Primeiru Reis 21:1-29

  • Acab hakarak foti Nabot nia toʼos-uvas (1-4)

  • Jezabel halo planu aat atu oho Nabot (5-16)

  • Elias nia lia-menon ba Acab (17-26)

  • Acab haraik an (27-29)

21  Liutiha buat sira-neʼe, problema ida mosu kona-ba Nabot ema Jezreel nia toʼos-uvas, toʼos neʼe iha Jezreel+ iha Liurai Acab husi Samaria nia palásiu sorin.  Acab hatete ba Nabot: “Fó ó-nia toʼos-uvas ba haʼu atu haʼu bele kuda modo, tanba neʼe besik haʼu-nia uma. Tuirmai haʼu sei fó fali toʼos-uvas neʼebé diʼak liu hodi troka toʼos neʼe. Ka se ó hakarak, haʼu bele fó osan ba ó tuir toʼos neʼe nia folin.”  Maibé Nabot hatete ba Acab: “Tuir Jeová nia haree, haʼu labele duni atu fó ba Ita liman-rohan husi haʼu-nia beiʼala sira.”+  Ho ida-neʼe, Acab fila ba ninia palásiu ho oin triste no murón tanba buat neʼebé Nabot ema Jezreel hatán ba nia, hodi dehan: “Haʼu labele fó ba Ita liman-rohan husi haʼu-nia beiʼala sira.” Tuirmai Acab toba iha ninia kama, nia hateke deʼit ba didin, no lakohi han.  Ninia feen Jezabel+ tama mai haree nia no husu: “Tanbasá mak ó* triste loos toʼo lakohi han?”  Nia hatán ba Jezabel: “Neʼe tanba haʼu hatete ba Nabot ema Jezreel: ‘Fó ó-nia toʼos-uvas mai haʼu atu haʼu sosa. Ka se ó hakarak, haʼu fó toʼos-uvas seluk ba ó hodi troka toʼos neʼe.’ Maibé nia dehan: ‘Haʼu sei la fó haʼu-nia toʼos-uvas ba Ita.’”  Ninia feen Jezabel hatete ba nia: “Ó mak ukun nuʼudar liurai ba Izraél, loos ka lae? Entaun, hadeer ona hodi han buat ruma, no halo ó-nia laran kontente. Haʼu sei fó Nabot ema Jezreel nia toʼos-uvas ba ó.”+  Ho ida-neʼe, Jezabel hakerek karta sira hodi Acab nia naran no taka ho Acab nia selus*+ no haruka karta sira-neʼe ba katuas+ no ema-boot sira neʼebé hela iha Nabot nia sidade.  Jezabel hakerek karta sira neʼebé dehan: “Fó avizu kona-ba tempu jejún, no haruka Nabot tuur iha povu sira-nia oin. 10  Haruka mane folin-laek naʼin-rua atu tuur iha ninia oin no fó sasin kontra nia,+ hodi dehan: ‘Ó koʼalia aat Maromak no liurai!’+ Tuirmai lori nia ba sidade nia liʼur no tuda nia toʼo mate.”+ 11  Nuneʼe, katuas no ema-boot sira neʼebé hela iha Nabot nia sidade halo tuir liafuan iha karta neʼebé Jezabel haruka ba sira. 12  Sira fó avizu kona-ba tempu jejún, no haruka Nabot tuur iha povu sira-nia oin. 13  Tuirmai mane folin-laek naʼin-rua mai no tuur iha Nabot nia oin no komesa fó sasin kontra Nabot iha povu nia oin, hodi dehan: “Nabot koʼalia aat Maromak no liurai!”+ Depois neʼe, sira lori nia ba sidade nia liʼur no tuda nia toʼo mate.+ 14  Sira haruka ema fó-hatene ba Jezabel, hodi dehan: “Ami tuda mate ona Nabot.”+ 15  Bainhira Jezabel rona katak sira tuda mate ona Nabot, Jezabel dehan kedas ba Acab: “Bá, foti Nabot ema Jezreel nia toʼos nuʼudar ó-nian,+ katak toʼos neʼebé Nabot lakohi fó ba ó atu sosa, tanba nia la iha, nia mate ona.” 16  Bainhira Acab rona katak Nabot mate ona, nia hamriik kedas hodi tun ba Nabot ema Jezreel nia toʼos-uvas hodi foti toʼos neʼe nuʼudar ninian. 17  Maibé Jeová dehan ba Elias+ ema Tisbe: 18  “Hamriik bá, bá hasoru Acab, liurai Izraél, neʼebé iha Samaria.+ Agora nia iha Nabot nia toʼos-uvas. Nia tun ona bá neʼebá atu foti toʼos neʼe nuʼudar ninian. 19  Ó tenke hatete ba nia: ‘Jeová dehan nuneʼe: “Ó oho ona mane ida+ no foti mós ninia rai ka?”’+ Tuirmai hatete tan ba nia: ‘Jeová dehan nuneʼe: “Iha fatin neʼebé asu sira lambe Nabot nia raan, iha fatin neʼe mós asu sei lambe ó-nia raan.”’”+ 20  Acab hatete ba Elias: “Oh haʼu-nia inimigu, ó buka-hetan ona haʼu!”+ Elias hatán: “Haʼu hetan ona ó. ‘Tanba ó hakarak nafatin* atu halo buat neʼebé aat tuir Jeová nia haree,+ 21  haʼu sei lori susar ba ó, no haʼu sei halakon ó no halakon mane hotu* husi Acab nia umakain,+ inklui mós ema neʼebé kbiit-laek no fraku iha Izraél.+ 22  No haʼu sei halo ó-nia umakain sai hanesan Nebat nia oan-mane Jeroboão nia umakain+ no hanesan Ahias nia oan-mane Baasa nia umakain,+ tanba ó provoka ona haʼu hodi sai hirus no ó lori ema Izraél monu ba sala.’ 23  Kona-ba Jezabel, Jeová dehan: ‘Asu sei han Jezabel nia isin iha toʼos ida iha Jezreel.+ 24  Asu sei han Acab nia jerasaun neʼebé mate iha sidade, no manu neʼebé semo iha lalehan sei han sira neʼebé mate iha rai-luan.+ 25  Toʼo agora la iha ema ida mak hanesan Acab+ neʼebé hakarak nafatin* atu halo buat neʼebé aat tuir Jeová nia haree, no ninia feen Jezabel mós book nia atu halo nuneʼe.+ 26  Nia halo hahalok neʼebé aat liu hodi adora estátua sira neʼebé Maromak hakribi,* hanesan ema Amoreu sira hotu adora, ema sira-neʼe Jeová duni sai ona husi ema Izraél nia oin.’”+ 27  Bainhira Acab rona liafuan sira-neʼe, nia lees kedas ninia roupa no hatais fali hena karón.* Nia kontinua halo jejún no toba ho hena karón no nia laʼo ho oin triste. 28  Entaun Jeová dehan ba Elias ema Tisbe: 29  “Ó haree ona oinsá Acab haraik an tanba haʼu-nia avizu ka?+ Tanba nia haraik an ona iha haʼu-nia oin, haʼu sei la lori susar durante ninia moris tomak. Maibé haʼu sei lori susar ba ninia umakain iha ninia oan-mane nia tempu.”+

Nota-rodapé

Orj., “ó-nia espíritu”. Haree “Ruah” iha Glosáriu.
Orj., “ó faʼan ona ó-nia an”.
Orj., “ema naran deʼit neʼebé mii iha moru-lolon”. Liafuan sira-neʼe refere ba mane no uza atu hatudu hakribi.
Orj., “neʼebé faʼan ona ninia an”.
Ka “ídolu sira neʼebé foʼer tebes”. Liafuan Ebraiku neʼe karik mai husi liafuan “teen”. Liafuan neʼe uza atu hatudu hakribi.