Segundu Samuel 17:1-29

  • Husai halo runguranga Ahitofel nia konsellu (1-14)

  • David hetan avizu; halai sees husi Absalão (15-29)

    • Barzilai no ema seluk ajuda David (27-29)

17  Tuirmai Ahitofel dehan ba Absalão: “Favór ida, husik haʼu hili mane naʼin-12.000 hodi duni tuir David iha kalan neʼe.  Haʼu sei toman nia bainhira nia sai kole no la iha kbiit,*+ no haʼu sei halo nia sai nakdedar. Ema hotu neʼebé hamutuk ho nia sei halai, no haʼu sei oho deʼit liurai.+  Tuirmai haʼu sei lori fali povu hotu ba ó. Se ó-nia inimigu David mate, entaun povu hotu sei fila fali ba ó. Depois neʼe, povu hotu sei iha dame.”  Absalão no Izraél nia katuas hotu gosta planu neʼe.  Maibé Absalão dehan: “Favór ida, bolu mós Husai+ ema Arki, mai ita rona saida mak nia sei dehan.”  Entaun Husai tama hodi hasoru Absalão. Tuirmai Absalão dehan ba nia: “Neʼe mak konsellu neʼebé Ahitofel fó. Ami tenke halo tuir ninia konsellu neʼe ka lae? Se lae, ó rasik mak fó sai mai ami saida mak ami bele halo.”  Ho ida-neʼe, Husai dehan ba Absalão: “Konsellu neʼebé Ahitofel fó la diʼak ba situasaun neʼe!”+  Husai hatutan tan dehan: “Ita rasik hatene ho didiʼak katak Ita-nia aman no ninia ema sira iha kbiit boot,+ no sira siʼak tebes hanesan ursu-inan neʼebé lakon ninia oan iha rai-luan.+ Liután neʼe, Ita-nia aman mak funu-naʼin ida,+ no nia sei la toba kalan hamutuk ho povu.  Agora daudaun nia subar an iha fatuk-kuak* ka iha fatin seluk.+ Se nia mak ataka uluk, ema sira neʼebé rona ida-neʼe sei dehan: ‘Ema neʼebé laʼo tuir Absalão lakon ona!’ 10  Mane neʼebé aten-brani hanesan leaun+ mós sei sai laran-nakdedar, tanba ema Izraél hotu hatene katak Ita-nia aman mak mane neʼebé kbiit boot+ no ninia ema sira mós aten-brani. 11  Haʼu-nia konsellu mak tuirmai neʼe: Halibur ema Izraél hotu ba Ita, ema husi Dan toʼo Beer-Seba+ neʼebé barak hanesan rai-henek iha tasi ninin,+ no Ita tenke dirije sira bá funu. 12  Ita sei bá atu ataka David iha fatin naran deʼit neʼebé ita hetan nia, no ita sei ataka nia hanesan mahobeen neʼebé taka rai. Nia no ninia ema hotu neʼebé hamutuk ho nia sei mate, sira ida mós sei la moris. 13  Se nia hakiduk hodi tama ba sidade ida, ema Izraél hotu sei lori tali ba sidade neʼe, no ita sei dada sidade neʼe tun ba rai-tetuk toʼo la iha tan fatuk kiʼik ida mak hela.” 14  Rona tiha neʼe, Absalão no mane Izraél hotu dehan: “Husai ema Arki nia konsellu mak diʼak liu+ fali Ahitofel nia konsellu!” Neʼe tanba Jeová deside ona* atu halo runguranga Ahitofel nia konsellu diʼak,+ hodi nuneʼe Jeová bele lori susar ba Absalão.+ 15  Depois neʼe, Husai dehan ba amlulik Zadoc no amlulik Abiatar:+ “Neʼe mak konsellu neʼebé Ahitofel fó sai ba Absalão no ba Izraél nia katuas sira, no neʼe mak haʼu-nia konsellu. 16  Agora haruka lalais lia-menon ba David no fó avizu ba nia dehan: ‘Ohin kalan keta hela besik dalan* sira atu hakur mota iha rai-fuik neʼe, maibé hakur ba sorin, se lae, liurai no povu hotu neʼebé hamutuk ho nia sei mate mohu.’”+ 17  Jonatan+ no Ahimaz+ hela iha En-Rogel+ iha sidade nia liʼur, atu nuneʼe ema labele haree sira. Entaun atan-feto ida bá fó sai lia-menon ba sira no sira bá atu konta fali ba Liurai David. 18  Maibé, mane joven ida haree sira no fó-hatene ba Absalão. Entaun sira naʼin-rua bá lalais no toʼo iha mane ida nia uma iha Baurim.+ Mane neʼe iha bee-posu ida iha ninia pátiu,* no sira naʼin-rua tama iha bee-posu laran, 19  no mane neʼe nia feen taka bee-posu neʼe no tau trigu-musan iha leten. La iha ema ida mak hatene kona-ba neʼe. 20  Absalão nia atan sira mai iha feto neʼe nia uma no husu: “Ahimaz no Jonatan iha neʼebé?” Feto neʼe hatán: “Sira laʼo liu iha neʼe no bá mota.”+ Nuneʼe, atan sira-neʼe bá buka tuir sira maibé la hetan sira, entaun atan sira-neʼe fila fali ba Jeruzalein. 21  Bainhira Absalão nia atan sira fila ona, sira naʼin-rua sai husi bee-posu neʼe no bá hodi hatoʼo lia-menon ba Liurai David, hodi dehan: “Hamriik, hakur lalais mota neʼe, tanba Ahitofel fó ona konsellu kontra imi.”+ 22  David no ema hotu neʼebé hamutuk ho nia hamriik kedas hodi hakur Mota Jordaun. Bainhira rai komesa naroman, ema hotu hakur tiha ona Mota Jordaun. 23  Bainhira Ahitofel haree katak sira la halo tuir ninia konsellu, nia tau sela ba kuda-burru no saʼe hodi fila ba ninia uma iha ninia sidade.+ Tuirmai nia fó matadalan ba ninia umakain,+ depois neʼe nia tara an.*+ Nuneʼe nia mate no hakoi iha ninia beiʼala sira-nia rate. 24  Iha tempu neʼebá, David bá Manaim,+ no Absalão hakur Mota Jordaun hamutuk ho mane Izraél hotu. 25  Absalão foti Amasa+ atu dirije tropa sira hodi troka Joab.+ Amasa mak Itra ema Izraél nia oan-mane, Itra mak ida neʼebé halo relasaun ho Nahas nia oan-feto Abigail,+ Zeruia nia alin-feto. Zeruia mak Joab nia inan. 26  Tropa Izraél no Absalão hela iha rai-Gilead.+ 27  Bainhira David toʼo iha Manaim, Nahas, ema Ammon husi Rabá,+ nia oan-mane Sobi, no Amiel husi Lo-Debar nia oan-mane Makir,+ no Barzilai+ ema Gilead husi Rogelim, 28  sira lori toba-fatin, basia, sanan-rai, trigu, sevada, trigu uut, trigu neʼebé sona ona, koto, lentilla, trigu maran, 29  bani-been, manteiga, bibi-malae no keiju.* Sira lori buat hotu neʼe ba David no ba ninia ema sira atu han,+ tanba sira dehan: “Ema sira-neʼe hamlaha, kole no hamrook iha rai-fuik.”+

Nota-rodapé

Ka “liman rua sai fraku”.
Ka “rai-kuak”.
Ka “fó ona mandamentu”.
Ka karik “rai-tetuk maran”.
Ka “buti ninia kakorok rasik”.
Orj., “karau nia susubeen grosu”.