Primeiru Reis 22:1-53

  • Jeosafát apoia Acab (1-12)

  • Micaias fó-hatene nanis katak Acab sei lakon funu (13-28)

    • Anju ida atu lohi Acab (21, 22)

  • Acab mate iha Ramot-Gilead (29-40)

  • Jeosafát nia ukun ba rai-Judá (41-50)

  • Acazias sai liurai Izraél (51-53)

22  Durante tinan tolu la mosu funu entre ema Síria no ema Izraél.  Iha tinan terseiru, Liurai Jeosafát+ husi rai-Judá bá hasoru liurai Izraél.+  Tuirmai liurai Izraél hatete ba ninia atan sira: “Imi hatene katak Ramot-Gilead+ mak ita-nian. Maski nuneʼe, ita dada an atu foti fali sidade neʼe husi liurai Síria.”  Tuirmai nia husu ba Jeosafát: “Ó bele bá hamutuk ho haʼu hodi halo funu iha Ramot-Gilead ka lae?” Jeosafát hatán ba liurai Izraél: “Ita-Boot ho haʼu mak ida deʼit. Ita-nia povu ho haʼu-nia povu mak ida deʼit. Haʼu-nia kuda mós Ita-nia kuda.”+  Maibé Jeosafát hatete ba liurai Izraél: “Favór ida, husu uluk+ Jeová nia matadalan kona-ba neʼe.”+  Entaun liurai Izraél halibur profeta maizumenus naʼin-400, no husu ba sira: “Haʼu bele bá halo funu hasoru Ramot-Gilead ka labele?” Sira hatán: “Bá deʼit, Jeová sei entrega sidade neʼe ba liurai nia liman.”  Tuirmai Jeosafát dehan: “Iha rai neʼe, sei iha Jeová nia profeta ka lae? Mai ita husu nia.”+  Liurai Izraél hatete ba Jeosafát: “Sei iha mane ida tan neʼebé Ita bele husu kona-ba Jeová nia hanoin,+ maibé haʼu odi nia,+ tanba nia nunka fó sai profesia neʼebé diʼak kona-ba haʼu, só aat deʼit.+ Nia mak Imla nia oan-mane Micaias.” Maibé Jeosafát hatete: “Liurai labele koʼalia hanesan neʼe.”  Entaun liurai Izraél bolu ema-boot ida neʼebé serbisu iha palásiu no dehan: “Lori Imla nia oan-mane Micaias mai lalais.”+ 10  Iha tempu neʼe liurai Izraél no Jeosafát, liurai husi Judá, tuur hela iha sira ida-idak nia kadunan, sira hatais roupa liurai nian, sira tuur iha fatin sama trigu nian besik sidade Samaria nia portaun, no profeta hotu koʼalia sai liafuan iha sira-nia oin.+ 11  Tuirmai Kenana nia oan-mane Zedequias halo dikur sira husi besi no dehan: “Jeová dehan nuneʼe: ‘Ho dikur sira-neʼe mak Ita sei tuku* ema Síria toʼo halakon sira hotu.’” 12  Profeta sira seluk hotu fó sai liafuan neʼebé hanesan, hodi dehan: “Saʼe ba Ramot-Gilead no Ita-Boot sei hetan susesu. Jeová sei entrega sidade neʼe ba liurai nia liman.” 13  Entaun ema neʼebé liurai haruka atu bolu Micaias hatete ba Micaias: “Profeta hotu koʼalia diʼak deʼit ba liurai. Favór ida, koʼalia liafuan neʼebé hanesan sira-nian, no koʼalia liafuan neʼebé diʼak.”+ 14  Maibé Micaias hatete: “Haʼu jura hodi Jeová, Maromak neʼebé moris, katak haʼu sei koʼalia deʼit liafuan hotu neʼebé Jeová fó sai ba haʼu.” 15  Tuirmai Micaias bá hasoru liurai, no liurai husu nia: “Micaias, ami bele bá halo funu hasoru Ramot-Gilead ka lae?” Micaias hatán kedas: “Bá deʼit, Ita-Boot sei hetan susesu, Jeová sei entrega sidade neʼe ba liurai nia liman.” 16  Rona tiha neʼe, liurai dehan ba nia: “Dala hira tan mak haʼu tenke haruka ó atu jura hodi Jeová nia naran atu koʼalia deʼit buat loos ba haʼu?” 17  Entaun nia dehan: “Haʼu haree ema Izraél hotu halai namkari iha foho sira,+ hanesan bibi neʼebé bibi-atan la iha. Jeová hatete ona: ‘Sira la iha naʼin. Husik sira ida-idak fila fali ba sira-nia uma ho dame.’” 18  Tuirmai liurai Izraél hatete ba Jeosafát: “Haʼu dehan ona ba ó: ‘Nia nunka fó sai profesia neʼebé diʼak kona-ba haʼu, só aat deʼit.’”+ 19  Entaun Micaias dehan: “Tan neʼe, rona Jeová nia liafuan bá. Haʼu haree Jeová tuur iha ninia kadunan+ no tropa lalehan nian hotu hamriik besik nia iha ninia sorin loos no sorin karuk.+ 20  No Jeová hatete: ‘Sé mak sei lohi Acab atu nuneʼe nia bele bá no mate iha Ramot-Gilead?’ Anju ida dehan buat ida no anju seluk dehan buat seluk. 21  Tuirmai anju* ida+ hakat ba oin no hamriik iha Jeová nia oin, hodi dehan: ‘Haʼu mak sei lohi nia.’ Jeová husu nia: ‘Oinsá mak ó sei lohi nia?’ 22  Nia hatán: ‘Haʼu sei bá tau lia-bosok iha ninia profeta hotu nia ibun.’*+ Maromak dehan: ‘Ó sei lohi duni nia, liután neʼe, ó sei hetan susesu. Bá, halo tuir ó-nia liafuan.’ 23  Agora Jeová tau ona lia-bosok* iha profeta sira-neʼe hotu nia ibun,+ maibé Jeová fó sai ona katak ó sei hetan susar.”+ 24  Entaun Kenana nia oan-mane Zedequias hakbesik no basa Micaias nia hasan, no dehan: “Jeová nia espíritu husik tiha haʼu hodi koʼalia fali ho ó ka?”+ 25  Micaias hatán: “Ó sei hatene kona-ba neʼe iha loron neʼebé ó tama ba fatin segredu iha uma laran atu subar.” 26  Tuirmai liurai Izraél dehan: “Lori Micaias no entrega ba Amon, xefe ba sidade neʼe, no ba liurai nia oan-mane Joas. 27  Hatete ba sira: ‘Liurai hatete nuneʼe: “Hatama mane neʼe ba komarka+ no fó paun ho bee uitoan deʼit ba nia toʼo haʼu fila fali mai ho dame.”’” 28  Maibé Micaias dehan: “Se Ita-Boot fila fali mai ho dame, neʼe katak Jeová la koʼalia ho haʼu.”+ Nia hatutan tan: “Oh imi povu hotu, hanoin-hetan haʼu-nia liafuan.” 29  Nuneʼe liurai Izraél no Jeosafát, liurai Judá, saʼe ba Ramot-Gilead.+ 30  Liurai Izraél hatete ba Jeosafát: “Haʼu sei uza roupa neʼebé halo ema la koñese haʼu no bá halo funu, maibé ó tenke hatais ó-nia roupa liurai nian.” Entaun liurai Izraél uza roupa neʼebé halo ema la koñese nia+ no nia bá halo funu. 31  Iha tempu neʼebá, liurai Síria hatete ona ba ninia komandante naʼin-32, neʼebé dirije kuda-karreta funu nian,+ hodi dehan: “Keta halo funu ho ema seluk maski xefe ka tropa baibain, imi tenke ataka deʼit liurai Izraél.” 32  Bainhira komandante sira-neʼe haree Jeosafát, sira hatete ba malu: “Nia mak liurai Izraél.” Entaun sira fila hodi ataka Jeosafát, no nia komesa hakilar atu husu ajuda. 33  Bainhira komandante sira-neʼe haree katak nia laʼós liurai Izraél, sira para kedas no la duni tuir tan nia. 34  Mane ida hana ninia rama, maibé rama-oan neʼe kona liurai Izraél nia isin neʼebé la taka ho roupa funu nian. Entaun liurai hatete ba tropa neʼebé lori liurai nia kuda-karreta: “Fila fali no lori haʼu sai husi funu neʼe, tanba haʼu kanek todan.”+ 35  Funu sai makaʼas liu iha loron neʼe, no tropa sira tenke ajuda liurai atu hamriik nafatin iha ninia kuda-karreta no ninia oin hateke ba ema Síria. Liurai nia raan fakar iha kuda-karreta laran, no nia mate iha kalan.+ 36  Iha tempu neʼebé loro-matan monu ona, tropa sira komesa hakilar: “Mai ita hotu fila fali ba ita-nia sidade rasik! Fila fali ba ita-nia rai rasik!”+ 37  Nuneʼe mak liurai Izraél mate, no ema lori nia ba Samaria. Sira hakoi liurai iha Samaria. 38  Bainhira sira fase kuda-karreta funu nian neʼe iha kolan iha Samaria, asu sira lambe ninia raan no feto-aat* sira mós hariis iha neʼebá,* neʼe kumpre liafuan neʼebé Jeová fó sai ona.+ 39  Kona-ba Acab nia istória sira seluk, no kona-ba buat hotu neʼebé nia halo no palásiu neʼebé nia harii ho marfín+ no sidade hotu neʼebé nia harii, neʼe hakerek ona iha livru istória kona-ba Izraél nia liurai sira. 40  Ikusmai Acab mate,*+ no ninia oan-mane Acazias+ mak sai liurai hodi troka nia. 41  Iha tinan haat husi Liurai Acab nia ukun iha Izraél, Asa nia oan-mane Jeosafát+ sai liurai iha Judá. 42  Jeosafát tinan 35 bainhira nia sai liurai, no nia ukun iha Jeruzalein durante tinan 25. Ninia inan naran Azuba, Sili nia oan-feto. 43  Jeosafát kontinua laʼo tuir ninia aman Asa nia dalan hotu.+ Nia la hasees an husi dalan sira-neʼe, no nia halo buat neʼebé loos tuir Jeová nia haree.+ Maibé, fatin aas sira iha nafatin, no povu kontinua hasaʼe sakrifísiu no sunu sakrifísiu hodi halo suar iha fatin sira-neʼe.+ 44  Jeosafát kontinua iha dame ho liurai Izraél.+ 45  Kona-ba Jeosafát nia istória sira seluk, no kona-ba ninia kbiit boot no oinsá nia halo funu, neʼe hakerek ona iha livru istória kona-ba Judá nia liurai sira. 46  Nia mós halakon mane sira neʼebé faʼan an* iha templu,+ sira neʼebé ninia aman Asa la halakon hotu husi rai neʼe.+ 47  Iha tempu neʼebá la iha liurai iha Edom,+ maibé administradór distritu nian ida mak halaʼo knaar hanesan liurai.+ 48  Jeosafát mós halo ró Tarsis* hodi bá Ofir atu foti osan-mean,+ maibé ró sira-neʼe la bá tanba sai aat iha Ezion-Geber.+ 49  Iha tempu neʼebá mak Acab nia oan-mane Acazias dehan ba Jeosafát: “Favór ida, husik haʼu-nia atan sira saʼe ró hamutuk ho ó-nia atan sira”, maibé Jeosafát lakohi. 50  Ikusmai Jeosafát mate*+ no sira hakoi nia hamutuk ho ninia beiʼala sira iha ninia beiʼala David nia Sidade, no ninia oan-mane Jeorão+ mak sai liurai hodi troka nia. 51  Iha tinan 17 husi Liurai Jeosafát nia ukun iha rai-Judá, Acab nia oan-mane Acazias+ sai liurai hodi ukun Izraél iha Samaria, no nia ukun Izraél ba tinan rua. 52  Nia kontinua halo buat neʼebé aat tuir Jeová nia haree no laʼo tuir ninia inan-aman nia dalan.+ Nia mós laʼo tuir Nebat nia oan-mane Jeroboão nia dalan neʼebé dada ema Izraél monu ba sala.+ 53  Nia kontinua serbí no hakruʼuk ba Baal,+ no kontinua hakanek Jeová, Izraél nia Maromak,+ nia laran hanesan ninia aman mós halo ona.

Nota-rodapé

Ka “dudu”.
Orj., “espíritu”. Haree “Ruah” iha Glosáriu.
Orj., “Haʼu sei bá no sai espíritu bosok iha ninia profeta hotu nia ibun”.
Orj., “Jeová tau ona espíritu bosok”.
Ka “prostituta”.
Ka karik “iha fatin neʼebé feto-aat sira hariis bá mak asu sira lambe ninia raan”.
Orj., “latan hamutuk ho ninia beiʼala sira”.
Ka “halakon prostitutu sira”. Neʼe katak mane neʼebé halo prostituisaun neʼebé liga ho adorasaun falsu.
Orj., “latan hamutuk ho ninia beiʼala sira”.