Primeiru Reis 20:1-43

  • Ema Síria halo funu hasoru Acab (1-12)

  • Acab manán tropa Síria (13-34)

  • Profesia kona-ba Acab (35-43)

20  Liurai Ben-Hadad+ husi rai-Síria+ halibur hamutuk ninia tropa hotu. Nia mós halibur liurai naʼin-32 hamutuk ho sira-nia kuda no kuda-karreta sira. Nia halo serku+ ba sidade Samaria+ no halo funu hasoru sidade neʼe.  Tuirmai nia haruka ema lori lia-menon ba Acab,+ liurai Izraél, iha sidade Samaria no dehan: “Ben-Hadad dehan nuneʼe:  ‘Ó-nia osan-mutin no osan-mean mak haʼu-nian, nuneʼe mós ó-nia feen sira neʼebé bonita no ó-nia oan-mane sira neʼebé bonitu mak haʼu-nian.’”  Liurai Izraél dehan: “Oh, haʼu-nia naʼi liurai, haʼu ho ema hotu neʼebé hamutuk ho haʼu mak Ita-nian hodi tuir Ita-Boot nia liafuan.”+  Liutiha tempu balu, ema lori fali lia-menon no dehan: “Ben-Hadad dehan nuneʼe: ‘Haʼu haruka ona lia-menon neʼe ba ó: “Entrega ó-nia osan-mutin, osan-mean, ó-nia feen no oan-mane sira ba haʼu.”  Maibé aban iha oras neʼe, haʼu sei haruka haʼu-nia atan sira ba ó, no sira sei buka no foti buat diʼak hotu iha ó-nia uma no ó-nia atan sira-nia uma.’”  Rona tiha neʼe, liurai Izraél bolu katuas hotu iha rai neʼe no dehan ba sira: “Favór ida, hanoin didiʼak bá, mane neʼe hakarak atu lori susar ba ita, tanba nia haruka ona haʼu fó haʼu-nia feen, haʼu-nia oan-mane, haʼu-nia osan-mutin no osan-mean, no haʼu simu deʼit.”  Tuirmai katuas hotu no povu hotu dehan ba nia: “Keta halo tuir.”  Tan neʼe nia hatete ba ema sira neʼebé lori Ben-Hadad nia lia-menon neʼe, hodi dehan: “Hatete ba haʼu-nia naʼi liurai: ‘Ita-nia atan neʼe sei halo tuir buat hotu neʼebé uluk Ita haruka haʼu atu fó, maibé haʼu sei la halo tuir buat neʼebé agora Ita husu.’” Nuneʼe, ema neʼebé lori lia-menon bá fó-hatene fali ba Ben-Hadad. 10  Ben-Hadad haruka lia-menon tuirmai neʼe ba Acab: “Husik maromak sira fó kastigu ba haʼu no aumenta tan kastigu neʼe se haʼu la harahun Samaria toʼo uut no ninia rai-rahun mós sei la toʼo atu halo nakonu haʼu-nia tropa ida-idak nia liman!” 11  Liurai Izraél hatán: “Hatete ba nia: ‘Se funu seidauk komesa, keta gaba an hanesan ó manán ona funu.’”*+ 12  Bainhira Ben-Hadad rona liafuan neʼe, nia ho liurai sira seluk hemu hela tua iha sira-nia tenda,* maibé nia hatete kedas ba ninia atan sira: “Sai prontu atu ataka!” Entaun sira sai prontu atu ataka sidade neʼe. 13  Maibé profeta ida hakbesik ba Liurai Acab+ husi Izraél, hodi dehan: “Jeová dehan nuneʼe: ‘Ó haree ona tropa lubun boot neʼe ka? Ohin haʼu sei entrega sira ba ó-nia liman, nuneʼe ó sei hatene duni katak haʼu mak Jeová.’”+ 14  Acab husu: “Oinsá?” Nia hatán: “Jeová dehan nuneʼe: ‘Haʼu sei uza ulun-naʼin provínsia nia ajudante sira.’” Acab husu tan: “Sé mak sei hahú halo funu neʼe?” Profeta hatán: “Ita-Boot mak sei hahú!” 15  Tuirmai Acab sura ulun-naʼin provínsia nia ajudante sira, no sira hamutuk naʼin-232. Depois neʼe, nia sura tropa Izraél hotu, sira hamutuk naʼin-7.000. 16  Sira bá durante meiudia bainhira Ben-Hadad hemu lanu hela iha tenda* hamutuk ho liurai naʼin-32 neʼebé ajuda nia. 17  Bainhira ulun-naʼin provínsia nia ajudante sira sai uluk husi sidade, Ben-Hadad haruka kedas ema bá atu haree saida mak akontese. Sira fó sai ba nia, hodi dehan: “Tropa sira sai mai ona husi Samaria.” 18  Ho ida-neʼe, nia dehan: “Maski sira sai mai atu halo dame ka atu halo funu, imi tenke kaer moris deʼit sira.” 19  Maibé bainhira sira sai husi sidade, katak ulun-naʼin provínsia nia ajudante sira, hamutuk ho tropa neʼebé laʼo tuir sira, 20  sira ida-idak oho inimigu sira. Tuirmai ema Síria halai,+ no ema Izraél duni tuir sira, maibé Liurai Ben-Hadad husi Síria halai hodi saʼe kuda, no ninia ema balu neʼebé saʼe kuda mós halai hamutuk ho nia. 21  Maibé liurai Izraél sai husi sidade no kontinua manán inimigu sira neʼebé saʼe kuda no kuda-karreta sira, no nia oho ema Síria barak. 22  Liutiha tempu balu, profeta+ hakbesik ba liurai Izraél no dehan: “Bá hametin Ita-nia pozisaun no hanoin kona-ba saida mak Ita sei halo,+ tanba bainhira tinan oin komesa,* liurai Síria sei mai fali atu halo funu hasoru Ita.”+ 23  Liurai Síria nia atan sira dehan ba nia: “Sira-nia Maromak mak Maromak foho nian. Tan neʼe mak sira manán ita. Maibé se ita funu hasoru sira iha rai-tetuk, ita sei manán sira. 24  No mós halo ida-neʼe: Hasai tiha liurai hotu+ husi sira-nia pozisaun atu dirije tropa ba funu, no troka fali sira ho governadór sira. 25  Tuirmai halibur* Ita-nia tropa barak hanesan tropa neʼebé uluk lakon iha funu, no mós kuda ho kuda-karreta sira neʼebé barak hanesan uluk. Mai ita funu hasoru sira iha rai-tetuk, no ita sei manán sira.” Entaun liurai Síria rona ba sira-nia konsellu no halo nuneʼe duni. 26  Bainhira tinan foin komesa,* Ben-Hadad halibur tropa Síria no saʼe ba Afek+ hodi halo funu hasoru ema Izraél. 27  Tropa Izraél mós halibur hamutuk no prepara ai-han, no sira bá atu funu hasoru tropa Síria. Bainhira tropa Izraél harii sira-nia hela-fatin iha tropa Síria nia oin, tropa Izraél mak hanesan bibi-timur lubun rua neʼebé uitoan deʼit, maibé tropa Síria mak nakonu iha rai tomak.+ 28  Tuirmai Maromak loos nia atan hakbesik ba liurai Izraél no dehan: “Jeová dehan nuneʼe: ‘Tanba ema Síria dehan ona: “Jeová mak Maromak foho nian, no nia laʼós Maromak rai-tetuk nian”, entaun haʼu sei entrega tropa lubun boot neʼe ba ó-nia liman,+ nuneʼe imi sei hatene duni katak haʼu mak Jeová.’”+ 29  Sira kontinua hela besik malu ba loron hitu, no iha loron hitu sira komesa funu. Iha loron ida deʼit, tropa Izraél oho tropa Síria neʼebé laʼo ain hamutuk naʼin-100.000. 30  Tropa sira seluk halai no tama ba sidade Afek.+ Maibé moru sidade nian monu ba tropa naʼin-27.000 nia leten. Ben-Hadad mós halai no tama ba sidade, no nia subar an iha fatin segredu iha uma laran. 31  Entaun ninia atan sira dehan ba nia: “Ami rona ona katak liurai sira husi umakain Izraél mak liurai neʼebé nakonu ho laran-sadiʼa.* Favór ida, husik ami kesi hena karón* iha ami-nia knotak no kesi tali iha ami-nia ulun no ami sei bá hasoru liurai Izraél. Karik nia sei husik Ita-Boot moris.”*+ 32  Nuneʼe sira kesi hena karón iha sira-nia knotak no kesi tali iha sira-nia ulun no bá hasoru liurai Izraél no dehan: “Ita-Boot nia atan Ben-Hadad dehan: ‘Favór ida, husik haʼu moris.’” Liurai hatán: “Nia sei moris hela ka? Nia mak haʼu-nia maun.” 33  Atan sira-neʼe haree katak neʼe mak sinál neʼebé diʼak no sira fiar kedas ninia liafuan, entaun sira dehan: “Ben-Hadad mak Ita-nia maun.” Ho ida-neʼe, nia hatete: “Bá bolu nia.” Tuirmai Ben-Hadad sai mai hasoru nia, no nia konvida Ben-Hadad saʼe kuda-karreta. 34  Ben-Hadad hatete ba Acab: “Haʼu sei entrega fali sidade sira neʼebé haʼu-nia aman hadau husi Ita-nia aman, no Ita bele loke merkadu* sira ba Ita-nia an rasik iha Damasku hanesan haʼu-nia aman mós loke iha Samaria.” Acab hatán: “Haʼu sei husik ó bá tanba akordu* ida-neʼe.” Ho ida-neʼe, Acab halo akordu ida ho Ben-Hadad no husik nia bá. 35  Ema ida husi profeta sira-nia oan-mane sira*+ halo tuir Jeová nia mandamentu no dehan ba mane neʼebé hamutuk ho nia: “Favór ida, tuku haʼu.” Maibé mane neʼe lakohi tuku nia. 36  Entaun profeta neʼe hatete ba nia: “Tanba ó la rona ba Jeová nia liafuan, entaun bainhira ó fila, leaun ida sei tata mate kedas ó.” Bainhira nia fila, leaun ida mai no tata mate nia. 37  Profeta neʼe hetan mane ida seluk no dehan: “Favór ida, tuku haʼu.” Entaun mane neʼe tuku no hakanek nia. 38  Tuirmai profeta neʼe bá hodi hein liurai iha dalan ninin, no nia falun nia matan ho ligadura no halo nia an laʼós hanesan profeta atu ema la koñese nia. 39  Bainhira liurai liu daudaun, profeta neʼe bolu liurai, hodi dehan: “Ita-nia atan neʼe bá tuir funu neʼebé makaʼas loos, no iha neʼebá mane ida mai hodi lori mane ida seluk ba haʼu no dehan: ‘Tau matan ba mane neʼe. Se nia halai, ó tenke troka fali mane neʼe nia moris ho ó-nia moris rasik,+ ka se lae, ó tenke selu osan-mutin kilograma 34 ho grama 200.’* 40  Bainhira Ita-nia atan neʼe okupadu hela, derrepente deʼit mane neʼe halai lakon.” Liurai Izraél hatete ba nia: “Ó rasik deside ona ó-nia kastigu, entaun ó-nia kastigu mak neʼe.” 41  Tuirmai nia hasai lalais ligadura neʼebé falun ninia matan, no liurai Izraél koñese katak nia mak profeta ida.+ 42  Nia hatete ba liurai: “Jeová dehan nuneʼe: ‘Haʼu dehan ona katak ó tenke halakon tiha mane neʼe, maibé ó husik mane neʼe halai husi ó-nia liman,+ tan neʼe ó-nia moris mak sei troka fali ho ninia moris,+ no ó-nia povu mak sei troka fali ninia povu.’”+ 43  Ho ida-neʼe, liurai Izraél fila ba ninia uma iha Samaria+ ho oin triste no murón.

Nota-rodapé

Orj., “Ema neʼebé foin hatais ninia roupa funu nian keta gaba an hanesan ema neʼebé hasai ona ninia roupa funu nian”.
Ka “barraka”.
Ka “barraka”.
Neʼe katak tempu manas komesa. Neʼe maizumenus fulan-Abríl. Haree Ap. B15.
Orj., “sura”.
Neʼe katak tempu manas komesa. Neʼe maizumenus fulan-Abríl. Haree Ap. B15.
Ka “liurai neʼebé iha domin neʼebé laran-metin”.
Ka “sei la hasai Ita-Boot nia moris”. Haree “Nefes” iha Glosáriu.
Ka “dalan”.
Ka “aliansa”.
Karik “profeta sira-nia oan-mane sira” refere ba eskola ida ba profeta sira, ka grupu profeta.
Orj., “talentu 1”. Haree Ap. B14.