Primeiru Reis 7:1-51

  • Salomão nia palásiu (1-12)

  • Hirão ajuda Salomão (13-47)

    • Riin rua neʼebé halo husi riti (15-22)

    • Tanke Tasi neʼebé halo husi riti (23-26)

    • Karrosa sanulu ho tanke sanulu neʼebé halo husi riti (27-39)

  • Sasán oioin husi osan-mean (48-51)

7  Salomão uza tinan 13 atu harii ninia palásiu+ rasik toʼo hotu.+  Salomão harii uma ida neʼebé hanaran Uma Ai-Laran Líbanu+ ho naruk metru 44 ho balu,* luan metru 22* no aas metru 13* no uma neʼe harii iha ai-riin husi ai-sedru nia leten no ninia riin sira-neʼe iha liña haat. Nia tau ai-lolon sira husi ai-sedru+ iha ai-riin sira-neʼe nia leten.  Uma neʼe nia parte leten taka ho ai-sedru no tula iha ai-lolon sira neʼebé iha ai-riin sira-nia leten. Ai-riin* hotu hamutuk 45, no iha liña ida-idak iha ai-riin 15.  Iha janela liña tolu, janela ida-idak iha ninia arus rasik, no janela ida-idak see oin ba janela iha sorin seluk neʼebé mós iha liña tolu.  Odamatan hotu no odamatan nia arus hotu mak kuadradu,* no janela sorin neʼebé see oin ba janela seluk neʼebé iha liña tolu mós iha arus kuadradu.  Salomão harii salaun ida neʼebé hanaran Salaun* Ai-Riin ho naruk metru 22 no luan metru 13. Varanda mak iha uma nia oin, no varanda neʼe iha ai-riin sira no uma-tatiis.  Salomão mós harii salaun ida neʼebé hanaran Salaun* Kadunan,+ neʼe mak fatin neʼebé nia tesi-lia, neʼebé mós hanaran Salaun Tesi-Lia.+ Sira uza ai-sedru hodi halo didin husi rai toʼo uma-kakuluk.  Iha pátiu*+ ida seluk, iha uma* neʼebé Salomão hela bá, no uma neʼe iha Salaun nia kotuk, no neʼe harii iha dalan neʼebé hanesan. Nia mós harii uma ida hanesan Salaun neʼe hodi fó ba Faraó nia oan-feto, neʼebé nia hola nuʼudar feen.+  Uma hotu neʼe harii hodi uza fatuk karun+ neʼebé fera ona tuir ninia medida, no halo kabeer ona iha sorin-sorin hodi uza kadoo fatuk nian. Fatuk sira-neʼe uza atu hada didin hahú husi fundasaun toʼo didin tutun, no nahe iha uma liʼur toʼo pátiu boot.+ 10  No fundasaun neʼe hada ho fatuk sira neʼebé boot tebes no karun. Fatuk balu boot metru 4 ho sentímetru 45,* no fatuk seluk boot metru 3 ho sentímetru 56.* 11  Iha fatuk sira-neʼe nia leten, hada tan fatuk karun sira, fatuk neʼebé fera ona tuir ninia medida, no tau mós ai-sedru. 12  Sira harii moru haleʼu pátiu boot hodi uza fatuk neʼebé fera ona no hada neʼe ba liña tolu no aumenta mós ai-sedru liña ida iha fatuk leten, neʼe hanesan ho moru iha pátiu kiʼik+ iha Jeová nia uma no iha uma neʼe nia varanda.+ 13  Liurai Salomão haruka ema bá hasoru Hirão+ no lori nia mai husi sidade Tiro. 14  Hirão nia inan mak feto-faluk ida husi suku Naftali, no ninia aman mak badaen-riti* husi Tiro.+ Hirão iha esperiénsia barak, iha kbiit atu komprende,+ no matenek atu halo serbisu oioin ho riti. Entaun nia mai hasoru Liurai Salomão no halo serbisu hotu ba liurai. 15  Nia fui riti hodi halo riin rua.+ Riin ida-idak aas metru 8,* no bainhira sukat haleʼu riin ida-idak ho tali,+ tali neʼe nia naruk metru 5 ho balu.* 16  Nia fui riti hodi halo riin nia ulun rua hodi tau iha riin sira-neʼe nia leten. Riin nia ulun sira-neʼe ida-idak aas metru 2 ho sentímetru 22.* 17  Nia enfeita riin nia ulun ho korrente kiʼik neʼebé bobar malu hanesan tali sira,+ modelu hanesan rede, rede hitu ba riin nia ulun ida no rede hitu ba riin nia ulun seluk. 18  No nia halo romaun-fuan liña rua haleʼu rede hodi enfeita riin nia ulun neʼebé iha riin leten. Nia halo hanesan ba riin nia ulun rua. 19  Nia halo riin nia ulun ho modelu hanesan ai-funan líriu neʼebé aas metru 1 ho sentímetru 78* no tau neʼe iha riin leten neʼebé iha varanda nia oin. 20  Iha riin rua nia leten iha riin ulun. Riin ulun neʼebé kabuar liga ho parte neʼebé modelu hanesan rede, no riin ulun ida-idak haleʼu ho romaun-fuan 200 neʼebé tau tuir liña sira.+ 21  Nia harii riin sira-neʼe iha templu* nia varanda.+ Nia harii riin iha liman-loos* no hanaran neʼe Jakin,* tuirmai nia harii riin iha liman-karuk* no hanaran neʼe Boaz.*+ 22  No iha riin sira-nia leten iha modelu hanesan ai-funan líriu. Ho ida-neʼe, nia halo hotu riin sira-neʼe. 23  Tuirmai nia fui riti hodi halo tanke neʼebé hanaran Tasi.*+ Tanke neʼe kabuar, ninia luan husi sorin ida toʼo sorin seluk mak metru 4 ho sentímetru 45, aas metru 2 ho sentímetru 22, no bainhira sukat haleʼu tanke neʼe ho tali, tanke neʼe boot metru 13.+ 24  No iha tanke neʼe nia ibun okos enfeita haleʼu ho ai-fuan kabuar.+ Kada sentímetru 45* iha ai-fuan sanulu, no ai-fuan sira-neʼe haleʼu tanke ho liña rua. Nia fui riti iha ninia fatin hodi halo tanke neʼe ho dezeñu ai-fuan kabuar. 25  Tanke neʼe tula iha karau-aman riti 12+ nia leten, karau 3 hateke ba parte norte, karau 3 hateke ba parte oeste, karau 3 hateke ba parte súl, no karau 3 hateke ba parte leste. Tanke neʼe tula iha karau sira-nia leten, no karau hotu nia ikun see ba klaran. 26  Tanke neʼe nia mahar maizumenus sentímetru 7;* no tanke ibun halo hanesan kopu nia ibun, hanesan ai-funan líriu. Tanke neʼe bele rai bee litru 44.000.* 27  Tuirmai nia halo karrosa* sanulu husi riti.+ Karrosa ida-idak naruk metru 1 ho sentímetru 78, luan metru 1 ho sentímetru 78, no aas metru 1 ho sentímetru 34.* 28  No tuirmai neʼe mak dalan neʼebé nia halo karrosa: Nia halo karrosa nia didin ho riti belar sira neʼebé tau entre riti-lolon sira neʼebé liga malu hanesan kuadradu. 29  Iha karrosa nia didin hotu iha dezeñu leaun,+ karau-aman no kerubín,+ no iha riti-lolon sira iha mós dezeñu neʼebé hanesan. Iha dezeñu renda-renda iha leaun no karau-aman nia leten no kraik. 30  Karrosa ida-idak iha roda haat husi riti no mós eixu* husi riti, no riin neʼebé iha karrosa nia sikun haat halo metin roda no eixu sira. Riin sira-neʼe mós tahan tanke husi okos, no enfeita ho dezeñu renda-renda iha sorin hotu, neʼebé fui hamutuk hodi sai ida deʼit. 31  Tanke neʼe nia ibun iha koroa ida nia laran, husi tanke neʼe nia laran toʼo ninia ibun mak sentímetru 45;* koroa nia leten mak kabuar, no se sura hamutuk ho koroa neʼe, aas sentímetru 67,* no tanke ibun iha dezeñu sira neʼebé bahat ona. No riti belar sira neʼebé taka koroa nia sorin-sorin mak kuadradu, laʼós kabuar. 32  Roda haat iha karrosa nia didin okos, no riin sira neʼebé halo metin roda sira liga ho karrosa, no roda ida-idak aas sentímetru 67. 33  Roda sira halo hanesan kuda-karreta nia roda sira. Riin sira neʼebé hametin roda sira, jante, raiu no roda klaran hotu halo husi besi. 34  Iha karrosa nia sikun haat iha besi-lolon neʼebé tahan karrosa. Besi-lolon sira-neʼe fui hamutuk ho karrosa hodi sai ida deʼit. 35  Iha karrosa nia leten iha koroa kabuar no aas sentímetru 22,* no karrosa hamutuk ho ninia ninin no sorin sira fui hamutuk hodi sai ida deʼit. 36  Iha karrosa nia ninin no sorin sira, nia bahat dezeñu kerubín, leaun no ai-palmeira tuir fatin neʼebé iha, no mós halo dezeñu renda-renda haleʼu sira.+ 37  Neʼe mak dalan neʼebé nia halo karrosa sanulu.+ Nia halo karrosa sira hotu hodi fui iha dalan neʼebé hanesan deʼit,+ boot hanesan no modelu hanesan. 38  Nia halo tanke sanulu husi riti.+ Tanke ida-idak bele rai bee litru 880.* Tanke ida-idak boot metru 1 ho sentímetru 78.* Nia halo tanke ida-idak ba karrosa sanulu neʼe. 39  Tuirmai nia tau karrosa lima iha uma nia sorin loos no karrosa lima tan iha uma nia sorin karuk, no nia tau tanke neʼebé hanaran Tasi iha uma nia sorin loos, iha parte súl.*+ 40  Hirão+ mós halo tanke sira, kanuru boot+ no manko sira.+ Ho ida-neʼe, Hirão remata serbisu hotu neʼebé Liurai Salomão husu nia atu halo iha Jeová nia uma. Sasán neʼebé nia halo mak:+ 41  riin rua+ no riin nia ulun neʼebé kabuar neʼebé iha riin rua nia leten; rede rua+ hodi enfeita riin nia ulun; 42  romaun-fuan 400+ ba rede rua neʼe, romaun-fuan liña rua ba rede ida-idak, atu enfeita riin nia ulun neʼebé kabuar neʼebé iha riin rua nia leten; 43  karrosa sanulu+ no tanke sanulu+ iha karrosa sira-nia leten; 44  tanke neʼebé hanaran Tasi+ no karau-aman riti 12 iha tanke neʼe nia okos; 45  no ahi-kadesan fatin, kanuru boot, manko no sasán seluk hotu. Hirão halo buat sira-neʼe hodi uza riti neʼebé nabilan no fó ba Liurai Salomão atu tau iha Jeová nia uma. 46  Liurai halo buat sira-neʼe hodi fui iha fatin rai-mean nian iha área Mota Jordaun, entre Sukot ho Zaretan. 47  Salomão la tetu sasán sira hotu tanba sasán sira-neʼe barak tebes. Tan neʼe, sira la hatene riti nia todan.+ 48  Salomão halo sasán sira hotu ba Jeová nia uma, hanesan tuirmai neʼe: altár+ husi osan-mean; meza husi osan-mean+ atu tau paun santu; 49  ahi-oan fatin sira+ husi osan-mean neʼebé moos, lima tau iha sorin loos no lima tau iha sorin karuk iha Fatin Santu Liu Hotu* nia oin; no ai-funan sira,+ ahi-oan sira no besi-habit neʼebé halo husi osan-mean;+ 50  basia sira, besi atu hamate ahi,+ manko, kopu+ no ahi-anar fatin,+ buat hotu neʼe halo husi osan-mean neʼebé moos; dobralisa ba odamatan iha kuartu laran liu, katak Fatin Santu Liu Hotu,+ nia mós halo dobralisa ba templu nia odamatan sira,+ no buat hotu halo husi osan-mean. 51  Ho ida-neʼe, Liurai Salomão remata halo serbisu hotu ba Jeová nia uma. Tuirmai Salomão hatama buat sira neʼebé ninia aman David halo santu ona,+ no nia tau osan-mutin, osan-mean no sasán sira ba osan-fatin iha Jeová nia uma.+

Nota-rodapé

Orj., “kóvado 100”. Haree Ap. B14.
Orj., “kóvado 50”.
Orj., “kóvado 30”.
Ka “Ai-lolon”.
Ka “retangulár”.
Ka “Pórtiku”.
Ka “Pórtiku”.
Ka “palásiu”.
Orj., “kóvado 10”.
Orj., “kóvado 8”.
Ka “bronze”. Riti hotu neʼebé temi iha kapítulu neʼe refere ba bronze.
Orj., “kóvado 18”.
Orj., “kóvado 12”.
Orj., “kóvado 5”.
Orj., “kóvado 4”.
Neʼe katak Fatin Santu.
Ka “iha parte súl”.
Naran neʼe katak “Hein katak Nia [Jeová] sei harii metin”.
Ka “iha parte norte”.
Karik naran neʼe katak “Ho forsa”.
Ka “tanke hodi rai bee”.
Orj., “Kada kóvado”.
Orj., “mahar liman-fuan haat nia luan”. Haree Ap. B14.
Orj., “bato 2.000”. Haree Ap. B14.
Ka “karrosa atu tula bee”.
Orj., “kóvado 3”.
Neʼe mak riti-lolon neʼebé liga roda rua hamutuk.
Orj., “kóvado 1”.
Orj., “kóvado 1,5”.
Orj., “kóvado 1/2”.
Orj., “bato 40”.
Orj., “kóvado 4 husi sorin ida toʼo sorin seluk”.
Ka “iha parte sudeste”.
Orj., “kuartu iha laran liu”.