Primeiru Reis 6:1-38

  • Salomão harii templu (1-38)

    • Fatin Santu Liu Hotu (19-22)

    • Kerubín sira (23-28)

    • Bahat dezeñu; halo odamatan sira; pátiu kiʼik (29-36)

    • Uza tinan hitu atu harii templu toʼo hotu (37, 38)

6  Iha tinan haat husi tempu neʼebé Salomão sai liurai ba rai-Izraél, iha fulan-Ziv,*+ neʼe katak fulan-segundu, tinan 480 husi tempu neʼebé ema Izraél sai husi rai-Ejitu,+ Salomão komesa harii Jeová nia uma.*+  Uma neʼebé Liurai Salomão harii ba Jeová, ninia naruk metru 27,* luan metru 9* no aas metru 13.*+  Varanda+ iha templu oin, luan* metru 9, neʼe hanesan ho uma nia luan. Varanda nia luan sukat husi uma oin mak metru 4 ho sentímetru 45.*  Nia halo templu neʼe nia janela sira neʼebé ninia arus boot iha laran no kiʼik iha liʼur.+  Liután neʼe, nia harii uma ida iha templu nia didin sorin no nia halo kuartu sira iha uma neʼe;+ no uma neʼe haleʼu templu nia didin, haleʼu Fatin Santu* no Fatin Santu Liu Hotu.*+  Uma neʼe nia kuartu sira iha andár kraik luan metru 2 ho sentímetru 22,* andár iha klaran luan metru 2 ho balu,* no andár terseiru luan metru 3.* Nia halo kuartu sira-neʼe haleʼu templu no rabat ba templu nia didin, atu nuneʼe la presiza halo kuak iha didin neʼe.+  Templu neʼe harii ho fatuk neʼebé fera tiha ona no prepara ona,+ nuneʼe ema la rona lian husi martelu, baliu no besi bainhira harii templu neʼe.  Odamatan ba kuartu sira iha andár kraik mak iha uma nia sorin parte súl,*+ no atu bá andár klaran tenke saʼe eskada ho modelu nakdulas, hanesan neʼe mós husi andár klaran atu bá andár terseiru.  Salomão kontinua harii templu neʼe no halo hotu,+ no nia taka uma-kakuluk ho ai-lolon husi ai-sedru no ai-kabelak husi ai-sedru.+ 10  Nia harii kuartu sira haleʼu templu neʼe,+ kuartu ida-idak aas metru 2 ho sentímetru 22, no kuartu sira-neʼe liga ba templu neʼe hodi uza ai-sedru. 11  Iha tempu neʼebá Jeová dehan ba Salomão: 12  “Se ó halo tuir haʼu-nia ukun-fuan no kumpre haʼu-nia desizaun no haʼu-nia mandamentu hotu hodi moris tuir buat sira-neʼe,+ haʼu mós sei kumpre haʼu-nia promesa neʼebé haʼu halo ona ho ó-nia aman David+ kona-ba templu neʼebé ó harii daudaun, 13  no haʼu sei hela iha ema Izraél nia leet,+ no haʼu sei la husik haʼu-nia povu Izraél.”+ 14  Salomão kontinua harii templu neʼe toʼo hotu. 15  Nia harii didin iha templu neʼe nia laran ho ai-kabelak husi ai-sedru. Nia taka didin iha laran ho ai-kabelak husi rai toʼo templu nia kakuluk, no nahe templu neʼe nia rai ho ai-kabelak husi ai-juníperu.+ 16  No nia sukat metru 9 husi templu nia parte kotuk, no nia harii kuartu ida hodi uza ai-kabelak husi ai-sedru, husi rai toʼo kakuluk, no nia halo neʼe nuʼudar kuartu laran liu,*+ katak Fatin Santu Liu Hotu.+ 17  No parte*+ iha Fatin Santu Liu Hotu nia oin iha templu laran, ninia naruk metru 18.* 18  Iha dezeñu ai-fuan kabuar+ no ai-funan buras+ neʼebé bahat iha ai-sedru sira iha templu laran. Templu laran tomak taka ho ai-sedru, tan neʼe mak la haree-hetan fatuk ida. 19  Nia prepara Fatin Santu Liu Hotu+ iha templu neʼe hodi tau Jeová nia Arka Aliansa nian.+ 20  Fatin Santu Liu Hotu naruk metru 9, luan metru 9, no aas metru 9;+ no nia taka neʼe tomak ho osan-mean neʼebé moos. Nia taka altár*+ ho ai-sedru. 21  Salomão taka tomak templu nia laran ho osan-mean neʼebé moos,+ no nia dada korrente osan-mean iha Fatin Santu Liu Hotu+ nia oin. Fatin neʼe taka ho osan-mean. 22  Nia taka templu tomak neʼe ho osan-mean. Nia mós taka altár tomak neʼebé besik Fatin Santu Liu Hotu ho osan-mean.+ 23  Iha Fatin Santu Liu Hotu, nia mós halo kerubín rua+ husi ai-piñu,* kerubín ida-idak aas metru 4 ho sentímetru 45.+ 24  Kerubín nia liras ida naruk metru 2 ho sentímetru 22, no liras seluk metru 2 ho sentímetru 22. Husi ninia liras tutun ida toʼo liras tutun seluk naruk metru 4 ho sentímetru 45. 25  Kerubín ida seluk nia liras mós naruk metru 4 ho sentímetru 45. Kerubín rua neʼe boot no modelu hanesan. 26  Kerubín ida aas metru 4 ho sentímetru 45, kerubín ida seluk mós aas hanesan. 27  Tuirmai nia tau kerubín sira-neʼe+ iha Fatin Santu Liu Hotu. Kerubín sira-nia liras loke hela, nuneʼe kerubín nia liras ida kona didin iha sorin ida no kerubín seluk nia liras ida kona didin sorin seluk, no sira-nia liras sorin neʼebé see ba kuartu nia klaran kona malu. 28  No nia taka tomak kerubín sira-neʼe ho osan-mean. 29  No nia bahat dezeñu kerubín,+ ai-palmeira,+ no ai-funan neʼebé buras+ iha templu nia didin hotu neʼebé haleʼu Fatin Santu Liu Hotu no Fatin Santu.* 30  Nia taka tomak templu nia rai ho osan-mean iha Fatin Santu Liu Hotu no Fatin Santu. 31  Iha Fatin Santu Liu Hotu, nia halo odamatan sira husi ai-piñu, nia halo riin iha sorin-sorin, no halo odamatan nia arus, nuʼudar parte númeru lima.* 32  Odamatan tahan rua halo husi ai-piñu, no nia bahat dezeñu kerubín, ai-palmeira, no ai-funan neʼebé buras iha odamatan sira-neʼe, no depois neʼe, nia taka tomak odamatan sira-neʼe ho osan-mean. Nia tuku osan-mean atu taka kerubín no ai-palmeira. 33  Kona-ba odamatan ba templu,* nia mós halo odamatan nia arus sira husi ai-piñu, nuʼudar parte númeru haat.* 34  Nia halo odamatan tahan rua husi ai-juníperu. Odamatan sira-neʼe nia sorin ida-idak iha tahan rua neʼebé lulun hodi bele loke no taka.+ 35  Nia bahat dezeñu kerubín, ai-palmeira, no ai-funan neʼebé buras. Nia taka osan-mean ba dezeñu sira-neʼe. 36  Nia hada fatuk sira ba liña tolu hodi harii moru ba pátiu* kiʼik+ no nia mós aumenta ai-sedru liña ida+ ba moru neʼe. 37  Iha fulan-Ziv* tinan haat,* sira hada hotu ona fundasaun ba Jeová nia uma,+ 38  no iha fulan-Bul,* neʼe katak fulan-ualu tinan 11, sira halo hotu templu neʼe nia parte ida-idak tuir ninia planu.+ Neʼe katak Salomão uza tinan hitu atu harii templu neʼe.

Nota-rodapé

Haree Ap. B8.
Orj., “kóvado 60”. Haree Ap. B14.
Orj., “kóvado 20”.
Orj., “kóvado 30”.
Ka “naruk”.
Orj., “kóvado 10”.
Orj., “templu”.
Orj., “kuartu iha laran liu”.
Orj., “kóvado 5”.
Orj., “kóvado 6”.
Orj., “kóvado 7”.
Orj., “sorin loos”.
Neʼe katak iha uma laran.
Orj., “templu”. Karik neʼe refere ba Fatin Santu neʼebé iha Fatin Santu Liu Hotu nia oin.
Orj., “kóvado 40”.
Neʼe katak altár insensu.
Orj., “ai-hun mina”. Karik neʼe mak ai-piñu alepo.
Orj., “haleʼu iha laran no iha liʼur”.
Karik neʼe refere ba odamatan nia arus ka odamatan nia medida.
Neʼe katak Fatin Santu.
Karik neʼe refere ba odamatan nia arus ka odamatan nia medida.
Neʼe katak tinan haat husi tempu neʼebé Liurai Salomão ukun.