Segundu Korinto 11:1-33

  • Paulo no apóstolu boot sira (1-15)

  • Paulo hetan susar oioin nuʼudar apóstolu (16-33)

11  Haʼu hakarak imi hatudu pasiénsia maski imi hanoin haʼu gaba an uitoan. Maibé tuir loloos, imi hatudu duni pasiénsia ba haʼu!  Tanba haʼu hanoin tebes imi hanesan Maromak hanoin imi,* tanba haʼu rasik fó prenda ona ba imi atu kaben ho laʼen ida, neʼe mak Kristu, no haʼu hakarak imi atu fó imi-nia an ba nia nuʼudar virjen ida.*+  Maibé haʼu taʼuk katak hanesan samea lohi Eva ho ninia matenek,+ ema mós bele hafoʼer imi-nia neon no lori imi dook husi hahalok laran-moos no santu neʼebé imi tenke hatudu ba Kristu.+  Tanba se ema ida mai no haklaken kona-ba Jesus neʼebé la hanesan ho ida neʼebé ami haklaken, ka imi simu espíritu neʼebé la hanesan ho ida neʼebé imi simu ona, ka haklaken liafuan diʼak neʼebé la hanesan ho ida neʼebé imi simu ona,+ imi simu ema neʼe.  Tanba haʼu hanoin katak haʼu la kiʼik liu fali imi-nia apóstolu boot sira iha buat hotu.+  Maski haʼu la hatene koʼalia ho matenek,+ maibé haʼu iha duni koñesimentu. Ami fó sai momoos koñesimentu neʼe ba imi iha situasaun hotu no iha buat hotu.  Haʼu haksolok atu fó sai liafuan diʼak kona-ba Maromak ba imi hodi la simu kolen husi imi,+ no haʼu haraik an atu nuneʼe imi bele simu hahiʼi, neʼe sala ka?  Haʼu simu sasán husi kongregasaun seluk neʼebé ajuda* haʼu atu haʼu bele serbí imi no neʼe hanesan haʼu hadau* buat ruma husi sira.+  Maibé kuandu haʼu hamutuk ho imi no haʼu presiza buat ruma, haʼu la hatodan ema ida, tanba maun-alin sira neʼebé mai husi Masedónia fó buat barak neʼebé haʼu presiza.+ Sin, iha buat hotu haʼu kuidadu atu la hatodan imi no haʼu sei kontinua halo nuneʼe.+ 10  Durante Kristu nia lia-loos sei iha haʼu, la iha buat ida mak bele hanetik haʼu atu sente orgullu+ kona-ba neʼe iha área sira iha Akaia. 11  Tanba razaun saida? Tanba haʼu la hadomi imi ka? Maromak hatene haʼu hadomi imi. 12  Iha ema balu neʼebé gaba an no dehan katak sira bele kaer knaar hanesan ami. Entaun, buat neʼebé haʼu halo ona haʼu sei kontinua halo+ hodi nuneʼe haʼu bele halakon sira-nia razaun atu gaba an. 13  Tanba ema sira hanesan neʼe mak apóstolu falsu, sira lohi ema seluk no finje sai hanesan Kristu nia apóstolu sira.+ 14  Haʼu la hakfodak kona-ba neʼe, tanba Satanás rasik kontinua finje sai hanesan anju naroman nian.+ 15  Tan neʼe mak haʼu la hakfodak kuandu ninia ema sira mós finje sai hanesan serbisu-naʼin ba hahalok loos. Maibé sira-nia rohan sei tuir sira-nia hahalok.+ 16  Haʼu dehan fali: Imi keta hanoin katak haʼu hanesan ema beik. Maibé se ema ida hanoin nuneʼe, entaun simu haʼu bá nuʼudar ema beik, atu nuneʼe haʼu mós bele gaba an uitoan. 17  Buat neʼebé haʼu koʼalia agora laʼós tuir Naʼi nia ezemplu, maibé hanesan ema beik ida, hodi gaba an ho fiar an. 18  Tanba ema barak gaba an tuir isin,* haʼu mós sei gaba an. 19  Tanba imi “matenek” loos, imi simu deʼit sira neʼebé hanesan ema beik. 20  Tuir loloos, imi simu deʼit ema neʼebé halo imi nuʼudar atan, ema neʼebé tolan imi-nia rikusoin, ema neʼebé hadau buat neʼebé imi iha, ema neʼebé foti nia an iha imi-nia leet, no ema neʼebé tuku imi-nia oin. 21  Haʼu koʼalia buat sira-neʼe atu halo moe ami-nia an, tanba neʼe katak ami sai fraku. Maibé se ema seluk aten-brani, haʼu mós bele sai aten-brani, no haʼu koʼalia neʼe hanesan ema beik ida. 22  Sira ema Ebreu ka? Haʼu mós ema Ebreu ida.+ Sira ema Izraél ka? Haʼu mós ema Izraél ida. Sira Abraão nia bei-oan ka? Haʼu mós Abraão nia bei-oan ida.+ 23  Sira Kristu nia serbisu-naʼin ka? Haʼu hatán hanesan ema bulak ida, haʼu Kristu nia serbisu-naʼin neʼebé boot liu: Haʼu halo ona serbisu barak liu,+ dala barak tama komarka,+ hetan baku toʼo labele sura, no mós dala barak besik mate.+ 24  Dala lima ona haʼu hetan tuku hamutuk 39* husi ema Judeu,+ 25  dala tolu ema baku haʼu ho ai-tonka,+ dala ida ema tuda haʼu ho fatuk,+ dala tolu ró neʼebé haʼu saʼe rahun,+ kalan ida no loron ida haʼu iha tasi klaran. 26  Haʼu halo viajen dala barak, haʼu hasoru perigu iha mota, perigu husi naʼok-teen sira, perigu husi haʼu-nia nasaun rasik,+ perigu husi nasaun sira seluk,+ perigu iha sidade,+ perigu iha rai-fuik, perigu iha tasi, no perigu iha maun-alin falsu sira-nia leet. 27  Haʼu halo serbisu makaʼas no hakaʼas an, dala barak la toba iha kalan,+ hamlaha no hamrook,+ dala barak la iha ai-han,+ malirin no roupa uitoan.* 28  Laʼós buat sira-neʼe deʼit, loroloron haʼu mós laran-taridu kona-ba kongregasaun hotu.+ 29  Haʼu sai fraku se ema ida fraku, no haʼu sai laran-nakali se ema ida halo ema seluk sidi. 30  Se haʼu tenke gaba an, haʼu sei gaba an kona-ba buat sira neʼebé hatudu sai haʼu-nia fraku. 31  Naʼi Jesus nia Maromak no Aman, neʼebé sei hetan hahiʼi ba nafatin, nia hatene katak haʼu la bosok. 32  Governadór ida iha sidade Damasku neʼebé iha Liurai Aretas nia okos, hein sidade neʼe atu bele kaer haʼu, 33  maibé maun-alin sira hatún haʼu liuhusi janela iha sidade nia moru hodi uza raga ida+ no haʼu halai husi ninia liman.

Nota-rodapé

Ka “Tanba haʼu laran-moras kona-ba imi hanesan Maromak nia laran-moras”.
Ka “virjen neʼebé iha hahalok moos”.
Ka “apoia”.
Orj., “naʼok”.
Neʼe katak tuir ema baibain nia hanoin.
Orj., “hetan tuku 40 menus ida”.
Orj., “no isin-tanan”.