Primeiru Samuel 2:1-36

  • Ana nia orasaun (1-11)

  • Eli nia oan-mane naʼin-rua nia sala (12-26)

  • Jeová tesi-lia ba Eli nia umakain (27-36)

2  Tuirmai Ana harohan dehan: “Haʼu-nia laran haksolok tanba Jeová;+Jeová aumenta haʼu-nia kbiit.* Haʼu loke ibun hodi hatán ba haʼu-nia inimigu sira,Tanba haʼu haksolok ho salvasaun husi Ita.   La iha ida neʼebé santu hanesan Jeová,La iha ida seluk, só Ita deʼit,+No la iha fatuk seluk hanesan ami-nia Maromak.+   Keta koʼalia tan ho loko an,Keta husik liafuan foti an sai husi imi-nia ibun,Tanba Jeová mak Maromak koñesimentu nian,+No nia tetu didiʼak ema nia hahalok sira.   Asuwaʼin nia rama harahun tiha ona,Maibé ema neʼebé sidi simu ona kbiit.+   Ema neʼebé bosu tenke buka serbisu atu hetan hahán,Maibé ema neʼebé hamlaha la hamlaha tan.+ Feto neʼebé la iha oan tuur-ahi ona ba oan naʼin-hitu,+Maibé feto neʼebé iha oan-mane barak sai mesamesak deʼit.*   Jeová bele oho, no nia bele salva moris,*Nia bele lori ema tun ba rate,* no nia bele fó moris-hiʼas.+   Jeová bele halo ema sai kiak, no nia bele halo ema sai riku,+Nia bele hatún ema, no nia bele foti saʼe ema.+   Nia hiʼit saʼe ema kiʼik husi rai-rahun,Nia foti ema kiak husi ahi-kadesan butuk,*+Hodi halo sira tuur hamutuk ho ulun-naʼin sira,Fó sira tuur-fatin neʼebé iha glória. Mundu nia hun mak Jeová nian,+No nia tau rai iha sira-nia leten.   Nia proteje ema laran-metin nia hakat sira,+Maibé ema aat sei sai nonook iha rate neʼebé nakukun,+Tanba laʼós ho kbiit mak ema ida manán.+ 10  Jeová sei harahun sira neʼebé funu hasoru nia,*+Nia sei halo rai-tarutu hasoru sira husi lalehan.+ Jeová sei tesi-lia iha mundu tomak,+Nia sei fó kbiit ba ninia liurai+No nia sei aumenta kbiit* ba ema neʼebé nia hili* ona.”+ 11  Tuirmai Elkana fila fali ba ninia uma iha Ramá, maibé labarik-mane neʼe serbí nuʼudar Jeová nia atan+ iha amlulik Eli nia oin. 12  Eli nia oan-mane sira mak ema aat tebes;+ sira la respeitu Jeová. 13  Duké foti deʼit amlulik sira-nia direitu husi sakrifísiu neʼebé povu lori mai, sira halo fali buat tuirmai neʼe:+ Bainhira ema ida hasaʼe sakrifísiu, amlulik nia atan mai ho garfu boot iha ninia liman kuandu naʼan neʼe sei daʼan nakali hela, 14  no nia hatama garfu ba sanan naran deʼit neʼebé uza atu teʼin. No naʼan neʼebé garfu neʼe tuu kona, amlulik sei foti neʼe ba nia an rasik. Neʼe mak buat neʼebé sira halo ba ema Izraél hotu neʼebé bá iha Silo. 15  No mós, antes ema sunu naʼan bokur husi ninia sakrifísiu atu halo suar,+ amlulik nia atan ida mai no dehan ba ema neʼe: “Fó naʼan ba amlulik atu tunu. Nia sei la simu naʼan neʼebé daʼan ona, só naʼan matak deʼit.” 16  Bainhira ema neʼe hatete: “Sunu uluklai naʼan bokur neʼe hodi halo suar,+ tuirmai mak Ita bele foti buat naran deʼit neʼebé Ita hakarak”, amlulik nia atan dehan: “Lae, fó neʼe mai haʼu agora! Se lae, haʼu sei hadau deʼit ida-neʼe!” 17  Nuneʼe, amlulik nia atan sira-nia sala mak boot tebes iha Jeová nia oin,+ tanba mane sira-neʼe la hatudu respeitu ba Jeová nia sakrifísiu. 18  Samuel serbí+ iha Jeová nia oin, no maski nia mak labarik deʼit, nia hatais* efod* husi hena-liñu.+ 19  No mós, ninia inan sempre halo ba nia roupa neʼebé la iha liman, no tinan-tinan ninia inan lori neʼe ba nia bainhira ninia inan-aman saʼe ba Silo atu hasaʼe sakrifísiu tinan nian.+ 20  Eli haraik bensaun ba Elkana no ninia feen, hodi dehan: “Haʼu harohan katak Jeová sei fó oan ida ba ó husi ó-nia feen neʼe atu troka oan neʼebé ó entrega* ona ba Jeová.”+ No sira fila fali ba uma. 21  Jeová hanoin-hetan Ana, nuneʼe Ana sai isin-rua tan,+ no nia iha oan-mane naʼin-tolu no oan-feto naʼin-rua. No Samuel kontinua sai boot iha Jeová nia oin.+ 22  Eli sai katuas loos ona, no nia rona ona kona-ba buat hotu neʼebé ninia oan-mane sira halo+ ba ema Izraél tomak. Nia mós hatene katak sira toba ho feto sira neʼebé serbí iha odamatan ba tenda reuniaun nian.+ 23  Nia dehan beibeik ba sira: “Tanbasá mak imi kontinua halo buat aat sira-neʼe? Buat neʼebé haʼu rona kona-ba imi husi povu tomak neʼe mak aat. 24  Neʼe la diʼak, haʼu-nia oan, liafuan neʼebé haʼu rona husi Jeová nia povu mak la diʼak. 25  Se ema ida halo sala hasoru ema seluk, ema ruma bele husu ba Jeová atu hatudu laran-sadiʼa ba nia.* Maibé se ema ida halo sala hasoru Jeová,+ sé mak bele halo orasaun ba nia?” Maibé sira lakohi rona ba sira-nia aman, tanba Jeová deside ona atu oho sira.+ 26  Kona-ba Samuel, nia kontinua sai boot, no Jeová ho povu neʼe gosta liután nia.+ 27  Maromak nia atan ida bá hasoru Eli no dehan ba nia: “Jeová dehan nuneʼe: ‘Haʼu hatudu momoos ona haʼu-nia an ba ó-nia aman nia umakain bainhira sira hela iha rai-Ejitu nuʼudar atan ba Faraó* nia umakain,+ loos ka lae? 28  No haʼu hili ó-nia aman husi Izraél nia suku hotu+ atu serbí nuʼudar amlulik ba haʼu no hakbesik ba haʼu-nia altár+ hodi hasaʼe sakrifísiu, hasaʼe insensu,* no hatais efod iha haʼu-nia oin. Haʼu entrega ema Izraél nia sakrifísiu hotu neʼebé sunu ho ahi ba ó-nia beiʼala nia umakain.+ 29  Tanbasá mak imi hakribi* haʼu-nia sakrifísiu no prezente neʼebé haʼu haruka ona ema atu hasaʼe iha haʼu-nia hela-fatin?+ Tanbasá mak ó hafolin liu ó-nia oan-mane sira duké haʼu? Tanbasá mak imi halo bokur imi-nia an ho parte diʼak liu hotu husi haʼu-nia povu Izraél nia sakrifísiu sira?+ 30  “‘Tan neʼe mak Jeová, Izraél nia Maromak, dehan nuneʼe: “Uluk haʼu hatete duni katak ó-nia umakain no ó-nia aman nia umakain sei nafatin laʼo iha haʼu-nia oin.”+ Maibé agora Jeová fó sai dehan: “Haʼu sei la husik ida-neʼe akontese, tanba sira neʼebé hatudu respeitu ba haʼu, haʼu sei respeitu sira,+ maibé sira neʼebé hakribi haʼu, haʼu mós sei hakribi sira.” 31  Tempu sei toʼo mai bainhira haʼu hakotu tiha ó-nia kbiit* no kbiit husi ó-nia aman nia umakain, atu nuneʼe la iha mane ida iha ó-nia umakain sei moris toʼo tinan boot.+ 32  No durante tempu neʼebé ema Izraél moris diʼak, ó sei haree inimigu ida iha haʼu-nia hela-fatin,+ no iha ó-nia umakain sei nunka iha tan mane neʼebé tinan boot. 33  Haʼu sei husik hela mane ida husi ó-nia umakain atu serbí iha haʼu-nia altár no nia sei halo ó-nia matan malahuk no sei lori triste ba ó, maibé mane barak husi ó-nia umakain sei mate ho surik.+ 34  Buat neʼebé atu akontese ba ó-nia oan-mane naʼin-rua, Hofni no Fineias, sei sai nuʼudar sinál ba ó: Iha loron ida deʼit sira naʼin-rua sei mate.+ 35  Tuirmai haʼu sei hili fali ba haʼu-nia an rasik amlulik ida neʼebé laran-metin.+ Nia sei halo tuir haʼu-nia hakarak,* no haʼu sei harii ba nia umakain ida neʼebé hela ba nafatin, no nia sei serbí nuʼudar amlulik ba ema neʼebé haʼu hili.* 36  Ema sira neʼebé la mate husi ó-nia umakain sei mai no hakruʼuk ba nia atu husu serbisu hodi bele hetan osan no paun fuan ida, no sira sei dehan: “Favór ida, fó knaar mai haʼu hodi sai nuʼudar amlulik atu haʼu bele han paun rohan ida.”’”+

Nota-rodapé

Ka “Jeová hiʼit aas haʼu-nia dikur”. Haree “Dikur” iha Glosáriu.
Orj., “sai namlaek”.
Ka “halo moris fali”.
Ka karik “foʼer-fatin”.
Ka karik “Sira neʼebé luta hasoru Jeová sei sai taʼuk”.
Orj., “hiʼit aas dikur”.
Orj., “fui mina”. Haree “Fui mina” iha Glosáriu.
Orj., “kesi ho”.
Orj., “fó-empresta”.
Ka karik “Maromak sei sai mediadór ba nia”.
Neʼe mak títulu ba liurai sira iha rai-Ejitu.
Ka karik “atu halo suar husi sakrifísiu sira saʼe ba leten”.
Orj., “tebe”.
Orj., “liman”.
Ka “buat neʼebé iha haʼu-nia fuan no laran”.
Orj., “fui mina”. Haree “Fui mina” iha Glosáriu.