Primeiru Reis 5:1-18

  • Liurai Hirão haruka sasán atu harii templu (1-12)

  • Salomão halibur serbisu-naʼin (13-18)

5  Bainhira Liurai Hirão husi Tiro+ rona katak Salomão sai ona liurai* hodi troka ninia aman nia fatin, Hirão haruka ninia atan sira bá hasoru Salomão, tanba Hirão no David mak belun husi uluk kedas.*+  Salomão haruka ema lori lia-menon ba Hirão,+ hodi dehan:  “Ita-Boot hatene ho didiʼak katak haʼu-nia aman David labele harii uma ida ba ninia Maromak Jeová nia naran, tanba ninia inimigu halo funu kontra nia husi sorin-sorin toʼo Jeová tau ninia inimigu sira-neʼe iha ninia ain okos.+  Maibé agora, Jeová, haʼu-nia Maromak, halo haʼu hela iha dame ho ema iha haʼu-nia sorin-sorin.+ La iha ema ida mak kontra haʼu no la iha buat aat ida mak akontese ba haʼu.+  Tan neʼe, haʼu planu atu harii uma ida ba haʼu-nia Maromak Jeová nia naran, hanesan Jeová promete ona ba haʼu-nia aman David, hodi dehan: ‘Ó-nia oan-mane neʼebé haʼu sei hili atu tuur iha ó-nia kadunan hodi troka ó, nia mak sei harii uma ida ba haʼu-nia naran.’+  Agora, haruka Ita-nia povu tesi ai-sedru husi Líbanu+ atu fó ba haʼu. Haʼu-nia atan sira sei serbisu hamutuk ho Ita-nia atan sira, no haʼu sei selu Ita-nia atan nia kolen tuir folin neʼebé Ita deside, tanba Ita hatene ona katak iha ami-nia leet la iha ema ida mak bele tesi ai hanesan ema Sidon sira.”+  Bainhira Hirão rona Salomão nia liafuan, nia kontente tebetebes no dehan: “Fó hahiʼi ba Jeová, tanba nia hili ona David nia oan-mane neʼebé matenek atu ukun povu barak!”*+  Entaun Hirão haruka lia-menon ba Salomão: “Haʼu rona ona lia-menon neʼebé ó haruka mai haʼu. Haʼu sei halo buat hotu neʼebé ó hakarak hodi fó ai-sedru no ai-juníperu ba ó.+  Haʼu-nia atan sira sei lori ai sira-neʼe tun ba tasi husi Líbanu, no haʼu sei kesi ai sira-neʼe hamutuk hodi haruka liuhusi tasi ba fatin neʼebé ó hili. Haʼu sei kore fali ai sira-neʼe iha neʼebá, no ó bele lori ai sira-neʼe bá. Ó tenke fó ai-han ba haʼu-nia umakain tuir buat neʼebé haʼu husu hodi troka ho ai sira-neʼe.”+ 10  Entaun Hirão kontinua fó ai-sedru no ai-juníperu hotu tuir buat neʼebé Salomão hakarak. 11  No Salomão fó trigu koro isin 20.000* nuʼudar ai-han no mós mina-oliveira neʼebé diʼak liu litru 4.400* ba Hirão nia umakain. Neʼe mak buat neʼebé Salomão fó ba Hirão tinan-tinan.+ 12  Jeová fó matenek ba Salomão, hanesan nia promete ona ba Salomão.+ No iha dame entre Hirão ho Salomão, no sira naʼin-rua halo akordu* ida. 13  Liurai Salomão bolu mane sira husi Izraél tomak atu halo serbisu. Mane sira-neʼe hamutuk naʼin-30.000.+ 14  Fulan-fulan, nia haruka grupu ida ho ema naʼin-10.000 hodi bá Líbanu. Sira serbisu fulan ida iha Líbanu, depois neʼe, fila ba sira-nia uma ba fulan rua. Adonirão+ mak tau matan ba mane sira neʼebé liurai bolu atu halo serbisu. 15  Salomão iha ema sira neʼebé halo serbisu baibain* hamutuk naʼin-70.000 no badaen neʼebé fera fatuk+ iha foho sira hamutuk naʼin-80.000,+ 16  no mós Salomão iha ulun-naʼin 3.300+ neʼebé tau matan ba serbisu-naʼin sira. 17  Hodi tuir liurai nia mandamentu, sira fera fatuk boot, fatuk neʼebé karun,+ atu hada uma nia fundasaun+ hodi uza fatuk neʼebé fera ona.+ 18  Nuneʼe Salomão nia badaen ho Hirão nia badaen, no ema Gebal+ halo serbisu atu fera fatuk, no sira prepara ai no fatuk atu harii uma neʼe.

Nota-rodapé

Ka “ema fui ona mina ba Salomão nia ulun nuʼudar liurai”. Haree “Fui mina” iha Glosáriu.
Ka “tanba Hirão sempre hadomi David”.
Ka “ukun nasaun boot”.
Ka “litru 4.400.000”. Haree Ap. B14.
Orj., “koro 20”.
Ka “aliansa”.
Ka “iha serbisu-naʼin sira neʼebé la iha esperiénsia”.