Segundu Korinto 9:1-15

  • Ita-nia motivu atu fó kontribuisaun (1-15)

    • Maromak hadomi ema neʼebé fó ho laran haksolok (7)

9  Tuir loloos, haʼu la presiza hakerek ba imi kona-ba imi-nia serbisu* ba ema santu* sira,+  tanba haʼu hatene katak imi prontu duni atu halo serbisu neʼe, no haʼu gaba imi ba ema Masedónia sira. Haʼu fó-hatene sira katak ba tinan ida ona, imi iha Akaia prontu atu halo serbisu neʼe no imi-nia laran-manas neʼe book ona sira barak.  Maibé haʼu haruka maun-alin sira ba imi, atu nuneʼe imi bele hatudu katak ami gaba imi laʼós saugati deʼit, maibé katak imi prontu duni, hanesan haʼu rasik dehan ona katak imi prontu.  Se lae karik, kuandu ema Masedónia sira bá hamutuk ho haʼu hodi vizita imi no haree katak imi seidauk prontu, ami no mós imi sei hetan moe tanba ami fiar imi.  Tan neʼe mak haʼu hanoin katak haʼu presiza husu maun-alin sira atu bá vizita imi uluk liu ami, atu bele halibur prezente boot neʼebé imi promete ona, hodi nuneʼe imi-nia prezente sei sai prontu no hatudu katak imi fó ho laran-luak, laʼós tanba ami mak obriga.  Maibé kona-ba neʼe, ema neʼebé kari uitoan sei koʼa mós uitoan; no ema neʼebé kari barak sei koʼa mós barak.+  Diʼak atu ema ida-idak fó tuir buat neʼebé nia deside ona iha laran, laʼós ho laran-todan ka obriga an,+ tanba Maromak hadomi ema neʼebé fó ho laran haksolok.+  Liután neʼe, Maromak bele halo ninia laran-diʼak neʼebé boot sai barak liután ba imi, atu nuneʼe imi sempre iha buat hotu neʼebé imi presiza, no imi mós sei iha buat barak hodi halo hahalok diʼak hotu.+  Neʼe hanesan hakerek nanis ona: “Nia fahe buat barak ho laran-luak, no nia fó ona ba ema kiak sira, ninia hahalok loos iha ba nafatin.”+ 10  Maromak neʼebé fó fini barak ba ema neʼebé kari no fó paun ba ema atu han, Nia sei fó fini no aumenta fini barak liután ba imi atu kari no nia mós sei aumenta rezultadu husi imi-nia hahalok loos. 11  Maromak haraik bensaun barak ba imi atu nuneʼe imi mós bele hatudu laran-luak iha dalan oioin, no liuhusi ami-nia serbisu mak imi-nia laran-luak neʼe sei book ema atu fó agradese ba Maromak, 12  tanba serbisu* neʼe laʼós deʼit atu fó buat neʼebé ema santu sira presiza,+ maibé mós atu book ema barak hodi fó agradese ba Maromak. 13  Sira hahiʼi Maromak tanba imi-nia serbisu neʼe fó prova katak imi halo tuir duni liafuan diʼak neʼebé imi fó sai kona-ba Kristu, no mós tanba ho laran-luak imi fó ona kontribuisaun ba sira no ba ema hotu.+ 14  No sira harohan ba Maromak kona-ba imi no sira iha domin ba imi tanba Maromak nia laran-diʼak neʼebé boot liu ba imi. 15  Obrigadu ba Maromak tanba nia fó ona prezente neʼebé boot liu* mai ita, no ita la presiza selu.

Nota-rodapé

Ka “ajuda”.
Ka “serbisu neʼebé lori buat diʼak ba ema seluk”.
Ka “prezente neʼebé furak toʼo labele esplika”.