Primeiru Samuel 3:1-21

  • Samuel sai profeta (1-21)

3  Samuel neʼebé sei kiʼik serbí+ Jeová iha Eli nia oin, maibé iha tempu neʼebá ema ladún rona liafuan husi Jeová, no vizaun+ mós ladún barak.  Loron ida Eli toba hela iha ninia fatin, ninia matan malahuk ona. Nia labele haree.+  Maromak nia ahi-oan+ seidauk hamate, no Samuel toba daudaun iha Jeová nia templu,*+ katak fatin neʼebé tau Maromak nia Arka.  Iha momentu neʼe, Jeová bolu Samuel no nia hatán: “Haʼu mak neʼe.”  Nia halai ba Eli no dehan: “Haʼu mak neʼe, tanba Ita bolu haʼu.” Maibé Eli hatán: “Haʼu la bolu ó. Bá toba fali.” Entaun nia bá toba fali.  Jeová bolu nia dala ida tan: “Samuel!” Ho ida-neʼe, Samuel hadeer no laʼo ba Eli no dehan: “Haʼu mak neʼe, tanba Ita bolu haʼu.” Maibé Eli dehan: “Haʼu la bolu ó, haʼu-nia oan. Bá toba fali.”  Tuir loloos Samuel seidauk hatene didiʼak Jeová, no Jeová seidauk fó sai liafuan ba nia.+  Depois neʼe, Jeová bolu tan ba dala terseiru: “Samuel!” Ho ida-neʼe, Samuel hadeer no laʼo ba Eli no dehan: “Haʼu mak neʼe, tanba Ita bolu haʼu.” Nuneʼe Eli hatene katak Jeová mak bolu labarik-mane neʼe.  Entaun Eli hatete ba Samuel: “Bá toba fali, no se nia bolu ó, ó tenke hatán: ‘Jeová, koʼalia bá, tanba Ita-Boot nia atan rona hela.’” Nuneʼe Samuel fila no toba fali iha ninia fatin. 10  Jeová mai no hamriik iha neʼebá, no nia bolu hanesan uluk: “Samuel, Samuel!” Ho ida-neʼe, Samuel hatán: “Koʼalia bá, tanba Ita-Boot nia atan rona hela.” 11  Jeová hatete ba Samuel: “Haʼu atu halo buat ruma iha Izraél no neʼe sei halo ema hotu neʼebé rona sai hakfodak.*+ 12  Iha loron neʼebá, haʼu sei kumpre buat hotu neʼebé haʼu hatete ba Eli kona-ba ninia umakain, husi hun toʼo rohan.+ 13  Ó tenke hatete ba nia katak haʼu sei fó kastigu ba nafatin ba ninia umakain tanba ninia sala. Nia hatene+ katak ninia oan-mane sira hatete aat Maromak,+ maibé nia la korrije sira.+ 14  Tan neʼe mak haʼu jura ona ba Eli nia umakain katak sakrifísiu ka prezente sira sei labele hamoos sala husi Eli nia umakain.”+ 15  Samuel kontinua toba toʼo dadeer, tuirmai nia hadeer no loke odamatan sira iha Jeová nia uma. Samuel taʼuk atu konta vizaun neʼe ba Eli. 16  Maibé Eli bolu Samuel dehan: “Samuel, haʼu-nia oan!” Nia hatán: “Haʼu mak neʼe.” 17  Eli husu: “Maromak hatete saida ba ó? Favór ida, keta subar neʼe husi haʼu. Maromak sei fó kastigu ba ó no aumenta tan kastigu neʼe se ó subar husi haʼu liafuan ida husi buat neʼebé nia hatete ona ba ó.” 18  Entaun Samuel konta buat hotu ba Eli hodi la subar buat ida. Ho ida-neʼe, Eli dehan: “Neʼe mak husi Jeová. Husik nia halo buat neʼebé diʼak tuir ninia haree.” 19  Samuel kontinua sai boot, no Jeová rasik mak hamutuk ho Samuel+ no halo Samuel nia liafuan hotu sai loos.* 20  Ema Izraél hotu husi Dan toʼo Beer-Seba komesa hatene katak Jeová hili ona Samuel nuʼudar ninia profeta ida. 21  No Jeová kontinua mosu ba Samuel iha Silo. Jeová fó sai ninia hakarak sira ba Samuel liuhusi Jeová nia liafuan.+

Nota-rodapé

Neʼe katak tenda santu.
Ka “no ema neʼebé rona kona-ba neʼe, sira-nia tilun sei sente makili”.
Ka “no la husik Samuel nia liafuan ida monu ba rai”.