Primeiru Reis 4:1-34

  • Salomão nia ukun (1-19)

  • Povu moris kontente iha Salomão nia ukun (20-28)

    • Moris seguru iha uvas-hun no ai-figeira hun okos (25)

  • Salomão nia matenek no lia-dadolin sira (29-34)

4  Liurai Salomão ukun rai-Izraél tomak.+  Ninia ema-boot* sira mak tuirmai neʼe: Zadoc+ nia oan-mane Azarias mak amlulik;  Sisa nia oan-mane Elioref no Ahias mak sekretáriu;+ Ahilud nia oan-mane Jeosafát+ mak hakerek-naʼin;  Jeoada nia oan-mane Benaias+ mak xefe tropa nian; Zadoc no Abiatar+ mak amlulik;  Natan+ nia oan-mane Azarias mak tau matan ba ulun-naʼin sira; Natan nia oan-mane Zabud mak amlulik ida no liurai nia belun;+  Ahisar mak tau matan ba liurai nia umakain; no Abda nia oan-mane Adonirão+ mak tau matan ba mane sira neʼebé liurai haruka atu halo serbisu.+  Salomão iha ulun-naʼin hamutuk naʼin-12 neʼebé tau matan ba ema Izraél hotu neʼebé fó ai-han ba liurai no liurai nia umakain. Sira ida-idak iha knaar atu fó ai-han ba fulan ida durante tinan ida nia laran.+  Sira-nia naran mak tuirmai neʼe: Hur nia oan-mane tau matan ba área foho nian iha Efraim;  Deker nia oan-mane tau matan ba Makaz, Saalbim,+ Bet-Semes no Elon-Bet-Hanan; 10  Hesed nia oan-mane tau matan ba Arubote, inklui mós Soko no rai-Hefer tomak; 11  Abinadab nia oan-mane tau matan ba foho-lolon tomak iha sidade Dor. Ikusmai nia kaben ho Salomão nia oan-feto naran Tafate. 12  Ahilud nia oan-mane Baana tau matan ba Taanak, Megido+ no sidade Bet-Sean tomak,+ neʼebé besik Zaretan iha Jezreel nia kraik, husi Bet-Sean toʼo Abel-Mehola toʼo área Jokmeam;+ 13  Geber nia oan-mane tau matan ba Ramot-Gilead,+ inklui mós suku kiʼik husi Manasés nia oan-mane Jair,+ neʼebé iha Gilead;+ nia mós tau matan ba área Argob+ neʼebé iha Basan,+ neʼe katak sidade boot 60 neʼebé moru haleʼu no ninia portaun xave ho besi-lolon husi riti; 14  Ido nia oan-mane Ahinadab tau matan ba Manaim;+ 15  Ahimaz tau matan ba Naftali. Nia hola Salomão nia oan-feto seluk naran Basemat nuʼudar ninia feen. 16  Husai nia oan-mane Baana tau matan ba Aser no Bealot. 17  Parua nia oan-mane Jeosafát tau matan ba Issacar; 18  Ela nia oan-mane Simei,+ tau matan ba Benjamim;+ 19  Uri nia oan-mane Geber tau matan ba rai-Gilead,+ rai neʼebé uluk ema Amoreu nia liurai Sihon+ no mós Liurai Og+ husi Basan mak ukun. Iha mós administradór ida neʼebé tau matan ba administradór sira seluk hotu iha rai neʼe. 20  Ema Judá no Izraél barak tebes toʼo sura labele hanesan rai-henek iha tasi.+ Sira han-hemu no haksolok.+ 21  Salomão ukun rai hotu hahú husi Mota Eufrates*+ toʼo ema Filístia nia rai no toʼo rai-Ejitu nia fronteira. Sira selu impostu* no serbí Salomão durante ninia moris tomak.+ 22  Ai-han loroloron nian ba Salomão nia palásiu mak trigu uut neʼebé diʼak koro isin 30* no trigu uut baibain koro isin 60,* 23  karau bokur husi luhan hamutuk 10, karau husi rai-luan hamutuk 20, bibi-malae 100, no mós bibi-rusa aman, bibi-rusa gazela, bibi-rusa korsu, no manu-kuku neʼebé bokur. 24  Salomão ukun buat hotu iha Mota Eufrates*+ nia sorin neʼe,* husi Tifsa toʼo Gaza,+ inklui liurai hotu neʼebé iha Mota Eufrates nia sorin neʼe, no ninia área hotu no fronteira hotu iha dame.+ 25  Durante Salomão nia moris tomak, ema Judá no Izraél moris ho seguru, sira ida-idak tuur iha sira-nia uvas-hun okos no iha sira-nia ai-figeira hun okos, husi Dan toʼo Beer-Seba. 26  Salomão iha kuda* hamutuk 12.000 no luhan 4.000* ba ninia kuda neʼebé dada kuda-karreta sira.+ 27  Ulun-naʼin sira-neʼe fó ai-han ba Liurai Salomão no ba ema hotu neʼebé han iha Liurai Salomão nia meza. Ulun-naʼin ida-idak iha knaar atu fó ai-han ba fulan ida no tau matan didiʼak hodi labele falta buat ida.+ 28  Ulun-naʼin ida-idak mós halo tuir ninia knaar hodi lori sevada no duʼut-maran ba fatin hotu neʼebé presiza atu fó-han ba kuda no ba kuda sira neʼebé dada kuda-karreta. 29  Maromak fó matenek barak tebes no fó kbiit atu tetu didiʼak ba Salomão no mós fó neon neʼebé komprende buat barak* toʼo sura labele hanesan rai-henek iha tasi-ibun.+ 30  Salomão matenek liu fali ema hotu husi área Leste no Ejitu.+ 31  Nia matenek liu fali mane seluk, matenek liu Zerá nia bei-oan Etan,+ no mós matenek liu Mahol nia oan-mane sira Heman,+ Kalkol+ no Darda. Ninia naran-boot habelar ba nasaun hotu neʼebé haleʼu nia.+ 32  Nia halo* lia-dadolin*+ 3.000 no ninia knananuk+ hamutuk 1.005. 33  Nia bele esplika kona-ba ai-hun sira, husi ai-sedru iha Líbanu toʼo ai-isopu+ neʼebé moris iha moru-lolon. Nia bele esplika kona-ba animál sira,+ manu sira,*+ animál sira neʼebé dolar iha rai*+ no ikan sira. 34  No ema husi nasaun hotu mai hodi rona Salomão nia matenek, inklui mós liurai sira iha mundu tomak neʼebé rona ona kona-ba ninia matenek.+

Nota-rodapé

Ka “ulun-naʼin”.
Orj., “Mota”.
Ka “fó prezente”.
Ka “litru 6.600”. Haree Ap. B14.
Ka “litru 13.200”.
Orj., “Mota”.
Neʼe katak sorin parte leste.
Ka “tropa neʼebé saʼe kuda”.
Númeru neʼe tuir manuskritu balu no mós tuir eskritura seluk neʼebé konta istória neʼe. Maibé manuskritu balu tan dehan 40.000.
Ka “fó laran neʼebé luan”.
Ka “koʼalia”.
Ka “provérbios”.
Ka “kriatura sira neʼebé semo”.
Karik neʼe inklui reptil no insetu.