Primeiru Reis 17:1-24

  • Profeta Elias fó-hatene nanis katak udan sei la tun (1)

  • Manu-metan lori hahán ba Elias (2-7)

  • Elias vizita feto-faluk iha Sarepta (8-16)

  • Feto-faluk nia oan-mane mate, depois moris fali (17-24)

17  Elias*+ ema Tisbe, husi rai-Gilead,+ dehan ba Acab: “Haʼu jura hodi Jeová, Izraél nia Maromak neʼebé moris, neʼebé haʼu serbí, katak ba tinan balu sei la iha mahobeen no udan, só deʼit se haʼu koʼalia mak udan bele tau fali!”+  Jeová dehan ba Elias:  “Sai husi fatin neʼe, no bá parte leste hodi subar an besik Mota* Kerit, iha Mota Jordaun nia sorin parte leste.  Ó sei hemu bee husi mota iha foho-leet, no haʼu sei haruka manu-metan sira atu lori ai-han ba ó iha neʼebá.”+  Nia bá kedas hodi halo tuir Jeová nia liafuan. Nia bá hela besik Mota* Kerit, iha Mota Jordaun nia sorin parte leste.  Dadeer-dadeer manu-metan sira lori paun ho naʼan ba nia, nuneʼe mós kalan-kalan sira lori paun ho naʼan ba nia, no nia hemu bee husi mota neʼe.+  Maibé liutiha loron balu, mota neʼe sai maran+ tanba la iha udan iha rai neʼe.  Entaun Jeová dehan ba Elias:  “Hamriik, no laʼo ba Sarepta, neʼebé iha área Sidon nian, no hela iha neʼebá. Haʼu sei haruka feto-faluk ida iha neʼebá hodi fó ai-han ba ó.”+ 10  Nuneʼe nia hamriik hodi laʼo ba Sarepta. Bainhira nia toʼo iha sidade nia portaun, nia haree feto-faluk ida hili hela ai. Entaun nia bolu feto neʼe, no dehan: “Favór ida, lori bee uitoan iha kopu ida ba haʼu atu nuneʼe haʼu bele hemu.”+ 11  Bainhira feto neʼe bá atu foti bee, nia mós dehan ba feto neʼe: “Favór ida, lori mós paun fuan ida ba haʼu.” 12  Feto neʼe dehan: “Haʼu jura hodi Jeová, Ita-Boot nia Maromak neʼebé moris, haʼu la iha paun, só iha deʼit trigu uut uitoan iha sanan-rai boot ida no mina uitoan iha sanan-rai kiʼik ida.+ Agora haʼu hili daudaun ai balu, no haʼu sei laʼo ba haʼu-nia uma no tunu buat ruma atu haʼu no haʼu-nia oan-mane han. Bainhira ami han hotu tiha, ami sei mate.” 13  Elias hatete ba feto neʼe: “Keta taʼuk. Fila ba ó-nia uma no halo tuir buat neʼebé ó dehan. Maibé halo uluklai paun fuan kiʼik ida neʼebé kabuar husi buat neʼebé ó iha no lori mai haʼu. Depois neʼe, ó bele tunu buat ruma ba ó no ó-nia oan-mane atu han. 14  Tanba Jeová, Izraél nia Maromak, dehan: ‘Sanan-rai boot trigu nian sei la sai mamuk, no sanan-rai kiʼik mina nian sei la sai maran toʼo loron neʼebé Jeová halo udan tun ba rai leten.’”+ 15  Entaun feto neʼe bá hodi halo tuir Elias nia liafuan, no feto neʼe ho ninia umakain no mós ho Elias kontinua iha ai-han ba loron barak.+ 16  Sanan-rai boot trigu nian la sai mamuk, no sanan-rai kiʼik mina nian la sai maran, hodi tuir Jeová nia liafuan neʼebé fó sai ona liuhusi Elias. 17  Depois neʼe, feto uma-naʼin neʼe nia oan-mane sai moras, no moras neʼe sai todan liután toʼo ninia iis kotu.+ 18  Feto neʼe dehan ba Elias: “Oh Maromak loos nia atan, haʼu halo sala saida ba Ita-Boot? Ita mai iha neʼe atu halo haʼu hanoin fali haʼu-nia sala no halo haʼu-nia oan-mane mate ka?”+ 19  Maibé Elias dehan ba feto neʼe: “Entrega ó-nia oan-mane mai haʼu.” Tuirmai nia koʼus labarik neʼe husi feto neʼe nia liman no lori ba kuartu iha uma-leten, katak kuartu neʼebé Elias hela bá, no nia hatoba labarik neʼe iha ninia kama rasik.+ 20  Elias harohan ba Jeová, hodi dehan: “Oh Jeová, haʼu-nia Maromak,+ feto-faluk neʼe fó fatin ba haʼu atu hela, maibé Ita lori susar ba nia hodi husik ninia oan-mane mate ka?” 21  Tuirmai nia latan nia an iha labarik neʼe nia leten ba dala tolu no nia harohan ba Jeová, hodi dehan: “Oh Jeová, haʼu-nia Maromak, favór ida, husik labarik neʼe moris fila fali.”* 22  Jeová rona ba Elias nia harohan,+ no halo labarik neʼe moris fila fali.*+ 23  Elias lori labarik neʼe tun husi kuartu iha uma-leten hodi tama ba uma laran no entrega ba ninia inan; Elias dehan: “Haree bá, ó-nia oan-mane moris fali ona.”+ 24  Ho ida-neʼe, feto neʼe hatete ba Elias: “Agora haʼu hatene duni katak Ita mak Maromak nia atan+ no katak Jeová nia liafuan neʼebé Ita fó sai mak lia-loos.”

Nota-rodapé

Naran neʼe katak “Jeová mak haʼu-nia Maromak”.
Ka “Uádi”. Haree Glosáriu.
Ka “Uádi”. Haree Glosáriu.
Orj., “halo labarik neʼe nia moris tama fali ba nia”.
Orj., “moris tama fali ba nia, no nia moris fila fali”.