira la haree buat neʼebé nia halo ba Eliab nia oan-mane sira, Datan no Abiram husi umakain Ruben, bainhira rai nakloke no tolan sira iha ema Izraél hotu nia oin, hamutuk ho sira-nia família, sira-nia tenda, sira-nia ema no animál hotu neʼebé laʼo tuir sira.+  Ho imi-nia matan rasik imi haree hahalok boot sira neʼebé Jeová halo ona.  “Imi tenke halo tuir mandamentu hotu neʼebé haʼu fó ba imi ohin, hodi nuneʼe imi bele hetan kbiit no hakur mota hodi tama atu foti rai neʼe nuʼudar imi-nian,  no atu nuneʼe imi bele moris naruk+ iha rai neʼebé Jeová jura ona atu fó ba imi-nia beiʼala sira no ba sira-nia bei-oan,+ rai neʼebé iha susubeen no bani-been barak.+ 10  “Rai neʼebé imi sei tama atu foti nuʼudar imi-nian mak la hanesan ho rai-Ejitu neʼebé uluk imi hela bá, neʼebé uluk imi kuda fini no imi serbisu makaʼas atu hatama bee ba rai neʼe,* hanesan imi hatama bee ba toʼos modo nian. 11  Maibé rai neʼebé imi atu hakur mota hodi tama no foti nuʼudar imi-nian mak rai neʼebé iha foho sira no rai-tetuk sira.+ Rai neʼe sempre sai bokon ho udan-been neʼebé tun husi lalehan;+ 12  neʼe mak rai neʼebé Jeová, imi-nia Maromak, tau matan ho didiʼak. Jeová, imi-nia Maromak, nia matan hateke nafatin ba rai neʼe, husi tinan komesa toʼo tinan remata. 13  “Se imi badinas atu halo tuir haʼu-nia mandamentu sira neʼebé haʼu fó sai ba imi ohin no hadomi Jeová, imi-nia Maromak, no serbí nia ho imi-nia laran tomak no ho imi-nia moris* tomak,+ 14  haʼu mós sei fó udan ba imi-nia rai iha tempu neʼebé loos tinan-tinan, udan primeiru no udan ikus,* no imi sei halibur imi-nia trigu,* imi-nia tua-uvas foun no imi-nia mina.+ 15  Haʼu sei halo duʼut moris iha imi-nia rai ba imi-nia animál sira, no imi sei han toʼo bosu.+ 16  Kuidadu bá atu imi la husik imi-nia laran dada imi atu laʼo sees no adora maromak sira seluk no hakruʼuk ba sira.+ 17  Se lae karik, Jeová sei sai hirus tebes hasoru imi, no nia sei taka tiha lalehan hodi udan labele tun+ no rai sei la fó fuan ba imi no imi sei lakon lalais husi rai diʼak neʼebé Jeová fó ba imi.+ 18  “Imi tenke rai didiʼak haʼu-nia liafuan sira-neʼe iha imi-nia laran no imi-nia neon,* no kesi neʼe iha imi-nia liman nuʼudar sinál, no liafuan sira-neʼe tenke sai hanesan hena neʼebé kesi iha imi-nia reen-toos.+ 19  No mós hanorin liafuan sira-neʼe ba imi-nia oan, no koʼalia beibeik kona-ba neʼe kuandu imi tuur iha imi-nia uma, kuandu imi laʼo iha dalan, kuandu imi toba no kuandu imi hadeer.+ 20  Hakerek liafuan sira-neʼe iha imi-nia odamatan nia arus iha imi-nia uma no mós iha imi-nia portaun, 21  atu nuneʼe imi no imi-nia oan sira bele moris naruk+ iha rai neʼebé Jeová jura ona atu fó ba imi-nia beiʼala sira,+ sin, moris naruk durante loron hotu neʼebé lalehan kontinua iha rai nia leten. 22  “Se imi halo tuir ho didiʼak mandamentu neʼebé haʼu hatoʼo ba imi no kumpre ida-neʼe, hodi hadomi Jeová, imi-nia Maromak,+ laʼo iha ninia dalan sira hotu no kaer metin ba nia,+ 23  Jeová sei hasai nasaun sira-neʼe hotu husi imi-nia oin,+ no imi sei duni sai nasaun sira neʼebé forte liu no barak liu fali imi.+ 24  No fatin hotu neʼebé imi-nia ain sama bá sei sai imi-nian.+ No fronteira ba imi-nia rai hahú husi rai-fuik toʼo Líbanu, husi Mota, katak Mota Eufrates, toʼo tasi parte oeste.*+ 25  Ema ida sei la brani atu hamriik hasoru imi.+ Jeová, imi-nia Maromak, sei halo povu tomak iha rai neʼe sente taʼuk no nakdedar ba imi,+ hanesan nia promete ona ba imi. 26  “Haree bá, ohin haʼu tau iha imi-nia oin bensaun no malisan:+ 27  imi sei hetan bensaun se imi halo tuir Jeová, imi-nia Maromak, nia mandamentu sira neʼebé haʼu fó sai ba imi ohin,+ 28  no imi sei hetan malisan se imi la halo tuir Jeová, imi-nia Maromak, nia mandamentu sira+ no laʼo sees husi dalan neʼebé ohin haʼu haruka imi atu laʼo tuir, no laʼo tuir fali maromak sira seluk neʼebé imi la hatene. 29  “Bainhira Jeová, imi-nia Maromak, lori imi ba rai neʼebé imi sei tama atu foti nuʼudar imi-nian, imi tenke fó sai bensaun iha Foho Gerizim no fó sai malisan iha Foho Ebal.+ 30  Foho sira-neʼe mak iha Mota Jordaun nia sorin parte oeste,* iha ema Kanaan sira-nia rai, katak sira neʼebé hela iha área Araba, Gilgal nia oin, besik ai-hun boot sira iha Moré.+ 31  Tanba imi atu hakur Mota Jordaun hodi tama no foti rai neʼebé Jeová, imi-nia Maromak, fó ba imi.+ Bainhira imi foti rai neʼe no hela ona iha neʼebá, 32  imi tenke halo tuir ho didiʼak ukun-fuan no lei hotu neʼebé ohin haʼu tau iha imi-nia oin.+

Nota-rodapé

Ka “foti bee ho imi-nia ain”, karik neʼe refere ba loke bee-dalan ho sira-nia ain.
Udan primeiru komesa maizumenus iha fulan-Outubru nia klaran no udan ikus komesa maizumenus iha fulan-Abríl nia klaran. Haree Ap. B15.
Neʼe inklui mós sevada.
Neʼe katak Tasi Boot ka Tasi Mediterráneu.
Ka “fatin neʼebé loro-matan monu”.