Segundu Samuel 10:1-19

  • Manán ema Ammon no Síria (1-19)

10  Liutiha tempu balu, ema Ammon nia liurai+ mate, no ninia oan-mane Hanun mak sai liurai hodi troka nia.+  Ho ida-neʼe, David dehan: “Haʼu sei hatudu domin neʼebé laran-metin ba Nahas nia oan-mane Hanun hanesan ninia aman hatudu ona domin neʼebé laran-metin ba haʼu.” Entaun David haruka ninia atan sira atu fó kmaan ba Hanun tanba ninia aman mate. Maibé bainhira David nia atan sira tama ba ema Ammon nia rai,  ema Ammon nia ulun-naʼin sira dehan ba sira-nia naʼi Hanun: “Ita-Boot hanoin katak David hatudu respeitu ba Ita-nia aman mak nia haruka ema mai atu fó kmaan ba Ita ka? David haruka ninia atan sira atu haree didiʼak no hafuhu sidade neʼe atu bele manán.”  Entaun Hanun kaer David nia atan sira no koi sira-nia hasarahun sorin+ no tesi sira-nia unuk ba rua iha sira-nia kidan okos no haruka sira fila.  Bainhira ema fó-hatene ba David kona-ba neʼe, nia haruka kedas ema atu hasoru sira, tanba mane sira-neʼe sente moe tebes. Liurai hatete ba sira: “Hela lai iha Jerikó+ toʼo imi-nia hasarahun moris fali, depois neʼe imi bele fila.”  Liutiha tempu balu, ema Ammon haree katak sira sai ona hanesan buat dois ba David, entaun ema Ammon selu ema Síria husi Bet-Reob+ no ema Síria husi Zoba,+ hamutuk tropa naʼin-20.000 neʼebé laʼo ain, hodi bele ajuda sira halo funu. Sira mós selu liurai Maaka+ nia tropa hamutuk naʼin-1.000, no mós selu tropa husi Istob* hamutuk naʼin-12.000.+  Bainhira David rona ida-neʼe, nia haruka Joab no tropa hotu, inklui ninia asuwaʼin sira neʼebé kbiit boot liu.+  No ema Ammon sira sai mai no forma hodi sai prontu atu halo funu iha sidade nia portaun oin. Kona-ba ema Síria husi Zoba no husi Reob, hamutuk ho ema Istob* no Maaka, sira sai prontu iha rai-luan.  Bainhira Joab haree katak tropa sira mai daudaun atu ataka nia husi oin no kotuk, nia hili tropa neʼebé diʼak liu iha Izraél no haruka sira forma hodi prontu atu funu hasoru ema Síria.+ 10  Nia entrega tropa sira seluk ba ninia maun Abisai+ atu dirije hodi halo funu hasoru ema Ammon.+ 11  Tuirmai Joab dehan: “Se ema Síria sai forte liu haʼu, entaun ó tenke mai atu salva haʼu. Maibé se ema Ammon mak sai forte liu ó, haʼu sei bá atu salva ó. 12  Ita tenke sai forte no aten-brani+ tanba ita-nia povu no ita-nia Maromak nia sidade sira, no Jeová sei halo buat neʼebé nia hanoin mak diʼak.”+ 13  Tuirmai Joab no ninia tropa sira halai ba oin hodi halo funu hasoru ema Síria, no ema Síria halai husi ninia oin.+ 14  Bainhira ema Ammon haree katak ema Síria halai ona, sira mós halai husi Abisai no tama ba sidade. Depois neʼe, Joab fila husi funu hasoru ema Ammon no toʼo iha Jeruzalein. 15  Bainhira ema Síria haree katak ema Izraél manán ona sira, sira halibur hamutuk fali.+ 16  Entaun Hadadezer+ haruka ema bolu tropa Síria husi área Mota Eufrates,*+ no sira laʼo ba Helam. Sobake, xefe ba Hadadezer nia tropa, mak dirije sira. 17  Bainhira David rona kona-ba neʼe, nia halibur kedas tropa Izraél hotu no hakur Mota Jordaun no toʼo iha Helam. Entaun ema Síria forma hodi sai prontu atu halo funu hasoru David.+ 18  Maibé ema Síria halai husi ema Izraél, no David oho tropa Síria naʼin-700 neʼebé lori kuda-karreta no tropa naʼin-40.000 neʼebé saʼe kuda, no nia mós oho Sobake, xefe tropa nian iha neʼebá.+ 19  Bainhira liurai sira hotu neʼebé serbí Hadadezer haree katak ema Izraél manán ona sira, sira halo kedas dame ho ema Izraél no sai ema Izraél nia atan.+ Ema Síria sai taʼuk atu ajuda tan ema Ammon.

Nota-rodapé

Ka “ema husi Tob”.
Ka “ema husi Tob”.
Orj., “Mota”.