Segundu Samuel 14:1-33

  • Joab no feto husi Tekoa (1-17)

  • David hatene Joab nia planu (18-20)

  • David husik Absalão fila fali (21-33)

14  Zeruia nia oan-mane Joab+ hatene katak liurai hanoin tebes Absalão.+  Nuneʼe Joab haruka ema ba sidade Tekoa+ no bolu feto matenek ida husi fatin neʼe. Joab dehan ba feto neʼe: “Favór ida, finje hanesan ó triste tanba ema ruma mate, no tau roupa triste nian, no keta kose mina ba ó-nia isin.+ Halo ó-nia an hanesan feto neʼebé tanis ba tempu kleur ona tanba ema ruma mate.  Tuirmai bá hasoru liurai no koʼalia hanesan neʼe.” Ho ida-neʼe, Joab fó-hatene nia saida mak nia tenke koʼalia.*  Feto Tekoa neʼe bá hasoru liurai no hakneʼak hodi hakruʼuk ho oin ba rai no dehan: “Oh liurai, ajuda haʼu!”  Liurai husu ba nia: “Ó iha problema saida?” Nia hatán: “Haʼu mak feto-faluk ida, haʼu-nia laʼen mate ona.  Ita-Boot nia atan neʼe iha oan-mane naʼin-rua, no sira naʼin-rua baku malu iha rai-luan. La iha ema ida mak sori sira, no haʼu-nia oan ida baku ida seluk toʼo oho nia.  Agora haʼu-nia família tomak kontra hasoru Ita-nia atan neʼe, no sira dehan: ‘Entrega ó-nia oan-mane neʼebé oho ninia maun, atu nuneʼe ami bele oho nia hodi selu ninia maun nia moris neʼebé nia halakon ona,+ maski neʼe katak atu oho tiha ida neʼebé sei simu liman-rohan!’ Sira sei hamate haʼu-nia ahi-klaak ikus neʼebé sei lakan hela* no se nuneʼe, la iha tan ema ida atu hatutan haʼu-nia laʼen nia naran ka la iha ema ida husi ami mak sei moris iha rai.”  Liurai dehan ba feto neʼe: “Fila ba ó-nia uma, no haʼu sei fó sai mandamentu ida kona-ba ó.”  Ho ida-neʼe, feto Tekoa neʼe dehan ba liurai: “Oh haʼu-nia naʼi liurai, husik haʼu no haʼu-nia aman nia umakain mak simu sala neʼe, maibé liurai no ninia kadunan la iha sala ida.” 10  Liurai dehan: “Se ema ruma koʼalia tan ba ó, lori nia mai haʼu, no nia sei nunka halo tan problema ba ó.” 11  Maibé feto neʼe dehan: “Favór ida, liurai hanoin-hetan bá Jeová, Ita-nia Maromak, atu nuneʼe família husi ema neʼebé mate*+ labele halo aat no halakon haʼu-nia oan-mane.” Liurai hatán: “Haʼu jura hodi Jeová, Maromak neʼebé moris,+ ó-nia oan-mane nia fuuk-lahan ida mós sei la monu ba rai.” 12  Feto neʼe dehan: “Favór ida, husik Ita-nia atan neʼe koʼalia netik liafuan ida ba haʼu-nia naʼi liurai.” Entaun nia hatán: “Koʼalia bá!” 13  Feto neʼe dehan: “Entaun, tanbasá mak Ita rasik hanoin atu halo buat hanesan neʼe hasoru Maromak nia povu?+ Bainhira liurai koʼalia nuneʼe, liurai rasik hetan sala, tanba liurai la lori fila liurai nia oan-mane rasik neʼebé Ita duni sai ona.+ 14  Ita hotu sei mate duni no sei sai hanesan bee neʼebé fakar ba rai no labele foti fali. Maibé Maromak sei la hasai moris* ida, no nia buka razaun sira atu bele lori fila ema neʼebé duni sai ona husi nia. 15  Haʼu tama mai atu koʼalia ba haʼu-nia naʼi liurai tanba povu halo haʼu taʼuk. Entaun Ita-nia atan dehan: ‘Favór ida, husik haʼu koʼalia ba liurai. Karik liurai sei halo tuir buat neʼebé ninia atan neʼe husu. 16  Karik liurai sei rona no salva ninia atan neʼe husi ema sira neʼebé buka atu halakon haʼu no haʼu-nia oan-mane mesak husi liman-rohan neʼebé Maromak fó ona ba ami.’+ 17  Tuirmai Ita-nia atan neʼe dehan: ‘Haʼu hein katak haʼu-nia naʼi liurai nia liafuan sei fó kmaan ba haʼu’, tanba haʼu-nia naʼi liurai mak hanesan Maromak loos nia anju ida neʼebé hatene saida mak diʼak no saida mak aat. Haʼu harohan katak Jeová, Ita-nia Maromak, hamutuk ho Ita.” 18  Liurai hatán ba feto neʼe: “Favór ida, keta subar buat ida kona-ba buat neʼebé haʼu atu husu.” Feto neʼe hatán: “Favór ida, koʼalia bá, haʼu-nia naʼi liurai.” 19  Tuirmai liurai husu: “Joab mak haruka ó atu koʼalia liafuan hotu neʼe ka?”+ Feto neʼe hatán: “Oh haʼu-nia naʼi liurai, haʼu koʼalia loloos ba Ita katak,* neʼe tuir duni* haʼu-nia naʼi liurai nia liafuan, tanba Ita-nia atan Joab mak haruka haʼu mai no nia mak fó-hatene liafuan hotu neʼe ba Ita-nia atan neʼe. 20  Ita-nia atan Joab halo ida-neʼe hodi troka Ita-nia hanoin kona-ba situasaun neʼe, maibé haʼu-nia naʼi iha matenek hanesan Maromak loos nia anju ida no hatene buat hotu neʼebé akontese daudaun iha rai neʼe.” 21  Tuirmai liurai hatete ba Joab: “Diʼak, haʼu sei halo duni buat sira-neʼe.+ Bá lori fali Absalão mai.”+ 22  Rona tiha neʼe, Joab hakneʼak no hakruʼuk ho oin ba rai no fó hahiʼi ba liurai. Joab dehan: “Oh haʼu-nia naʼi liurai, agora Ita-nia atan hatene katak Ita kontente ona ho haʼu, tanba liurai halo tuir buat neʼebé Ita-nia atan husu.” 23  Tuirmai Joab hamriik no bá Gesur+ no lori fila Absalão ba Jeruzalein. 24  Maibé, liurai dehan: “Husik nia fila ba ninia uma rasik, maibé nia labele haree haʼu-nia oin.” Entaun Absalão fila fali ba ninia uma rasik, no nia la haree liurai nia oin. 25  Iha tempu neʼebá la iha mane ida iha Izraél neʼebé bonitu hanesan Absalão. Nia simu hahiʼi barak tebes. Nia isin kabeer husi ninia ulun toʼo ain. 26  Bainhira nia koi nia fuuk, ninia fuuk todan maizumenus kilograma rua ho balu* hodi tetu tuir dasin-fuan liurai nian.* Nia tenke koi nia fuuk tinan-tinan tanba ninia fuuk todan loos ba nia. 27  Absalão iha oan-mane naʼin-tolu+ no mós oan-feto ida naran Tamar. Feto neʼe bonita loos. 28  Absalão kontinua hela iha Jeruzalein durante tinan rua tomak, maibé nia la haree liurai nia oin.+ 29  Entaun Absalão bolu Joab atu haruka nia bá hasoru liurai, maibé Joab lakohi mai hasoru nia. Tuirmai nia haruka tan atu bolu Joab ba dala segundu, maibé Joab lakohi mai. 30  Ikusmai Absalão dehan ba nia atan sira: “Joab nia rai mak besik haʼu-nia rai, no nia iha sevada* iha rai neʼe. Entaun bá sunu tiha ninia sevada.” Nuneʼe Absalão nia atan sira sunu rai neʼe. 31  Ho ida-neʼe, Joab mai hasoru Absalão iha ninia uma no husu nia: “Tanbasá mak ó-nia atan sira sunu haʼu-nia rai?” 32  Absalão hatán ba Joab: “Haʼu haruka ona lia-menon ba ó dehan: ‘Mai no haʼu sei haruka ó bá hasoru liurai atu husu: “Tanbasá mak haʼu fila husi Gesur?+ Diʼak liu haʼu hela deʼit iha neʼebá. Agora husik haʼu haree liurai nia oin, no se haʼu halo sala ruma, entaun liurai tenke oho haʼu.”’” 33  Entaun Joab bá hasoru liurai no fó sai liafuan sira-neʼe ba liurai. Tuirmai liurai bolu Absalão, no nia bá hasoru liurai no hakneʼak hodi hakruʼuk ho oin ba rai iha liurai nia oin. Depois neʼe, liurai reʼi Absalão.+

Nota-rodapé

Orj., “tau liafuan iha ninia ibun”.
Neʼe katak esperansa ikus atu iha jerasaun.
Ka “atu nuneʼe ida neʼebé iha direitu atu selu fali raan neʼe”.
Ka “tebes duni hanesan Ita-Boot moris”.
Ka “la iha ema ida mak bele fila ba liman-karuk ka ba liman-loos husi”.
Orj., “siklo 200”. Haree Ap. B14.
Karik neʼe mak dasin-fuan neʼebé rai iha palásiu ka karik liurai nia siklo la hanesan siklo baibain.