Primeiru Reis 13:1-34

  • Profesia kona-ba altár iha Betel (1-10)

    • Altár nakfera ba rua (5)

  • Profeta ida neʼebé la halo tuir Maromak (11-34)

13  Maromak nia atan ida+ sai husi Judá no bá Betel hodi tuir Jeová nia liafuan. Bainhira nia toʼo Betel, Jeroboão hamriik daudaun besik altár+ atu hasaʼe sakrifísiu.*  Tuirmai nia koʼalia ho lian makaʼas kontra altár neʼe hodi tuir mandamentu neʼebé Jeová fó sai ona, no nia dehan: “Oh altár, altár! Jeová dehan nuneʼe: ‘Oan-mane ida naran Josias+ sei moris iha David nia umakain! Iha ó-nia leten mak nia sei sunu amlulik sira neʼebé serbí iha fatin aas sira, neʼe katak amlulik sira neʼebé hasaʼe sakrifísiu* iha ó-nia leten, no nia sei sunu ema nia ruin iha ó-nia leten.’”+  Iha loron neʼebá, nia fó sinál ida,* hodi dehan: “Tuirmai neʼe mak sinál neʼebé Jeová fó sai ona: Altár neʼe sei fera ba rua, no ahi-kadesan* sira neʼebé iha altár leten sei nakfakar.”  Bainhira Liurai Jeroboão rona liafuan husi Maromak loos nia atan neʼebé kontra altár iha Betel, Jeroboão dada ninia liman husi altár no hatudu fali ba atan neʼe, hodi dehan: “Kaer nia!”+ Derrepente deʼit, ninia liman neʼebé hatudu ba atan neʼe maran* kedas, no nia labele dada fali ninia liman.+  Tuirmai altár neʼe nakfera ba rua, no ahi-kadesan sira neʼebé iha altár leten nakfakar. Neʼe tuir sinál neʼebé Jeová fó-hatene ona ba Maromak loos nia atan.  Liurai dehan ba Maromak loos nia atan: “Favór ida, husu Jeová, ó-nia Maromak, atu hatudu laran-sadiʼa,* no halo orasaun kona-ba haʼu hodi haʼu-nia liman bele sai diʼak fali.”+ Ho ida-neʼe, Maromak loos nia atan neʼe husu Jeová nia laran-sadiʼa, no liurai nia liman sai diʼak fali hanesan uluk.  Tuirmai liurai hatete ba Maromak loos nia atan: “Mai ita bá haʼu-nia uma no han ai-han ruma, no haʼu sei fó prezente ida ba ó.”  Maibé Maromak loos nia atan hatete ba liurai: “Maski Ita fó Ita-nia uma sorin ba haʼu, haʼu sei la bá hamutuk ho Ita no han paun ka hemu bee iha fatin neʼe.  Tanba Jeová haruka ona haʼu, hodi dehan: ‘Ó keta han paun ka hemu bee iha fatin neʼe, no ó keta fila liuhusi dalan neʼebé ó mai fatin neʼe.’” 10  Entaun nia fila liuhusi dalan seluk, no nia la liu dalan neʼebé nia mai Betel. 11  Iha Betel iha profeta katuas ida, no ninia oan-mane sira fila ba uma no konta ba nia buat hotu neʼebé Maromak loos nia atan halo ona iha loron neʼe iha Betel no mós kona-ba liafuan neʼebé atan neʼe fó sai ba liurai. Bainhira sira konta hotu ona, 12  sira-nia aman husu: “Nia fila liuhusi dalan neʼebé?” Entaun ninia oan-mane sira hatudu ba nia dalan neʼebé Maromak loos nia atan husi Judá liu. 13  Tuirmai nia dehan ba ninia oan-mane sira: “Tau sela ba kuda-burru atu haʼu saʼe.” Nuneʼe sira tau sela ba kuda-burru, no nia saʼe kuda-burru neʼe. 14  Profeta katuas bá tuir Maromak loos nia atan no hetan atan neʼe tuur hela iha ai-hun boot ida nia okos. Tuirmai nia husu ba atan neʼe: “Ó mak Maromak loos nia atan neʼebé mai husi Judá ka?”+ Nia hatán: “Sin.” 15  Profeta neʼe hatete ba atan neʼe: “Mai ita bá haʼu-nia uma no han paun.” 16  Maibé atan neʼe dehan: “Haʼu labele fila fali ho Ita ka simu Ita-nia konvite, haʼu mós labele han paun ka hemu bee hamutuk ho Ita iha fatin neʼe. 17  Tanba Jeová haruka ona haʼu, hodi dehan: ‘Ó keta han paun ka hemu bee iha fatin neʼebá. Ó keta fila liuhusi dalan neʼebé ó mai fatin neʼe.’” 18  Profeta katuas dehan ba atan neʼe: “Haʼu mós profeta hanesan ó, no anju ida fó-hatene mai haʼu Jeová nia liafuan, neʼebé dehan: ‘Bolu nia atu fila ho ó ba ó-nia uma atu nuneʼe nia bele han paun no hemu bee.’” Tuir loloos, nia lohi deʼit atan neʼe. 19  Entaun atan neʼe fila hamutuk ho nia atu han paun no hemu bee iha ninia uma. 20  Bainhira sira tuur hela iha meza, Jeová koʼalia ba profeta katuas neʼebé lori nia fila, 21  no profeta katuas neʼe koʼalia ba Maromak loos nia atan husi Judá, hodi dehan: “Jeová dehan nuneʼe: ‘Tanba ó kontra Jeová nia orden no la kumpre Jeová, ó-nia Maromak, nia mandamentu neʼebé nia fó sai ona ba ó, 22  no ó fila fali hodi han paun no hemu bee iha fatin neʼebé nia dehan ona ba ó: “Keta han paun ka hemu bee iha fatin neʼe”, entaun ó-nia mate-isin sei la hakoi iha ó-nia beiʼala sira-nia rate.’”+ 23  Bainhira Maromak loos nia atan han paun no hemu hotu ona, profeta katuas neʼe tau sela ba kuda-burru atu atan* neʼe saʼe. 24  Tuirmai atan neʼe bá, maibé leaun ida hasoru nia iha dalan no tata mate nia.+ Ninia mate-isin latan deʼit iha dalan, no kuda-burru hamriik besik mate-isin neʼe. Leaun mós hamriik iha mate-isin neʼe nia sorin. 25  Ema sira neʼebé laʼo liu haree mate-isin neʼebé latan hela iha dalan no haree leaun hamriik iha mate-isin neʼe nia sorin. Entaun sira mai no konta kona-ba neʼe iha sidade laran, sidade neʼebé profeta katuas neʼe hela bá. 26  Bainhira profeta katuas neʼe* rona kona-ba neʼe, nia dehan kedas: “Nia mak Maromak loos nia atan neʼebé kontra Jeová nia orden.+ Tan neʼe Jeová entrega nia ba leaun atu tata mate nia, hodi tuir Jeová nia liafuan neʼebé fó sai ona ba nia.”+ 27  Tuirmai profeta katuas neʼe dehan ba ninia oan-mane sira: “Tau sela ba kuda-burru atu haʼu saʼe.” Nuneʼe sira tau sela ba kuda-burru. 28  Depois neʼe, nia bá no haree mate-isin latan hela iha dalan, no kuda-burru ho leaun hamriik besik mate-isin neʼe. Leaun la han mate-isin neʼe, no mós la tata kuda-burru neʼe. 29  Profeta katuas neʼe foti Maromak loos nia atan nia mate-isin no tau iha kuda-burru leten, no nia lori mate-isin neʼe fila ba ninia sidade rasik atu lelir no hakoi mate-isin neʼe. 30  Nuneʼe nia hakoi mate-isin neʼe iha ninia rate rasik, no sira kontinua lelir, hodi dehan: “Kuitadu, haʼu-nia alin! Kuitadu!” 31  Depois hakoi tiha mate-isin neʼe, profeta katuas neʼe dehan ba ninia oan-mane sira: “Bainhira haʼu mate, imi tenke hakoi haʼu iha fatin neʼebé hanesan ho Maromak loos nia atan hakoi bá. Tau haʼu-nia ruin besik ninia ruin sira.+ 32  Jeová nia liafuan neʼebé nia fó sai ona kontra altár iha Betel no kontra uma adorasaun hotu iha fatin aas+ iha sidade sira iha Samaria sei sai loos duni.”+ 33  Maski buat sira-neʼe akontese, maibé Jeroboão la husik ninia hahalok aat sira, no nia kontinua hili amlulik sira husi povu baibain atu serbí iha fatin aas sira.+ Nia fó knaar nuʼudar amlulik* ba ema naran deʼit neʼebé hakarak, hodi dehan: “Husik nia sai nuʼudar amlulik atu serbí iha fatin aas sira.”+ 34  Jeroboão nia umakain halo sala neʼe,+ tan neʼe, ikusmai sira lakon mohu husi mundu.+

Nota-rodapé

Ka “sunu sakrifísiu hodi halo suar”.
Ka “sunu sakrifísiu hodi halo suar”.
Neʼe katak sinál neʼebé hatudu katak nia koʼalia hodi Maromak nia naran.
Neʼe mak ahi-kadesan neʼebé kahur ona ho mina husi naʼan bokur husi sakrifísiu sira.
Ka “liman-matek”.
Ka “halo mamar Jeová, ó-nia Maromak, nia oin”.
Orj., “profeta neʼebé nia lori fila”.
Orj., “profeta neʼebé lori nia fila husi dalan”.
Orj., “Nia halo nakonu ema nia liman”.