Segundu Samuel 19:1-43

  • David tanis tanba Absalão (1-4)

  • Joab fó konsellu ba David (5-8a)

  • David fila fali ba Jeruzalein (8b-15)

  • Simei husu perdua (16-23)

  • Mefiboset esplika nia la sala (24-30)

  • David hakarak fó kolen ba Barzilai (31-40)

  • Haksesuk malu entre suku sira (41-43)

19  Ema fó-hatene ba Joab, hodi dehan: “Liurai tanis no neon-susar tanba Absalão.”+  Entaun iha loron neʼebá, tempu ksolok ba povu hotu tanba manán funu* sai fali tempu triste, tanba sira rona katak liurai neon-susar tanba ninia oan-mane.  Iha loron neʼebá, povu sira fila fali ba sidade+ nonook deʼit hanesan povu neʼebé sai moe tanba halai husi funu.  Liurai taka nia oin no tanis ho lian makaʼas, hodi dehan: “Haʼu-nia oan Absalão! Absalão, haʼu-nia oan!”+  Tuirmai Joab tama hodi hasoru liurai iha uma no dehan: “Ohin Ita-Boot hamoe ona Ita-nia atan hotu neʼebé salva Ita-nia moris, Ita-nia oan-mane+ no oan-feto+ sira-nia moris, no Ita-nia feen no feen-kiʼik sira+ hotu nia moris.  Ita hadomi sira neʼebé odi Ita no odi sira neʼebé hadomi Ita, tanba ohin Ita hatudu ona ho klaru katak Ita-nia xefe sira no atan sira la iha folin ba Ita, tanba haʼu hatene katak se Absalão moris karik no ami hotu mate, neʼe mak buat diʼak ba Ita.  Agora hamriik, sai bá hodi hametin Ita-nia atan sira, tanba haʼu jura hodi Jeová nia naran katak se Ita la sai, mane ida mós sei la hela ho Ita iha kalan neʼe. No neʼe sei sai aat liu fali susar hotu neʼebé Ita hasoru husi Ita-nia tempu joven toʼo agora.”  Entaun liurai hamriik no bá tuur iha sidade nia portaun, no ema fó sai lia-menon ba povu hotu, hodi dehan: “Agora liurai tuur daudaun iha portaun.” Tuirmai povu hotu mai iha liurai nia oin. Maibé ema Izraél halai ona, sira ida-idak fila ba sira-nia uma rasik.+  Povu hotu husi Izraél nia suku hotu haksesuk malu, hodi dehan: “Liurai salva ona ita husi ita-nia inimigu,+ no nia salva ita husi ema Filístia, maibé agora nia husik hela rai neʼe tanba Absalão.+ 10  No Absalão, neʼebé ita hili* ona atu ukun ita,+ mós mate ona iha funu.+ Entaun agora, tanbasá mak ita la halo buat ida hodi lori fali liurai mai?” 11  Liurai David haruka lia-menon ba amlulik Zadoc+ no amlulik Abiatar,+ hodi dehan: “Hatete ba Judá nia katuas sira:+ ‘Liurai rona ona iha ninia uma katak ema Izraél hotu hakarak lori nia fila fali, entaun tanbasá mak imi demora atu lori liurai fila ba ninia palásiu? 12  Imi mak haʼu-nia maun-alin sira; imi mak haʼu-nia família rasik no raan ida deʼit.* Entaun tanbasá mak imi demora atu lori liurai fila?’ 13  Imi tenke dehan ba Amasa:+ ‘Ó mak haʼu-nia família rasik no raan ida deʼit, loos ka lae? Husik Maromak fó kastigu ba haʼu no aumenta tan kastigu neʼe se ohin ó la sai nuʼudar xefe ba haʼu-nia tropa sira hodi troka Joab.’”+ 14  Entaun liurai halo ema Judá hotu gosta nia ho hanoin ida deʼit, no sira haruka lia-menon ba liurai, hodi dehan: “Ita no Ita-nia atan hotu fila fali mai.” 15  Liurai komesa fila fali no toʼo iha Mota Jordaun, no povu husi Judá toʼo iha Gilgal+ atu hasoru liurai no sira akompaña liurai hodi hakur Mota Jordaun. 16  Entaun Gera nia oan-mane Simei,+ ema Benjamim husi Baurim, laʼo tun lalais hamutuk ho mane Judá sira atu hasoru Liurai David, 17  no mane Benjamim naʼin-1.000 hamutuk ho nia. No atan-mane ida iha Saul nia umakain naran Ziba,+ hamutuk ho ninia oan-mane naʼin-15 no atan naʼin-20, tun lalais ba Mota Jordaun hodi toʼo uluk liu liurai. 18  Nia* hakur mota neʼe atu lori liurai nia umakain ba mota sorin no atu halo buat naran deʼit neʼebé liurai hakarak. Maibé Gera nia oan-mane Simei hakneʼak no hakruʼuk ho oin ba rai iha liurai nia oin bainhira liurai atu hakur Mota Jordaun. 19  Nia hatete ba liurai: “Haʼu-nia naʼi keta fó-sala ba haʼu, no keta hanoin-hetan sala neʼebé Ita-nia atan halo ona+ iha loron neʼebé haʼu-nia naʼi liurai sai husi Jeruzalein. Haʼu hein katak liurai sei la rai haʼu-nia sala iha laran, 20  tanba Ita-nia atan hatene ho momoos katak haʼu halo ona sala; entaun husi José nia umakain hotu, ohin haʼu mak tun uluk liu mai atu hasoru haʼu-nia naʼi liurai.” 21  Zeruia nia oan-mane+ Abisai+ koʼalia kedas, hodi dehan: “Simei tenke mate tanba nia fó-malisan ba ema neʼebé Jeová hili* ona, loos ka lae?”+ 22  Maibé David dehan: “Oh Zeruia nia oan-mane sira,+ tanbasá mak imi tenke mete ho ida-neʼe hodi kontra haʼu-nia hakarak? Ema ruma tenke mate ohin iha Izraél ka? Ohin haʼu mak sai fali ona liurai ba Izraél, loos ka lae?” 23  Tuirmai liurai dehan ba Simei: “Ó sei la mate.” No liurai jura ba nia.+ 24  Saul nia bei-oan Mefiboset+ mós tun mai hasoru liurai. Nia la tau matan ba ninia ain, la tesi ninia hasarahun* no la fase ninia roupa husi loron neʼebé liurai sai toʼo loron neʼebé liurai fila fali ho dame. 25  Bainhira nia toʼo iha* Jeruzalein atu hasoru liurai, liurai hatete ba nia: “Tanbasá mak ó la bá hamutuk ho haʼu, Mefiboset?” 26  Nia hatán: “Haʼu-nia naʼi liurai, haʼu-nia atan+ mak lohi haʼu. Tanba Ita-nia atan neʼe dehan: ‘Husik haʼu tau sela ba haʼu-nia kuda-burru atu nuneʼe haʼu bele saʼe no bá hamutuk ho liurai’, tanba Ita-nia atan neʼe kudeʼik.+ 27  Maibé nia koʼalia bosok ba haʼu-nia naʼi liurai hodi hafoʼer Ita-nia atan neʼe nia naran.+ Maski nuneʼe, haʼu-nia naʼi liurai mak hanesan Maromak loos nia anju, entaun halo bá buat naran deʼit neʼebé Ita-Boot hanoin mak diʼak. 28  Tuir loloos haʼu-nia naʼi liurai bele oho hotu haʼu-nia aman nia umakain tomak, maski nuneʼe Ita tau Ita-nia atan neʼe hamutuk ho sira hotu neʼebé han iha Ita-nia meza.+ Entaun haʼu iha tan direitu saida atu husu buat seluk ba liurai?” 29  Maibé liurai hatete ba nia: “Labele koʼalia tan hanesan neʼe! Haʼu deside ona katak ó no Ziba tenke fahe toʼos neʼe ba malu.”+ 30  Mefiboset hatete ba liurai: “Husik nia foti toʼos hotu, tanba agora haʼu-nia naʼi liurai fila fali ona ba ninia uma ho dame.” 31  Barzilai+ ema Gilead tun mai husi Rogelim hodi toʼo iha Mota Jordaun atu akompaña liurai ba Mota Jordaun. 32  Barzilai katuas loos ona, nia tinan 80, no nia fó ai-han ba liurai bainhira liurai hela iha Manaim+ tanba Barzilai mak ema neʼebé riku tebes. 33  Entaun liurai dehan ba Barzilai: “Hakur mota hamutuk ho haʼu, no haʼu sei fó ai-han ba ó iha Jeruzalein.”+ 34  Maibé Barzilai dehan ba liurai: “Haʼu sei moris ba loron hira tan hodi haʼu tenke bá hamutuk ho liurai toʼo Jeruzalein? 35  Ita-nia atan neʼe tinan 80 ona.+ Haʼu bele hatene buat diʼak husi buat aat ka? Haʼu bele sente buat neʼebé haʼu han no hemu ka? Haʼu sei bele rona mane ka feto sira neʼebé kanta ka?+ Entaun, tanbasá mak Ita-nia atan neʼe hatodan tan haʼu-nia naʼi liurai? 36  Haʼu-nia liurai la presiza fó kolen ba haʼu. Ita-nia atan neʼe sente kontente ona atu akompaña liurai toʼo Mota Jordaun. 37  Favór ida, husik Ita-nia atan neʼe fila, no husik haʼu mate iha haʼu-nia sidade besik fatin neʼebé haʼu-nia inan-aman hakoi bá.+ Maibé Ita-nia atan Kiman+ mak neʼe. Lori nia hakur mota hamutuk ho haʼu-nia naʼi liurai, no Ita bele halo ba nia tuir buat neʼebé Ita hanoin mak diʼak.” 38  Entaun liurai hatete: “Kiman sei hakur mota hamutuk ho haʼu, no haʼu sei halo ba nia tuir buat neʼebé ó hanoin mak diʼak; haʼu sei halo ba ó tuir buat naran deʼit neʼebé ó husu.” 39  Povu hotu komesa hakur Mota Jordaun, no bainhira liurai hakur, liurai reʼi Barzilai+ nia hasan no haraik bensaun ba nia, no Barzilai fila fali ba ninia uma. 40  Bainhira liurai hakur ona mota hodi bá Gilgal,+ Kiman mós hakur hamutuk ho nia. Povu Judá hotu no povu Izraél sorin balu lori liurai hodi hakur mota neʼe.+ 41  Tuirmai ema Izraél hotu hakbesik ba liurai, hodi dehan: “Tanbasá mak ami-nia maun-alin sira husi Judá lori Ita subasubar? Sira lori Ita ho Ita-nia umakain hakur Mota Jordaun hamutuk ho Ita-nia ema sira hotu.”+ 42  Ema Judá hotu hatán ba ema Izraél: “Tanba liurai mak ami-nia família.+ Tanbasá mak imi hirus kona-ba neʼe? Ami han buat ruma neʼebé liurai mak sosa ka? Ami simu ona prezente ruma ka?” 43  Maibé ema Izraél hatán ba ema Judá: “Ami hamutuk suku sanulu. Tan neʼe, ami iha direitu boot liu imi kona-ba David. Entaun, tanbasá mak imi hakribi ami? Ami mak tenke ulukliu atu lori liurai fila, loos ka lae?” Maski nuneʼe, ema Judá nia liafuan manán* ema Izraél nian.

Nota-rodapé

Ka “hetan salvasaun”.
Orj., “fui mina”. Haree “Fui mina” iha Glosáriu.
Orj., “imi mak haʼu-nia ruin no isin”.
Ka karik “Sira”.
Orj., “fui mina”. Haree “Fui mina” iha Glosáriu.
Ka “ibun-rahun”.
Ka karik “Bainhira nia mai husi”.
Ka “makaʼas liu”.