Primeiru Samuel 1:1-28

  • Elkana ho ninia feen naʼin-rua (1-8)

  • Ana harohan hodi husu oan-mane (9-18)

  • Samuel moris no entrega ba Jeová (19-28)

1  Iha mane ida husi Ramataim-Zofim*+ iha Efraim nia área foho nian.+ Ninia naran mak Elkana.+ Elkana mak Jeroam nia oan-mane, Eliú nia bei-oan. Eliú mak Tohu nia oan-mane, Zuf nia bei-oan, ema Efraim.*  Elkana iha feen naʼin-rua; ida naran Ana, no ida seluk naran Penina. Penina iha oan, maibé Ana la iha oan.  Tinan-tinan, Elkana laʼo husi ninia sidade hodi saʼe ba Silo+ atu adora* no hasaʼe sakrifísiu ba Jeová neʼebé ukun tropa lalehan nian. Iha neʼebá mak Eli nia oan-mane naʼin-rua, Hofni no Fineias,+ serbí nuʼudar amlulik ba Jeová.+  Loron ida bainhira Elkana hasaʼe sakrifísiu, nia fó parte balu husi ninia sakrifísiu neʼe ba ninia feen Penina no mós ba Penina nia oan-mane no oan-feto sira hotu,+  maibé nia fó parte espesiál ida ba Ana, tanba nia hadomi liu Ana. Maibé Jeová la husik Ana atu iha oan.*  Liután neʼe, Penina* hatún beibeik Ana hodi halo nia laran-kanek tanba Jeová la husik Ana atu iha oan.  Neʼe mak buat neʼebé Penina halo tinan-tinan. Bainhira Ana saʼe ba Jeová nia uma,+ Penina hatún nia makaʼas toʼo nia tanis no lakohi han.  Maibé ninia laʼen Elkana dehan ba nia: “Ana, tanbasá mak ó tanis? Tanbasá mak ó lakohi han? Tanbasá mak ó sai triste tebes? Keta sai triste demais. Haʼu folin-boot liu fali oan-mane naʼin-sanulu ba ó, loos ka lae?”  Tuirmai Ana hamriik bainhira sira han-hemu hotu ona iha Silo. Iha tempu neʼebá, amlulik Eli tuur hela besik odamatan ba Jeová nia templu.*+ 10  Ana sente laran-susar tebes,* no nia komesa halo orasaun ba Jeová+ no tanis la para. 11  Nia halo juramentu ida, hodi dehan: “Oh Jeová neʼebé ukun tropa lalehan nian, se Ita-Boot haree ba Ita-nia atan nia terus no hanoin-hetan Ita-nia atan, no Ita la haluha Ita-nia atan hodi fó oan-mane ida,+ Ita-nia atan sei entrega oan neʼe ba Ita, oh Jeová, atu nuneʼe nia bele serbí Ita iha ninia moris tomak, no lámina ida sei la kona ninia ulun.”+ 12  Bainhira Ana halo orasaun ba tempu kleur iha Jeová nia oin, Eli haree hela nia. 13  Ana halo daudaun orasaun iha ninia laran, só ninia ibun deʼit mak book an, maibé ninia lian la sai. Entaun Eli hanoin katak nia lanu. 14  Eli hatete ba nia: “Toʼo bainhira mak ó sei lanu? Keta hemu tan tua-uvas.” 15  Rona tiha neʼe, Ana hatán: “Lae, haʼu-nia naʼi! Haʼu mak feto neʼebé laran-triste tebes. Haʼu la hemu tua-uvas ka tua seluk, maibé haʼu fakar sai haʼu-nia laran iha Jeová nia oin.+ 16  Keta haree Ita-nia atan hanesan feto folin-laek ida. Haʼu halo orasaun toʼo agora tanba haʼu-nia neon susar no triste.” 17  Tuirmai Eli hatán: “Laʼo ho dame bá. Haʼu hein katak Izraél nia Maromak sei fó buat neʼebé ó husu ona ba nia.”+ 18  Ho ida-neʼe, Ana dehan: “Haʼu hein katak Ita-nia atan neʼe sei simu duni Ita-nia laran-diʼak.” Entaun nia fila no han, no ninia oin la murón tan. 19  Tuirmai sira hadeer sedu iha dadeer no hakruʼuk hodi adora Jeová, depois neʼe, sira fila fali ba sira-nia uma iha Ramá.+ Elkana halo relasaun ho nia feen Ana, no Jeová hanoin-hetan* feto neʼe.+ 20  La toʼo tinan ida,* Ana sai isin-rua no tuur-ahi oan-mane ida no hanaran+ nia Samuel,* tanba Ana hatete: “Haʼu husu oan neʼe husi Jeová.” 21  Liutiha tempu balu, Elkana hamutuk ho ninia família tomak saʼe ba Silo atu hasaʼe sakrifísiu tinan nian ba Jeová+ no fó ninia sakrifísiu juramentu nian. 22  Maibé Ana la bá ho sira,+ tanba nia hatete ba nia laʼen: “Bainhira labarik neʼe haketak ona susu, haʼu sei lori nia bá atu hamriik iha Jeová nia oin, no komesa husi tempu neʼe nia sei hela iha neʼebá ba nafatin.”+ 23  Ninia laʼen Elkana hatete ba nia: “Halo bá tuir buat neʼebé ó hanoin mak diʼak. Hela deʼit iha uma toʼo labarik neʼe haketak ona susu. Haʼu hein katak Jeová sei kumpre buat neʼebé ó hatete ona.” Entaun feto neʼe hela deʼit iha uma no fó-susu ba ninia oan-mane toʼo tempu neʼebé haketak ona susu. 24  Bainhira labarik neʼe haketak ona susu, Ana lori kedas labarik neʼe ba Silo. Nia mós lori karau-aman neʼebé tinan tolu, trigu uut efa isin ida* no tua-uvas buli boot ida,+ no nia bá Jeová nia uma iha Silo+ no lori labarik-mane neʼe hamutuk ho nia. 25  Tuirmai sira oho karau-aman neʼe no lori labarik-mane neʼe ba Eli. 26  Feto neʼe dehan: “Kolisensa, haʼu-nia naʼi! Haʼu koʼalia loloos ba Ita katak,* haʼu mak feto neʼebé uluk hamriik ho Ita iha fatin neʼe atu harohan ba Jeová.+ 27  Uluk haʼu halo orasaun kona-ba labarik-mane neʼe, no Jeová kumpre buat neʼebé haʼu husu ona ba nia.+ 28  Entaun agora, haʼu entrega* nia ba Jeová. Labarik-mane neʼe entrega ona ba Jeová iha ninia moris tomak.” No iha neʼebá nia* hakruʼuk ba Jeová.

Nota-rodapé

Ka “husi Ramá, ema Zuf”.
Elkana hela iha Efraim, maibé nia ema Levi. Haree 1Kr 6:19, 22-28.
Ka “hakruʼuk an”.
Orj., “taka Ana nia oan-fatin”.
Ka “feen seluk”.
Neʼe katak tenda santu.
Ka “Ana sente ninia moris moruk tebes”.
Ka “tau atensaun ba”.
Ka karik “Tuir ninia tempu”.
Naran neʼe katak “Maromak nia naran”.
Maizumenus 22 L. Haree Ap. B14.
Ka “Tebes duni hanesan Ita-Boot moris”.
Orj., “fó-empresta”.
Karik neʼe refere ba Elkana.