Primeiru Reis 3:1-28

  • Salomão kaben ho Faraó nia oan-feto (1-3)

  • Jeová mosu ba Salomão liuhusi mehi (4-15)

    • Salomão husu matenek (7-9)

  • Salomão tesi-lia ba inan naʼin-rua (16-28)

3  Salomão halo aliansa kaben nian ho Faraó,* liurai Ejitu. Nia kaben ho Faraó nia oan-feto+ no lori feto neʼe ba David nia Sidade+ toʼo nia harii hotu tiha ninia uma rasik+ no Jeová nia uma,+ no mós moru haleʼu Jeruzalein.+  Maibé povu nafatin hasaʼe sakrifísiu iha fatin aas* sira,+ tanba toʼo tempu neʼe seidauk harii uma ida ba Jeová nia naran.+  Salomão kontinua hadomi Jeová hodi halo tuir ninia aman David nia ukun-fuan, maibé nia hasaʼe sakrifísiu no sunu sakrifísiu iha fatin aas sira.+  Liurai Salomão bá Gibeão atu hasaʼe sakrifísiu iha neʼebá, tanba neʼe mak fatin aas neʼebé importante* liu hotu.+ Salomão hasaʼe animál nuʼudar sakrifísiu sunu nian hamutuk 1.000 iha altár neʼe.+  Bainhira Salomão iha Gibeão, Maromak Jeová mosu ba Salomão liuhusi mehi ida iha kalan, no Maromak dehan: “Husu bá, saida mak ó hakarak haʼu atu fó ba ó.”+  Salomão dehan: “Ita-Boot hatudu ona domin boot ho laran-metin ba haʼu-nia aman David neʼebé mak Ita-nia atan, tanba nia laʼo iha Ita-nia oin ho laran-metin, ho hahalok loos no laran-loos. Ita kontinua hatudu domin boot ho laran-metin ba nia toʼo agora hodi hili ninia oan ida atu tuur iha ninia kadunan.+  Agora oh Jeová, haʼu-nia Maromak, Ita-Boot hili ona Ita-nia atan atu sai liurai hodi troka haʼu-nia aman David, maski haʼu joven* deʼit no la iha esperiénsia.+  No Ita-nia atan ukun Ita-nia povu* neʼebé Ita hili ona,+ povu neʼebé barak tebes toʼo sura labele.  Entaun favór ida, fó ba Ita-nia atan laran neʼebé prontu atu halo tuir Ita hodi bele tesi-lia ba Ita-nia povu,+ atu bele hatene didiʼak saida mak diʼak no aat,+ tanba sé mak bele tesi-lia ba Ita-nia povu neʼebé barak* tebes?” 10  Jeová kontente tanba Salomão husu ida-neʼe.+ 11  Tuirmai Maromak dehan ba Salomão: “Tanba ó husu ida-neʼe no la husu moris naruk, rikusoin, ka atu oho ó-nia inimigu, maibé ó husu deʼit kbiit atu komprende hodi bele rona kazu sira,+ 12  entaun haʼu sei halo tuir buat neʼebé ó husu.+ Haʼu sei fó laran neʼebé matenek no kbiit atu komprende ba ó,+ atu nuneʼe la iha ema ida hanesan ó antes ó, no sei nunka iha ema ida hanesan ó depois ó.+ 13  Liután neʼe, haʼu mós sei fó buat neʼebé ó la husu,+ katak rikusoin no glória,+ atu nuneʼe sei la iha liurai ida mak hanesan ho ó iha ó-nia moris tomak.+ 14  Se ó laʼo iha haʼu-nia dalan sira hodi halo tuir haʼu-nia ukun-fuan no mandamentu sira, hanesan ó-nia aman David halo ona,+ haʼu mós sei fó ó moris naruk.”+ 15  Bainhira Salomão hadeer, nia foin hatene katak nia haree ona vizaun* ida. Tuirmai nia fila ba Jeruzalein no hamriik iha Jeová nia Arka Aliansa nia oin no hasaʼe sakrifísiu sunu nian no sakrifísiu dame nian+ no halo festa ida ba ninia atan sira hotu. 16  Iha tempu neʼebá, feto-aat* naʼin-rua mai hasoru liurai no hamriik iha ninia oin. 17  Feto ida primeiru dehan: “Haʼu-nia naʼi, haʼu ho feto neʼe hela iha uma ida, no haʼu tuur-ahi oan ida bainhira feto neʼe mós sei iha uma laran. 18  Iha loron terseiru depois haʼu tuur-ahi, feto neʼe mós tuur-ahi. Ami naʼin-rua hela hamutuk, ami naʼin-rua deʼit, la iha ema ida mak hamutuk ho ami iha uma laran. 19  Durante kalan, feto neʼe nia oan-mane mate, tanba nia toba hanehan ninia oan. 20  Entaun nia hadeer iha kalan-boot no foti haʼu-nia oan-mane husi haʼu-nia sorin bainhira Ita-nia atan-feto neʼe toba-dukur hela, no nia hatoba fali oan neʼe iha ninia sorin,* no nia tau ninia oan-mane neʼebé mate ona iha haʼu-nia sorin. 21  Bainhira haʼu hadeer iha dadeer-saan atu fó-susu ba haʼu-nia oan-mane, haʼu haree katak nia mate ona. Entaun haʼu haree didiʼak bebé neʼe iha dadeer no hatene katak neʼe laʼós haʼu-nia oan-mane.” 22  Maibé feto ida seluk dehan: “Lae, haʼu-nia oan-mane mak ida neʼebé moris hela, ó-nia oan-mane mak ida neʼebé mate ona!” Maibé feto ida primeiru dehan: “Lae, ó-nia oan-mane mak ida neʼebé mate ona, haʼu-nia oan-mane mak ida neʼebé moris hela!” Sira haksesuk malu hanesan neʼe iha liurai nia oin. 23  Ikusmai liurai dehan: “Feto neʼe dehan: ‘Haʼu-nia oan-mane mak ida neʼebé moris hela, ó-nia oan-mane mak ida neʼebé mate ona!’ no feto ida fali dehan: ‘Lae, ó-nia oan-mane mak ida neʼebé mate ona, haʼu-nia oan-mane mak ida neʼebé moris hela!’” 24  Liurai dehan: “Lori surik mai haʼu.” Entaun sira lori surik ba liurai. 25  Tuirmai liurai dehan: “Fera bebé neʼebé moris neʼe ba rua, fó isin sorin ba feto neʼe no isin sorin ba feto seluk.” 26  Feto neʼebé ninia oan-mane moris hela husu kedas ba liurai, tanba nia hanoin tebes ninia oan-mane neʼe. Nia dehan: “Favór ida, haʼu-nia naʼi! Fó deʼit ona bebé neʼebé moris neʼe ba nia! Keta oho bebé neʼe!” Maibé feto ida seluk dehan: “Haʼu no ó sei la hetan bebé neʼe! Husik sira fera bebé neʼe ba rua!” 27  Rona tiha neʼe, liurai dehan: “Fó bebé neʼebé moris ba feto primeiru neʼe! Keta oho bebé neʼe, tanba ninia inan mak feto neʼe.” 28  Ema Izraél hotu rona kona-ba liurai nia desizaun neʼe, no sira hotu hakfodak* ho liurai,+ tanba sira haree katak Maromak haraik ninia matenek ba liurai atu tesi-lia tuir justisa.+

Nota-rodapé

Neʼe mak títulu ba liurai sira iha rai-Ejitu.
Orj., “boot”.
Ka “labarik kiʼik”.
Ka “Ita-nia atan iha Ita-nia povu nia leet”.
Ka karik “ulun-toos; susar”. Orj., “todan”.
Ka “mehi”.
Ka “prostituta”.
Orj., “ninia hirus-matan”.
Orj., “taʼuk”.