Primeiru Samuel 17:1-58

  • David manán hasoru Golias (1-58)

    • Golias sadik ema Izraél (8-10)

    • David deside atu hasoru Golias (32-37)

    • Luta hodi Jeová nia naran (45-47)

17  Iha loron ida, ema Filístia+ halibur hamutuk sira-nia tropa atu halo funu. Sira halibur iha Soko,+ neʼebé iha rai-Judá, no sira harii tropa nia hela-fatin entre Soko no Azeka,+ iha Efes-Damim.+  Saul no ema Izraél sira halibur hamutuk no harii tropa nia hela-fatin iha Rai-Tetuk Elá,+ no sira prepara an atu halo funu hasoru ema Filístia.  Ema Filístia hamriik iha foho ida no ema Izraél hamriik iha foho seluk, no rai-tetuk mak haketak sira.  Tuirmai asuwaʼin ida sai husi tropa Filístia nia hela-fatin. Ninia naran mak Golias,+ husi Gat,+ no nia aas besik metru tolu.*  Nia tau kapasete husi riti iha nia ulun, no uza roupa funu nian* neʼebé halo hanesan kikit. No ninia roupa funu nian neʼebé halo husi riti,+ todan maizumenus kilograma 57.*  Nia iha riti neʼebé proteje ninia ain no nia mós iha diman badak+ husi riti neʼebé tara iha ninia kotuk.  Nia mós kaer hela diman ida. Diman neʼe nia ai mak boot hanesan ai neʼebé ema uza atu soru,+ no diman nia ulun husi besi todan maizumenus kilograma hitu.* No mane neʼebé lori nia eskudu laʼo uluk iha nia oin.  Tuirmai Golias hamriik no hakilar ba tropa Izraél,+ hodi dehan: “Tanbasá mak imi sai mai hodi forma atu halo funu? Haʼu mak ema Filístia, no imi mak Saul nia atan, loos ka lae? Imi rasik hili mane ida, no husik nia tun mai hodi funu hasoru haʼu.  Se nia bele funu hasoru haʼu no oho haʼu, ami sei sai imi-nia atan. Maibé se haʼu manán nia no oho nia, imi sei sai ami-nia atan no serbí ami.” 10  Tuirmai ema Filístia neʼe dehan: “Agora haʼu sadik tropa Izraél nian.+ Hili mane ida atu kontra haʼu, no husik ami funu toʼok!” 11  Bainhira Saul no ema Izraél hotu rona ema Filístia neʼe nia liafuan, sira sai taʼuk tebes no nakdedar. 12  David mak Jessé nia oan-mane, ema Efrata+ husi Belein+ iha rai-Judá. Jessé+ iha oan-mane naʼin-ualu,+ no iha Saul nia tempu Jessé idade boot ona. 13  Jessé nia oan-mane boot naʼin-tolu laʼo tuir ona Saul hodi bá funu.+ Ninia oan-mane primeiru naran Eliab,+ segundu naran Abinadab,+ no terseiru naran Samá.+ 14  David mak oan-mane ikun,+ no ninia maun boot naʼin-tolu laʼo tuir ona Saul. 15  Nuʼudar David serbí Saul, David bá-mai hodi hein ninia aman nia bibi-malae sira+ iha Belein. 16  Iha tempu neʼebá ema Filístia neʼe hakat ba oin, no nia hamriik iha ninia fatin dadeer-dadeer no kalan-kalan. Nia halo nuneʼe ba loron 40. 17  Tuirmai Jessé hatete ba ninia oan-mane David: “Favór ida, foti trigu* efa isin ida* neʼebé sona ona no foti mós paun fuan sanulu neʼe, no lori lalais ba ó-nia maun sira iha tropa nia hela-fatin. 18  No foti keiju* sanulu neʼe hodi fó ba xefe ba tropa naʼin-1.000. Ó mós tenke haree se ó-nia maun sira diʼak ka lae no lori fali prova katak sira sei moris hela.” 19  David nia maun sira hamutuk hela ho Saul no ema Izraél sira seluk iha Rai-Tetuk Elá,+ no halo funu hasoru ema Filístia.+ 20  Entaun David hadeer sedu iha dadeer no haruka ema seluk tau matan ba bibi-malae sira. Tuirmai nia haloot sasán no bá hodi halo tuir Jessé nia liafuan. Bainhira nia besik tropa nia hela-fatin, tropa sira sai daudaun atu bá funu, no hakilar ho lian funu nian. 21  Ema Izraél no ema Filístia forma hasoru malu atu halo funu. 22  David husik kedas ninia naha ba atan neʼebé tau matan sasán no nia halai ba tropa sira neʼebé forma ona. Bainhira nia toʼo, nia komesa husu ninia maun sira diʼak ka lae.+ 23  Bainhira nia koʼalia hela ho sira, asuwaʼin Filístia nian naran Golias+ husi Gat, sai mai. Nia sai husi tropa Filístia sira-nia leet, no koʼalia liafuan neʼebé hanesan uluk,+ no David rona hela nia. 24  Bainhira tropa Izraél hotu haree mane neʼe, sira halai husi nia ho taʼuk.+ 25  Mane Izraél sira dehan: “Imi haree ona mane neʼebé sai daudaun mai neʼe ka? Nia sai mai atu sadik Izraél.+ Liurai sei fó rikusoin barak ba ema neʼebé oho mane neʼe, liurai sei fó ninia oan-feto rasik nuʼudar feen,+ no ema neʼe nia aman nia umakain la presiza selu impostu no buat seluk ba liurai hanesan ema Izraél seluk halo.” 26  David komesa husu ba mane sira neʼebé hamriik besik nia, hodi dehan: “Mane neʼebé oho ema Filístia neʼebá no hasai tiha Izraél nia moe, nia sei simu kolen saida? Sé mak ema Filístia neʼe, neʼebé la hetan sirkunsizaun* no brani atu sadik Maromak moris nia tropa sira?”+ 27  Ema sira-neʼe konta fali ba David kona-ba buat neʼebé liurai promete ona, hodi dehan: “Mane neʼebé oho nia sei simu kolen hanesan neʼe.” 28  Bainhira ninia maun boot Eliab+ rona nia koʼalia ho ema sira-neʼe, Eliab sai hirus ba David no dehan: “Tanbasá mak ó tun mai iha neʼe? Ó entrega hela bibi sira ba sé iha rai-fuik?+ Haʼu hatene ho momoos katak ó ulun-toos no foti an,* no haʼu hatene ó-nia hanoin aat iha laran. Ó tun mai atu haree deʼit funu neʼe.” 29  Ho ida-neʼe, David hatete: “Haʼu halo sala saida? Haʼu husu deʼit!” 30  Entaun David fila oin husi nia maun hodi husu ba ema seluk pergunta neʼebé hanesan nia husu uluk,+ no ema sira-neʼe fó resposta neʼebé hanesan.+ 31  Ema rona liafuan neʼebé David koʼalia no fó-hatene neʼe ba Saul. Entaun Saul haruka ema atu bolu nia mai. 32  David hatete ba Saul: “Keta husik ema ida lakon aten-brani tanba ema Filístia neʼe. Ita-Boot nia atan neʼe sei bá funu hasoru mane neʼe.”+ 33  Maibé Saul hatete ba David: “Ó la iha kbiit atu funu hasoru ema Filístia neʼe, tanba ó labarik deʼit,+ maibé nia sai ona tropa* husi ninia tempu joven kedas.” 34  Rona tiha neʼe, David hatete ba Saul: “Ita-nia atan neʼe sai nuʼudar bibi-atan ba haʼu-nia aman nia bibi sira, no loron ida, leaun ida+ mai foti bibi-malae ida husi bibi-lubun. No iha tempu seluk, ursu ida mós mai no halo buat neʼebé hanesan. 35  Haʼu duni tuir no oho animál sira-neʼe no salva bibi husi sira-nia ibun. Bainhira sira fila atu ataka haʼu, haʼu kaer sira-nia fulun* no oho sira. 36  Ita-nia atan oho ona leaun no mós ursu. Nuneʼe ema Filístia neʼe, neʼebé la hetan sirkunsizaun, mós sei mate hanesan animál sira-neʼe ida, tanba nia sadik ona Maromak moris nia tropa.”+ 37  David hatutan tan: “Jeová, neʼebé salva haʼu husi leaun no ursu, nia mós sei salva haʼu husi ema Filístia neʼe nia liman.”+ Rona tiha neʼe, Saul hatete ba David: “Bá, Jeová sei hamutuk ho ó.” 38  Entaun Saul tau ninia roupa funu nian ba David. Saul tau kapasete riti ba David nia ulun, depois neʼe, Saul tau roupa funu nian* ba David. 39  Tuirmai David kesi ninia surik no koko atu laʼo maibé nia labele laʼo, tanba nia la toman ho buat sira-neʼe. David hatete ba Saul: “Haʼu labele laʼo ho buat sira-neʼe, tanba haʼu la toman.” Entaun David hasai hotu buat sira-neʼe. 40  Nia foti ninia ai-tonka no hili fatuk kabeer lima husi mota laran no tau neʼe iha ninia pasta. Tuirmai nia kaer tali-baku*+ iha nia liman, no komesa hakbesik ba ema Filístia neʼe. 41  Ema Filístia neʼe mai besik no besik liután ba David, no ninia atan neʼebé lori nia eskudu laʼo iha ninia oin. 42  Bainhira ema Filístia neʼe hateke no haree David, nia oin-buis ba David no odi tanba David mak joven deʼit neʼebé isin kapás* no bonitu.+ 43  Entaun ema Filístia neʼe hatete ba David: “Haʼu neʼe asu ka,+ hodi ó mai kontra haʼu ho ai-tonka?” Depois, ema Filístia neʼe fó-malisan ba David hodi ninia maromak sira. 44  Ema Filístia neʼe dehan ba David: “Mai deʼit sá. Haʼu sei fó ó-nia isin ba manu sira iha lalehan no ba animál fuik sira iha rai-luan atu han.” 45  David hatán ba ema Filístia neʼe: “Ó mai atu kontra haʼu ho surik no diman rua,+ maibé haʼu mai hasoru ó hodi Jeová nia naran, Maromak neʼebé ukun tropa lalehan nian.+ Nia mak Maromak ba Izraél nia tropa sira neʼebé ó sadik ona.+ 46  Loron neʼe duni mak Jeová sei entrega ó ba haʼu-nia liman,+ no haʼu sei oho ó no tesi sai ó-nia ulun. Iha loron neʼe, haʼu sei fó tropa Filístia nia mate-isin ba manu sira iha lalehan no ba animál fuik sira iha rai. No ema hotu iha mundu tomak sei hatene katak iha Maromak ida iha rai-Izraél.+ 47  No ema hotu neʼebé halibur iha neʼe sei hatene katak Jeová la uza surik no diman atu fó salvasaun,+ tanba funu neʼe mak Jeová nian,+ no nia sei entrega imi hotu ba ami-nia liman.”+ 48  Tuirmai ema Filístia neʼe laʼo besik mai David, maibé David halai lalais ba ema Filístia nia tropa sira hodi hasoru Golias.* 49  David hatama nia liman ba ninia pasta laran no foti fatuk ida no tuda fatuk neʼe ho tali-baku. Nia tuda kona ema Filístia neʼe nia reen-toos, no fatuk neʼe tama iha ema Filístia neʼe nia reen-toos no nia monu ho oin ba rai.+ 50  Entaun David manán ema Filístia neʼe ho tali-baku no fatuk ida. David oho ema Filístia neʼe, maski nia la kaer surik ida iha ninia liman.+ 51  David halai no hamriik besik mane neʼe. Tuirmai nia kaer mane Filístia neʼe nia surik+ no losu sai husi surik-fatin no oho duni nia hodi tesi sai ninia ulun. Bainhira ema Filístia haree katak sira-nia asuwaʼin mate ona, sira halai.+ 52  Ho ida-neʼe, ema Izraél no ema Judá hahú hakilar no duni tuir ema Filístia husi rai-tetuk neʼe+ toʼo Ekron nia portaun.+ Sira oho ema Filístia tuir dalan ba Saraim.+ No ema bele haree sira-nia mate-isin toʼo Gat no Ekron. 53  Bainhira ema Izraél remata ona hodi duni tuir ema Filístia, sira fila fali no hadau sasán husi tropa Filístia nia hela-fatin. 54  Tuirmai David lori ema Filístia neʼe nia ulun ba Jeruzalein, maibé nia tau ema Filístia neʼe nia armas iha ninia tenda rasik.+ 55  Iha momentu neʼebé Saul haree David bá hasoru ema Filístia neʼe, nia husu Abner,+ xefe tropa nian, hodi dehan: “Abner, labarik-mane neʼe sé-nia oan?”+ Abner hatán: “Oh liurai, haʼu jura hodi Ita-Boot nia moris, haʼu la hatene!” 56  Liurai dehan: “Ó buka-hatene bá, labarik-mane neʼe mak sé-nia oan.” 57  Bainhira David oho tiha ema Filístia neʼe no fila fali mai, Abner lori nia ba Saul nia oin no David kaer hela ema Filístia neʼe nia ulun.+ 58  Saul husu nia: “Ó-nia aman mak sé?” David hatán: “Haʼu-nia aman mak Ita-Boot nia atan Jessé,+ ema Belein.”+

Nota-rodapé

Orj., “kóvado 6 ho naruk husi liman-fuan boot toʼo liman-fuan kiʼik”. Haree Ap. B14.
Neʼe hanesan roupa husi riti neʼebé taka hirus-matan no kotuk.
Orj., “siklo 5.000”. Haree Ap. B14.
Orj., “siklo 600”.
Ka “sevada”.
Maizumenus 22 L. Haree Ap. B14.
Orj., “susubeen”.
Haree nota iha Núm 14:44.
Ka “funu-naʼin ida”.
Ka “hasan-ruin”. Orj., “hasarahun”.
Neʼe hanesan roupa husi riti neʼebé taka hirus-matan no kotuk.
Orj., “mean”.
Orj., “ema Filístia neʼe”.