Segundu Korinto 12:1-21

  • Paulo nia vizaun sira (1-7a)

  • “Ai-tarak” iha Paulo nia isin (7b-10)

  • La kiʼik liu fali apóstolu boot sira (11-13)

  • Paulo hanoin kongregasaun Korinto (14-21)

12  Haʼu tenke gaba an duni. Agora haʼu sei koʼalia kona-ba vizaun sira+ no buat neʼebé Naʼi hatudu sai ba haʼu,+ maski koʼalia kona-ba neʼe la lori buat diʼak ida ba haʼu.  Haʼu hatene mane ida neʼebé ida deʼit ho Kristu. Tinan 14 liubá, Naʼi lori nia ba lalehan terseiru nian, maski neʼe ho ninia isin tomak ka laʼós ho isin tomak, haʼu la hatene, maibé Maromak mak hatene.  Sin, haʼu hatene mane neʼe, maski neʼe ho ninia isin tomak ka laʼós ho isin tomak, haʼu la hatene, maibé Maromak mak hatene.  Naʼi lori nia ba paraízu no nia rona liafuan neʼebé labele temi, no tuir ukun-fuan ema ida labele dehan sai.  Haʼu sei gaba ema hanesan neʼe, maibé haʼu la gaba haʼu-nia an rasik, haʼu gaba deʼit kona-ba haʼu-nia fraku sira.  Maibé, se haʼu hakarak gaba an, haʼu sei la koʼalia hanesan ema beik, tanba haʼu sei koʼalia lia-loos. Maibé, haʼu sei la halo ida-neʼe, atu ema ida labele gaba haʼu liu fali buat neʼebé nia haree iha haʼu ka nia rona husi haʼu.  Ema ida labele hanoin liu kona-ba haʼu tanba vizaun furak sira neʼebé haʼu simu. Haʼu simu ai-tarak iha haʼu-nia isin atu haʼu la sai foti an demais.+ Ai-tarak neʼe hanesan anju ida husi Satanás neʼebé kontinua basa* haʼu, atu nuneʼe haʼu labele sai foti an demais.  Ba dala tolu ona haʼu husu ho laran ba Naʼi kona-ba neʼe, atu bele hasai tiha ai-tarak neʼe husi haʼu.  Maibé nia dehan ba haʼu: “Haʼu-nia laran-diʼak neʼebé boot toʼo ona ba ó, tanba haʼu-nia kbiit sai kompletu kuandu ó fraku.”+ Entaun, haʼu kontente atu gaba an kona-ba haʼu-nia fraku sira, atu nuneʼe Kristu nia kbiit nafatin fó mahon ba haʼu hanesan tenda. 10  Entaun, tanba Kristu mak haʼu haksolok iha haʼu-nia fraku, iha tempu neʼebé ema koʼalia aat haʼu, iha tempu neʼebé haʼu presiza ajuda, iha terus no susar laran. Kuandu haʼu fraku, haʼu iha kbiit.+ 11  Haʼu sai ona hanesan ema beik. Imi mak halo haʼu sai hanesan neʼe, tanba imi la koʼalia kona-ba buat diʼak neʼebé haʼu halo ona. Tanba haʼu la kiʼik liu fali imi-nia apóstolu boot sira iha buat hotu, maski karik haʼu la vale buat ida.+ 12  Tuir loloos, haʼu fó ona prova iha imi-nia leet katak haʼu mak apóstolu ida, hodi tahan buat barak,+ hodi halo milagre, sinál no buat kmanek oioin.+ 13  Tanba oinsá mak imi la simu domin hanesan kongregasaun sira seluk? Tuir loloos, iha buat ida deʼit, neʼe mak haʼu rasik la sai nuʼudar buat todan ba imi.+ Favór ida, fó perdua ba haʼu ho laran-diʼak kona-ba sala neʼe. 14  Agora mak dala terseiru neʼebé haʼu prontu ona atu bá vizita imi, no haʼu sei la hatodan imi. Tanba haʼu la buka imi-nia rikusoin,+ maibé haʼu buka imi. Baibain oan sira+ la rai rikusoin ba sira-nia inan-aman, maibé inan-aman mak rai rikusoin ba oan sira. 15  Kona-ba haʼu, haʼu kontente tebes atu fó buat hotu no fó haʼu-nia an tomak ba imi.+ Se haʼu hadomi imi liután, haʼu tenke simu domin neʼebé kiʼik liu fali ka lae? 16  No maski haʼu la hatodan imi,+ maibé imi dehan katak haʼu “lohi” no haʼu kaer imi “ho lasu”. 17  Haʼu la buka atu simu buat diʼak ruma husi imi liuhusi sira neʼebé haʼu haruka ba imi, loos ka lae? 18  Haʼu husu Tito atu bá vizita imi no haʼu haruka maun-alin ida hamutuk ho nia. Tito la buka atu simu buat diʼak ruma husi imi, loos ka lae?+ Ami laʼo ho hanoin ida deʼit, loos ka lae? Ami laʼo tuir ain-fatin neʼebé hanesan, loos ka lae? 19  Durante neʼe imi hanoin katak ami koʼalia ba imi hodi defende ami-nia an ka? Nuʼudar ema neʼebé ida deʼit ho Kristu, ami koʼalia buat loos iha Maromak nia oin. Maibé maluk doben sira, buat hotu neʼebé ami halo mak atu hametin imi. 20  Tanba haʼu taʼuk katak kuandu haʼu vizita imi, imi-nia hahalok sei la tuir buat neʼebé haʼu hakarak no haʼu-nia hahalok mós la tuir imi-nia hakarak, maibé imi sei istori malu, laran-moras ba malu, hirus malu, buka atu manán deʼit, koʼalia aat malu, konta ema nia vida,* foti an no halo runguranga. 21  Karik, kuandu haʼu toʼo ba imi, haʼu-nia Maromak sei hamoe haʼu iha imi-nia oin, no karik haʼu tenke tanis kona-ba ema barak neʼebé uluk halo sala maibé seidauk arrepende an husi sira-nia hahalok la moos, sala seksuál,* no halo hahalok aat toʼo la sente moe.*

Nota-rodapé

Ka “baku”.
Ka “bisubisu”.
Lian Gregu, porneia. Haree Glosáriu.
Lian Gregu, asélgeia. Haree Glosáriu.