Segundu Samuel 12:1-31

  • Natan fó konsellu ba David (1-15a)

  • Bat-Seba nia oan-mane mate (15b-23)

  • Bat-Seba tuur-ahi Salomão (24, 25)

  • David manán ema Ammon nia sidade Rabá (26-31)

12  Entaun Jeová haruka Natan+ bá hasoru David. Nuneʼe Natan bá hasoru nia+ no dehan: “Iha mane naʼin-rua iha sidade ida, mane ida riku no ida seluk kiak.  Mane neʼebé riku iha bibi-malae no karau barak tebes,+  maibé mane neʼebé kiak la iha buat ida, só iha deʼit bibi-malae inan kiʼik ida, neʼebé nia sosa.+ Nia tau matan ba bibi-oan neʼe, no bibi neʼe sai boot hamutuk ho nia no ninia oan-mane sira. Bibi neʼe han husi hahán uitoan neʼebé nia iha no hemu husi ninia kopu no toba iha ninia liman. Bibi neʼe sai hanesan oan-feto ida ba nia.  Liutiha tempu balu, bainaka ida mai vizita mane riku neʼe, maibé nia lakohi foti ninia bibi no karau rasik atu oho hodi prepara ai-han ba ema neʼebé vizita nia. Duké halo nuneʼe, nia foti fali mane kiak neʼe nia bibi-oan no prepara neʼe hodi fó ba ninia bainaka atu han.”+  Rona tiha neʼe, David sai hirus tebes hasoru mane neʼe no nia dehan ba Natan: “Haʼu jura hodi Jeová, Maromak neʼebé moris,+ mane neʼebé halo nuneʼe merese mate!  Nia tenke selu bibi-malae inan neʼe ba dala haat,+ tanba ninia hahalok neʼe no nia la hatudu laran-sadiʼa.”  Entaun Natan hatete ba David: “Ó mak mane neʼe! Jeová, Izraél nia Maromak, dehan nuneʼe: ‘Haʼu rasik hili* ona ó nuʼudar liurai ba Izraél,+ no haʼu salva ó husi Saul nia liman.+  Haʼu prontu atu fó ó-nia naʼi nia umakain ba ó+ no entrega ó-nia naʼi nia feen sira+ ba ó-nia liman, no haʼu fó ona umakain Izraél no umakain Judá ba ó.+ No se buat hotu neʼe la toʼo, haʼu mós prontu atu halo buat barak tan ba ó.+  Tanbasá mak ó hakribi Jeová nia liafuan hodi halo buat neʼebé aat tuir ninia haree? Ó oho Urias, ema Hetes, ho surik!+ Ó oho tiha nia liuhusi ema Ammon nia surik,+ depois neʼe ó hola ninia feen nuʼudar ó-nia feen.+ 10  Agora surik sei la sai husi ó-nia umakain rasik,+ tanba ó hakribi haʼu hodi hola Urias, ema Hetes, nia feen atu sai nuʼudar ó-nia feen.’ 11  Jeová dehan nuneʼe: ‘Haʼu sei lori susar ba ó husi ó-nia umakain rasik.+ Haʼu sei foti ó-nia feen sira iha ó-nia oin no entrega sira ba mane seluk,*+ no nia sei halo relasaun ho ó-nia feen sira iha ema hotu nia oin.+ 12  Maski ó halo nuneʼe subasubar,+ maibé haʼu sei halo nuneʼe iha ema Izraél hotu nia oin no ema hotu sei haree.’” 13  Nuneʼe David hatete ba Natan: “Haʼu halo ona sala hasoru Jeová.”+ Natan hatán ba David: “Jeová mós fó perdua ba ó-nia sala.*+ Ó sei la mate.+ 14  Maski nuneʼe, tanba ó la hatudu duni respeitu ba Jeová kona-ba ida-neʼe, ó-nia oan-mane neʼebé foin moris sei mate.” 15  Tuirmai Natan fila ba ninia uma rasik. No Jeová halo moras David nia oan neʼebé foin moris mai liuhusi Urias nia feen. 16  David harohan makaʼas ba Maromak loos kona-ba labarik-mane neʼe. David halo jejún makaʼas no kalan-kalan bainhira nia tama ba ninia kuartu, nia toba deʼit iha rai.+ 17  Entaun katuas sira husi ninia umakain hakbesik nia hodi koko dada nia hamriik husi rai, maibé nia lakohi no nia la han hamutuk ho sira. 18  Iha loron hitu labarik neʼe mate, maibé David nia atan sira taʼuk atu fó-hatene ba nia katak labarik neʼe mate ona. Sira hatete: “Bainhira labarik neʼe sei moris hela, ita koʼalia ba liurai, maibé nia la rona ita. Entaun oinsá mak ita bele fó-hatene ba nia katak labarik neʼe mate ona? Karik nia sei halo buat neʼebé aat liután ba nia an.” 19  Bainhira David haree ninia atan sira bisubisu ba malu, nia hatene katak labarik neʼe mate ona. David husu ba ninia atan sira: “Labarik neʼe mate ona ka?” Sira hatán: “Sin, nia mate ona.” 20  Entaun David hamriik husi rai. Nia hariis, kose mina ba nia isin,+ troka ninia roupa, no bá Jeová nia uma+ hodi hakneʼak no hakruʼuk ho oin ba rai. Depois neʼe, nia fila ba ninia palásiu no husu ema atu lori ai-han ba nia, no nia han. 21  David nia atan sira husu nia: “Tanbasá mak Ita-Boot halo hanesan neʼe? Bainhira labarik neʼe sei moris hela, Ita halo jejún no tanis beibeik. Maibé bainhira labarik neʼe mate ona, Ita hamriik kedas no han ai-han.” 22  Nia hatán: “Bainhira labarik neʼe sei moris hela, haʼu halo jejún+ no tanis tanba haʼu hanoin: ‘Sé mak hatene, karik Jeová sei hatudu laran-diʼak mai haʼu no husik labarik neʼe moris.’+ 23  Agora labarik neʼe mate ona, entaun tanbasá mak haʼu tenke halo jejún? Haʼu bele halo nia moris fali ka?+ Haʼu mak sei tama ba rate hamutuk ho nia,+ maibé nia sei la fila fali ba haʼu.”+ 24  Tuirmai David fó kmaan ba ninia feen Bat-Seba.+ Nia bá halo relasaun ho ninia feen. Liutiha tempu balu, ninia feen tuur-ahi oan-mane ida, no oan neʼe hanaran Salomão.*+ Jeová hadomi labarik neʼe,+ 25  no nia haruka lia-menon liuhusi profeta Natan+ atu hanaran labarik neʼe Jedidias,* tanba Jeová hadomi nia. 26  Joab kontinua halo funu hasoru ema Ammon+ nia sidade Rabá,+ no nia manán liurai nia sidade neʼe.+ 27  Entaun Joab haruka lia-menon ba David, hodi dehan: “Haʼu funu hasoru Rabá,+ no haʼu manán ona sidade bee nian.* 28  Agora Ita-Boot tenke halibur tropa restu sira no mai halo funu hasoru sidade neʼe hodi manán sidade neʼe. Se lae, haʼu mak sei manán sidade neʼe, no haʼu sei simu hahiʼi kona-ba neʼe.”* 29  Nuneʼe David halibur tropa hotu no laʼo ba Rabá hodi halo funu no manán sidade neʼe. 30  Tuirmai David foti Malkam* nia koroa husi Malkam nia ulun. Osan-mean iha koroa neʼe todan kilograma 34 ho grama 200,* no iha mós fatuk-murak oioin, no David tau koroa neʼe iha ninia ulun. Nia mós foti sasán barak+ husi sidade neʼe.+ 31  Nia lori sai povu sira husi sidade laran no haruka sira halo serbisu atu fera fatuk, no sira mós halo serbisu hodi uza baliu besi no sasán kroʼat oioin husi besi, no halo bloku.* Neʼe mak buat neʼebé David halo ba ema Ammon nia sidade sira hotu. Ikusmai David no ninia tropa hotu fila fali ba Jeruzalein.

Nota-rodapé

Orj., “fui mina”. Haree “Fui mina” iha Glosáriu.
Ka “ba ó-nia maluk”.
Ka “Jeová husik liu ona ó-nia sala”.
Husi liafuan Ebraiku neʼebé signifika “Dame”.
Naran neʼe katak “Ida neʼebé Jah hadomi”.
Karik neʼe refere ba sidade neʼe nia bee-matan sira.
Orj., “no sidade sei lori haʼu-nia naran”.
Karik neʼe mak estátua husi ema Ammon nia maromak. Haree “Malkam” iha Glosáriu.
Orj., “talentu 1”. Haree Ap. B14.
Neʼe refere ba tijolu neʼebé halo husi duʼut-maran kahur ho tahu ka rai-mean.