Segundu Samuel 3:1-39

  • David nia umakain sai forte liután (1)

  • David nia oan-mane sira (2-5)

  • Abner apoia fali David (6-21)

  • Joab oho Abner (22-30)

  • David tanis tanba Abner mate (31-39)

3  Funu la para entre Saul nia umakain no David nia umakain. David sai forte liután,+ maibé Saul nia umakain sai fraku ba beibeik.+  Iha tempu neʼebá David nia oan-mane sira moris iha Hebron.+ Oan-mane primeiru mak Amnon,+ ninia inan mak Ahinoam+ husi Jezreel.  David nia oan-mane segundu mak Kileab, ninia inan mak Abigail+ neʼebé kaben ho David bainhira Nabal, ema Karmel, mate ona. Oan-mane terseiru mak Absalão,+ ninia inan mak Maaka, Liurai Talmai+ husi Gesur nia oan-feto.  Oan-mane númeru haat mak Adonias,+ ninia inan mak Hagite. Oan-mane númeru lima mak Sefatias, ninia inan mak Abital.  Oan-mane númeru neen mak Itream, ninia inan mak Egla, David nia feen. David nia oan-mane sira-neʼe moris iha Hebron.  Durante tempu neʼebé Saul nia umakain no David nia umakain funu malu, Abner+ kontinua hametin ninia pozisaun iha Saul nia umakain.  Saul iha feen-kiʼik ida naran Rizpa,+ Aias nia oan-feto. Liutiha tempu balu, Is-Boset+ hatete ba Abner: “Tanbasá mak ó halo relasaun ho haʼu-nia aman nia feen-kiʼik?”+  Abner sai hirus tebes tanba Is-Boset nia liafuan sira-neʼe no dehan: “Haʼu mak asu* ida husi Judá ka? Toʼo loron neʼe, haʼu hatudu ona domin neʼebé laran-metin ba ó-nia aman Saul nia umakain no ba ninia maun-alin no belun sira, no haʼu mós la entrega ó ba David nia liman, maibé ohin ó husu haʼu atu hatán kona-ba haʼu-nia sala ho feto ida.  Husik Maromak fó kastigu ba Abner no aumenta tan kastigu neʼe se haʼu la halo ba David tuir buat neʼebé Jeová jura ona ba nia:+ 10  neʼe mak atu hasai ukun husi Saul nia umakain no hametin David nia kadunan hodi ukun Izraél no Judá, husi Dan toʼo Beer-Seba.”+ 11  Is-Boset la koʼalia tan buat ida ba Abner tanba nia taʼuk Abner.+ 12  Abner haruka kedas ema lori lia-menon ba David, hodi dehan: “Rai neʼe sé-nian?” Nia hatutan tan: “Halo aliansa ida ho haʼu, no haʼu sei halo buat naran deʼit tuir haʼu-nia kbiit* atu lori ema Izraél hotu hodi apoia Ita.”+ 13  Ho ida-neʼe, David hatán: “Diʼak! Haʼu sei halo aliansa ida ho ó. Maibé haʼu husu buat ida deʼit husi ó: Bainhira ó mai hasoru haʼu, ó labele haree haʼu-nia oin se ó la lori uluk Saul nia oan-feto Mical+ ba haʼu.” 14  Tuirmai David haruka ema lori lia-menon ba Saul nia oan-mane Is-Boset,+ hodi dehan: “Fó fali haʼu-nia feen Mical, neʼebé haʼu prenda ona hodi fó ema Filístia naʼin-100 nia kulit husi oin-lulik.”+ 15  Entaun Is-Boset haruka ema atu foti fali Mical husi ninia laʼen Paltiel.+ Paltiel mak Laís nia oan-mane. 16  Maibé Mical nia laʼen kontinua laʼo tuir nia, no tanis tuir nia toʼo Baurim.+ Tuirmai Abner dehan ba Paltiel: “Fila bá!” Ho ida-neʼe, nia fila fali. 17  Iha tempu neʼebá, Abner haruka lia-menon ba Izraél nia katuas sira, hodi dehan: “Ba tempu kleur ona imi hakarak David atu sai imi-nia liurai. 18  Agora mak tempu atu halo ida-neʼe, tanba Jeová hatete ona ba David: ‘Liuhusi haʼu-nia atan David+ nia liman mak haʼu sei salva haʼu-nia povu Izraél husi ema Filístia no husi sira-nia inimigu hotu nia liman.’” 19  Tuirmai Abner koʼalia ba ema Benjamim.+ Abner mós bá koʼalia mesamesak ho David iha Hebron hodi fó-hatene ba nia buat neʼebé ema Izraél no umakain Benjamim tomak konkorda ona. 20  Bainhira Abner no mane naʼin-20 toʼo ba David iha Hebron, David halo festa ida ba Abner ho ninia ema sira neʼebé hamutuk ho nia. 21  Tuirmai Abner hatete ba David: “Husik haʼu bá halibur ema Izraél hotu hamutuk ba haʼu-nia naʼi liurai, atu nuneʼe sira bele halo aliansa ida ho Ita, no Ita sei sai liurai ba Izraél tomak.” Entaun David husik Abner fila, no nia laʼo bá ho dame. 22  Iha tempu neʼe duni mak Joab no David nia atan sira seluk fila husi funu, no lori sasán barak neʼebé sira hadau. Kona-ba Abner, nia la hamutuk tan ho David iha Hebron, tanba David haruka nia bá ho dame. 23  Bainhira Joab+ no tropa hotu neʼebé hamutuk ho nia toʼo ona, ema fó-hatene ba Joab, hodi dehan: “Ner+ nia oan-mane Abner,+ foin mai hasoru liurai, no liurai haruka nia fila, no nia bá ho dame.” 24  Entaun Joab bá hasoru liurai no dehan: “Tanbasá mak Ita halo nuneʼe? Abner mai hasoru Ita. Tanbasá mak Ita husik nia bá? 25  Ita rasik hatene Ner nia oan-mane Abner! Nia mai atu lohi Ita no buka-hatene Ita-nia planu sira no buat hotu neʼebé Ita halo daudaun.” 26  Ho ida-neʼe, Joab husik hela David no haruka ema duni tuir Abner. Sira lori Abner fila husi tanke* neʼebé iha Será, maibé David la hatene buat ida kona-ba neʼe. 27  Bainhira Abner fila fali ba Hebron,+ Joab lori nia tama ba portaun laran hodi koʼalia mesamesak ho nia. Maibé, iha neʼebá nia sona Abner nia kabun, no Abner mate;+ nia halo nuneʼe tanba Abner oho* ninia alin Asael.+ 28  Bainhira David rona kona-ba neʼe, nia dehan: “Iha Jeová nia oin, haʼu no haʼu-nia povu laran-moos nafatin, ami la hetan sala kona-ba Ner nia oan-mane Abner nia raan.+ 29  Haʼu hein katak Joab no ninia aman nia umakain tomak mak lori sala neʼe.+ No iha Joab nia umakain sei nafatin iha mane neʼebé hetan moras been sai husi oin-lulik+ ka moras-lepra,+ mane neʼebé aleijadu* ka mane neʼebé mate ho surik, ka mane neʼebé la iha hahán!”+ 30  Joab no ninia maun Abisai+ oho Abner+ tanba Abner oho sira-nia alin Asael iha funu+ iha Gibeão. 31  Tuirmai David dehan ba Joab no ema hotu neʼebé hamutuk ho nia: “Lees imi-nia roupa no kesi hena karón* no tanis ba Abner.” Liurai David rasik laʼo tuir ema sira neʼebé hulan mate. 32  Sira hakoi Abner iha Hebron, no liurai tanis makaʼas iha Abner nia rate. Povu hotu mós tanis. 33  Liurai lelir ba Abner, hodi dehan: “Abner tenke mate hanesan ema beik ka? 34  Ó-nia liman la kesi metin,No ó-nia ain mós la kesi ho korrente.* Ó monu latan iha ema neʼebé halo krime* nia oin.”+ Ho ida-neʼe, povu hotu tanis fali ba Abner. 35  Bainhira rai sei loron hela, povu hotu mai no fó paun ba David atu han hodi halo nia sente kmaan,* maibé David jura, hodi dehan: “Husik Maromak fó kastigu ba haʼu no aumenta tan kastigu neʼe se haʼu han paun ka koko hahán ruma antes loro-matan monu!”+ 36  Povu hotu haree buat neʼebé liurai halo no sira gosta. Sira mós sempre kontente ho buat hotu neʼebé liurai halo. 37  Iha loron neʼebá, povu hotu no ema Izraél tomak hatene katak liurai la iha sala kona-ba Ner nia oan-mane Abner nia mate.+ 38  Tuirmai liurai hatete ba ninia atan sira: “Imi hatene ka lae, katak ohin ulun-naʼin no ema naran-boot ida iha Izraél mate ona?+ 39  Ohin haʼu fraku maski haʼu sai ona liurai,+ no Zeruia nia oan-mane+ sira-neʼe brutál liu mai haʼu.+ Haʼu hein katak Jeová sei selu fali ema aat tuir sira-nia hahalok aat rasik.”+

Nota-rodapé

Orj., “asu nia ulun”.
Orj., “no haʼu-nia liman hamutuk ho Ita”.
Orj., “tanba raan husi”.
Orj., “mane neʼebé tiʼi kabas”. Neʼe katak mane neʼebé bele halo deʼit feto nia serbisu.
Orj., “riti”.
Orj., “hahalok la loos nia oan-mane sira”.
Ka “fó paun triste nian ba David”.