Segundu Samuel 5:1-25

  • David sai liurai ba rai-Izraél tomak (1-5)

  • David manán sidade Jeruzalein (6-16)

    • Siaun, David nia Sidade (7)

  • David manán ema Filístia (17-25)

5  Liutiha tempu balu, ema husi suku Izraél hotu bá hasoru David iha Hebron+ no dehan: “Ami mak Ita-nia família rasik no raan ida deʼit.*+  Iha tempu uluk bainhira Saul ukun hela nuʼudar ami-nia liurai, Ita mak dirije ema Izraél bá funu.*+ No Jeová hatete ona ba Ita: ‘Ó mak sei tau matan ba haʼu-nia povu Izraél nuʼudar bibi-atan, no ó sei sai ulun-naʼin ba ema Izraél.’”+  Ho ida-neʼe, Izraél nia katuas hotu bá hasoru liurai iha Hebron, no Liurai David halo aliansa ida ho sira+ iha Hebron iha Jeová nia oin. Tuirmai sira foti* David nuʼudar liurai ba Izraél.+  David sai liurai bainhira nia tinan 30, no nia ukun ba tinan 40.+  Nia ukun Judá ba tinan 7 fulan 6 iha Hebron, no nia ukun Izraél tomak no Judá ba tinan 33 iha Jeruzalein.+  No liurai ho ninia ema sira bá Jeruzalein atu halo funu hasoru ema Jebus+ neʼebé hela iha neʼebá. Ema Jebus sadik David, hodi dehan: “Ó sei nunka bele tama sidade neʼe! Ema matan-delek no ain-kudeʼik sira mós bele duni sai ó.” Sira hanoin: ‘David sei nunka bele tama iha sidade neʼe.’+  Maibé David manán sidade Siaun neʼebé seguru, tan neʼe agora sai nuʼudar David nia Sidade.+  Entaun iha loron neʼebá David hatete: “Sira neʼebé ataka ema Jebus tenke laʼo liu bee-dalan hodi oho ‘ema ain-kudeʼik no matan-delek sira’, neʼebé odi tebes David!” Tan neʼe mak ema dehan: “Ema matan-delek no ain-kudeʼik sei nunka bele tama uma neʼe.”  Tuirmai David hela iha fatin seguru neʼe, no fatin neʼe hanaran* David nia Sidade. David komesa harii moru no uma sira seluk haleʼu sidade husi Millo*+ no iha fatin seluk iha sidade neʼe.+ 10  Ho ida-neʼe, David nia kbiit kontinua sai boot liután,+ no Jeová, Maromak neʼebé ukun tropa lalehan nian hamutuk ho nia.+ 11  Liurai Hirão+ husi Tiro haruka ema bá hasoru David hodi lori ho ai-sedru,+ badaen-ai no badaen-fatuk hodi harii moru sira, no sira komesa harii palásiu ba David.+ 12  David hatene katak Jeová hametin ona ninia pozisaun nuʼudar liurai ba Izraél+ no foti aas ona ninia ukun+ tanba hanoin Ninia povu Izraél.+ 13  David hola tan feen sira no feen-kiʼik sira+ iha Jeruzalein bainhira nia muda sai ona husi Hebron, no David iha tan oan-mane no oan-feto sira.+ 14  David nia oan-mane sira neʼebé moris iha Jeruzalein mak tuirmai neʼe: Samua, Sobab, Natan,+ Salomão,+ 15  Ibar, Elisua, Nefeg, Jafia, 16  Elisama, Eliada no Elifelet. 17  Bainhira ema Filístia rona katak David sai ona liurai* ba Izraél,+ ema Filístia hotu bá buka David.+ Bainhira David rona kona-ba neʼe, nia tun bá hodi subar iha ninia fatin seguru.+ 18  Tuirmai ema Filístia mai no laʼo bá-mai iha Rai-Tetuk Refaim+ atu ataka. 19  David husu Jeová:+ “Haʼu tenke bá hodi funu hasoru ema Filístia ka lae? Ita sei entrega sira ba haʼu-nia liman ka lae?” Jeová hatán ba David: “Ó bele bá, tanba haʼu sei entrega ema Filístia ba ó-nia liman.”+ 20  Entaun David bá Baal-Perazim, no oho sira iha neʼebá. Ho ida-neʼe, nia dehan: “Jeová halakon ona haʼu-nia inimigu sira+ iha haʼu-nia oin, hanesan bee sobu rahun moru.” Tan neʼe mak nia hanaran fatin neʼe Baal-Perazim.*+ 21  Ema Filístia husik hela sira-nia estátua* iha neʼebá, no David ho ninia ema sira foti buat sira-neʼe no lori bá tiha.* 22  Liutiha tempu balu, ema Filístia mai fali no laʼo bá-mai iha Rai-Tetuk Refaim+ atu ataka. 23  David husu Jeová, maibé Nia hatán: “Keta ataka sira husi oin. Maibé laʼo haleʼu sira toʼo sira-nia kotuk, no ataka sira iha ai-baka sira-nia oin. 24  Bainhira ó rona lian hanesan tropa sira marxa iha ai-baka leten, ó tenke ataka kedas, tanba Jeová sei laʼo iha ó-nia oin hodi halakon tropa Filístia.” 25  Entaun David halo tuir Jeová nia mandamentu, no nia oho tropa Filístia+ husi Geba+ toʼo Gezer.+

Nota-rodapé

Orj., “Ami mak Ita-nia ruin no isin”.
Orj., “Ita mak lori ema sai no tama rai-Izraél”.
Orj., “fui mina ba”. Haree “Fui mina” iha Glosáriu.
Ka karik “no nia hanaran fatin neʼe”.
Ka “ema fui ona mina ba David nia ulun nuʼudar liurai”. Haree “Fui mina” iha Glosáriu.
Naran neʼe katak “Naʼi neʼebé sobu rahun moru”.
Ka “ídolu”. Haree Glosáriu.
Neʼe katak David ho ninia ema sira foti estátua sira-neʼe no lori bá halakon tiha. Haree 1Kr 14:12.