Segundu Korinto 8:1-24

  • Halibur osan atu ajuda ema Kristaun Judeu sira (1-15)

  • Haruka Tito ba Korinto (16-24)

8  Maun-alin sira, ami hakarak imi atu hatene kona-ba Maromak nia laran-diʼak boot neʼebé nia hatudu ona ba kongregasaun sira iha Masedónia.+  Durante tempu neʼebé sira hasoru terus tanba hetan koko makaʼas, sira sai nakonu ho ksolok no sira-nia situasaun kiak halo sira sai riku ho sira-nia hahalok laran-luak neʼebé boot.*  Sira halo nuneʼe tuir sira-nia kbiit,+ no haʼu fó sasin ho loloos katak sira halo nuneʼe liu fali sira-nia kbiit,+  tanba sira husu ami fila-fila ho hakarak rasik atu sira bele* fó prezente ho laran-diʼak no hola parte iha serbisu atu ajuda ema santu* sira.+  Sira halo liu fali buat neʼebé ami hanoin, tanba primeiru sira entrega sira-nia an rasik ba Naʼi no ba ami tuir Maromak nia hakarak.  Entaun, ami anima Tito+ atu halo hotu serbisu neʼebé nia rasik hahú ona iha imi-nia leet, neʼe mak atu halibur buat neʼebé imi fó ho laran-diʼak.  Tuir loloos, imi fiar metin ona, imi iha kbiit atu koʼalia, imi iha koñesimentu barak, imi hakaʼas an duni iha buat hotu neʼebé imi halo, no imi hadomi malu duni hanesan ami hadomi imi. Imi nakonu ona ho buat sira-neʼe no la falta buat ida. Agora haʼu hein katak imi mós prontu atu fó prezente hanesan neʼe ho laran-diʼak.+  Haʼu koʼalia ida-neʼe laʼós atu fó ukun-fuan ba imi, maibé haʼu hakarak imi atu hatene kona-ba ema seluk nia serbisu makaʼas no atu koko imi se imi iha domin neʼebé loos.  Tanba imi hatene ita-nia Naʼi Jesus Kristu nia laran-diʼak neʼebé boot, katak maski nia riku maibé nia sai kiak ba imi-nia diʼak,+ atu nuneʼe imi bele sai riku liuhusi ninia kiak. 10  Haʼu-nia hanoin mak tuirmai neʼe:+ Serbisu neʼe sei lori buat diʼak ba imi. Tanba tinan ida liubá, imi laʼós deʼit hahú serbisu neʼe maibé imi mós hatudu katak imi hakarak tebes atu halo ida-neʼe. 11  Entaun agora, halo hotu bá buat neʼebé imi hahú ona ho laran-manas hanesan uluk, hodi tuir imi-nia kbiit. 12  Tanba Maromak kontente bainhira ema hakarak fó buat ruma husi laran, hodi tuir buat neʼebé sira iha,+ laʼós tuir buat neʼebé sira la iha. 13  Tanba haʼu lakohi halo fasil ba ema seluk maibé halo susar ba imi. 14  Haʼu-nia hakarak mak buat neʼebé imi iha barak agora bele taka buat neʼebé sira falta, no buat neʼebé sira iha barak bele taka buat neʼebé imi falta, hodi ita hotu bele sai hanesan deʼit. 15  Hanesan hakerek nanis ona: “Ema neʼebé halibur barak la sai resin liu, no ema neʼebé halibur uitoan la falta buat ida.”+ 16  Agora, ami fó agradese ba Maromak katak Tito mós hanoin tebes imi hanesan ami hanoin tebes imi,+ 17  tanba nia simu buat neʼebé ami hatete ba nia, no nia mós hakarak tebes halo buat neʼebé ami husu, tan neʼe ho hakarak rasik nia atu bá vizita imi. 18  Maibé ami mós haruka ita-nia maun-alin ida bá hamutuk ho nia. Ita-nia maun-alin neʼe hetan gaba iha kongregasaun hotu tanba buat neʼebé nia halo ona kona-ba liafuan diʼak. 19  Laʼós neʼe deʼit, kongregasaun mós hili nia atu laʼo hamutuk ho ami atu lori prezente laran-diʼak neʼebé ami sei fahe ba Naʼi nia glória no neʼe mós fó prova katak ami prontu atu ajuda ema seluk. 20  Hodi halo nuneʼe, ami kuidadu atu ema la hetan sala iha ami kona-ba knaar atu fahe kontribuisaun barak neʼebé imi fó.+ 21  Tanba ami ‘tau matan didiʼak ba buat hotu ho laran-moos, laʼós deʼit iha Jeová* nia oin, maibé mós iha ema nia oin’.+ 22  Liután neʼe, ami haruka Ita-nia maun-alin ida hamutuk ho sira. Dala barak ami koko ona ita-nia maun-alin neʼe no nia hatudu ona katak nia badinas iha buat barak, maibé agora nia badinas liután tanba nia fiar tebes imi. 23  Maibé se imi iha pergunta ruma kona-ba Tito, haʼu hakarak fó-hatene imi katak nia mak haʼu-nia maluk serbisu-naʼin no ami halo serbisu hamutuk ba imi-nia diʼak. Se iha pergunta ruma kona-ba ita-nia maun-alin, sira mak apóstolu husi kongregasaun sira no sira mak Kristu nia glória. 24  Tan neʼe, hatudu bá katak imi hadomi sira,+ no hatudu ba kongregasaun sira tanbasá mak ami gaba imi.

Nota-rodapé

Ka “laran-luak neʼebé barak toʼo resin”.
Ka “sira hetan priviléjiu atu”.
Haree Ap. A5.