Segundu Samuel 8:1-18

  • David manán funu (1-14)

  • David nia ukun (15-18)

8  Liutiha tempu balu, David halo funu hasoru ema Filístia+ no manán sira,+ nuneʼe David foti sidade Meteg-Ama husi ema Filístia nia liman.  Nia manán funu hasoru ema Moab+ no haruka sira toba latan iha rai no sukat sira ho tali hodi fahe ba grupu tolu. Tuirmai, nia oho grupu rua, no grupu ida nia husik moris.+ Ema Moab sai David nia atan no selu impostu* ba nia.+  David manán Hadadezer bainhira Hadadezer laʼo daudaun ba Mota Eufrates atu domina fali área neʼe.+ Hadadezer mak Reob nia oan-mane, liurai husi Zoba.+  David kaer tropa naʼin-1.700 neʼebé saʼe kuda no tropa naʼin-20.000 neʼebé laʼo ain. Tuirmai David tesi kuda hotu nia ain-uat, katak kuda sira neʼebé dada kuda-karreta, maibé nia la tesi kuda 100 nia ain-uat.+  Bainhira ema Síria husi Damasku+ mai ajuda Liurai Hadadezer husi Zoba, David oho ema Síria naʼin-22.000.+  Tuirmai David tau tropa sira iha Síria iha Damasku, no ema Síria sai David nia atan no selu impostu ba nia. Jeová halo David manán* iha fatin naran deʼit neʼebé nia bá.+  David mós foti eskudu osan-mean neʼebé kabuar husi Hadadezer nia atan sira, no lori eskudu sira-neʼe ba Jeruzalein.+  Liurai David foti riti barak husi Hadadezer nia sidade Beta no Berotai.  Iha tempu neʼebá, Liurai Toi* husi Hamat+ rona katak David manán ona Hadadezer nia tropa tomak.+ 10  Entaun Toi haruka ninia oan-mane Joram bá hasoru Liurai David atu kumprimenta no fó parabéns ba nia tanba nia halo ona funu no manán Hadadezer. No Joram lori sasán oioin neʼebé halo husi osan-mutin, osan-mean no riti. Tanba uluk Hadadezer halo funu beibeik hasoru Toi. 11  Liurai David halo santu buat sira-neʼe ba Jeová, no nia mós halo santu osan-mutin no osan-mean neʼebé nia foti ona husi nasaun sira hotu neʼebé nia manán:+ 12  husi Síria no Moab,+ husi ema Ammon, ema Filístia,+ ema Amalec,+ no buat neʼebé nia hadau husi Reob nia oan-mane Hadadezer,+ liurai husi Zoba. 13  David mós hetan naran-boot bainhira nia fila husi funu hodi oho ema Edom naʼin-18.000 iha Foho-Leet Masin.+ 14  Nia tau tropa sira iha Edom. Iha rai-Edom tomak, nia tau tropa sira no ema Edom hotu sai David nia atan.+ Jeová halo David manán* iha fatin naran deʼit neʼebé nia bá.+ 15  David kontinua ukun Izraél tomak,+ no David tesi-lia ba povu hotu+ ho loloos no tuir justisa.+ 16  Zeruia nia oan-mane Joab+ mak xefe tropa nian, no Ahilud nia oan-mane Jeosafát+ mak hakerek-naʼin. 17  Ahitub nia oan-mane Zadoc+ no Abiatar nia oan-mane Ahimelec serbí nuʼudar amlulik, no Seraias mak sekretáriu. 18  Jeoada nia oan-mane Benaias+ mak xefe ba ema Kereti no ema Peleti.+ No David nia oan-mane sira sai xefe boot.*

Nota-rodapé

Ka “no fó prezente”.
Ka “Jeová salva David”.
Ka “Tou”, neʼebé temi iha 1Kr 18:9, 10.
Ka “Jeová salva David”.
Orj., “sai amlulik”.