Primeiru Reis 12:1-33

  • Roboão nia resposta la diʼak (1-15)

  • Suku sanulu kontra liurai (16-19)

  • Jeroboão sai liurai ba Izraél (20)

  • Avizu atu Roboão labele funu hasoru Izraél (21-24)

  • Jeroboão adora estátua karau-oan (25-33)

12  Roboão bá Siquém, tanba ema Izraél hotu bá ona Siquém+ atu foti nia sai liurai.+  Maibé Nebat nia oan-mane Jeroboão sei hela iha rai-Ejitu tanba nia halai husi Liurai Salomão.+ Iha neʼebá mak Jeroboão rona kona-ba Roboão,  no povu sira bolu Jeroboão. Depois neʼe, Jeroboão no kongregasaun Izraél hotu mai hasoru Roboão, hodi dehan:  “Ita-Boot nia aman fó naha* todan ba ami.+ Maibé se Ita halo kmaan ami-nia naha todan no serbisu todan neʼebé Ita-nia aman haruka ami atu halo, entaun ami sei serbí Ita.”  Ho ida-neʼe, Roboão dehan ba sira: “Fila fali bá, liutiha loron tolu mak mai fali hasoru haʼu.” Entaun povu sira fila.+  Tuirmai Liurai Roboão koʼalia ho katuas sira neʼebé serbí ona ninia aman Salomão bainhira nia moris hela, hodi dehan: “Imi fó toʼok konsellu mai haʼu. Oinsá mak haʼu sei hatán ba povu neʼe?”  Sira hatán ba nia: “Se ohin loron Ita-Boot sai atan ba povu sira-neʼe hodi halo tuir buat neʼebé sira husu no hatán ba sira ho laran-diʼak, sira sei sai Ita-nia atan ba nafatin.”  Maibé Roboão la simu konsellu neʼebé katuas sira fó ba nia, no nia husu fali ba mane joven sira neʼebé boot hamutuk ho nia no agora halo serbisu ba nia.+  Nia husu sira: “Imi fó toʼok konsellu mai haʼu. Oinsá mak ita sei hatán ba povu neʼebé dehan: ‘Halo kmaan naha todan neʼebé Ita-Boot nia aman fó ba ami’?” 10  Mane joven sira neʼebé boot hamutuk ho nia, dehan ba nia: “Kona-ba povu neʼebé dehan ba ó: ‘Ita-Boot nia aman fó naha todan ba ami, maibé favór ida, Ita tenke halo kmaan fali ba ami’, ó tenke hatete: ‘Haʼu-nia liman-fuan kiʼik sei boot liu fali haʼu-nia aman nia knotak. 11  Haʼu-nia aman fó ona naha todan ba imi, maibé haʼu sei aumenta liután ninia todan. Haʼu-nia aman kastigu imi ho xikote baibain, maibé haʼu sei kastigu imi ho xikote neʼebé tutun tarak.’” 12  Jeroboão no povu hotu mai hasoru Roboão iha loron terseiru hodi tuir liurai nia liafuan neʼebé dehan: “Liutiha loron tolu mak mai fali hasoru haʼu.”+ 13  Maibé liurai hatán ba povu sira ho siʼak, no la halo tuir konsellu neʼebé katuas sira fó ona ba nia. 14  Nia koʼalia ba povu tuir mane joven sira-nia konsellu, hodi dehan: “Haʼu-nia aman fó ona naha todan ba imi, maibé haʼu sei aumenta ninia todan. Haʼu-nia aman kastigu imi ho xikote baibain, maibé haʼu sei kastigu imi ho xikote neʼebé tutun tarak.” 15  Nuneʼe liurai lakohi rona povu. Neʼe akontese tanba Jeová mak halo situasaun neʼe mosu+ atu bele kumpre Jeová nia liafuan neʼebé nia fó sai ona liuhusi Ahias+ ema Silo, ba Nebat nia oan-mane Jeroboão. 16  Bainhira ema Izraél hotu haree katak liurai lakohi rona sira, sira hatán ba liurai: “Ami la iha ligasaun ho David. Ami la hetan liman-rohan husi Jessé nia oan-mane. Oh ema Izraél, fila fali ba adora imi-nia maromak sira. Oh David nia bei-oan, tau matan ba ó-nia umakain rasik!” Depois neʼe, ema Izraél sira fila fali ba sira-nia uma.*+ 17  Maibé Roboão kontinua ukun ema Izraél sira neʼebé hela iha sidade sira iha Judá.+ 18  Tuirmai Liurai Roboão haruka Adorão,+ neʼebé tau matan ba liurai nia serbisu-naʼin sira, atu bá koʼalia ho ema Izraél, maibé ema Izraél hotu tuda nia toʼo mate. Liurai Roboão konsege saʼe ninia kuda-karreta hodi halai ba Jeruzalein.+ 19  No ema Izraél kontinua kontra+ hasoru umakain David toʼo ohin loron. 20  Bainhira ema Izraél tomak rona katak Jeroboão fila ona, sira bolu kedas nia atu mai iha povu nia oin no foti nia sai liurai ba ema Izraél tomak.+ La iha povu ida mak tuir umakain David nian, só deʼit suku Judá.+ 21  Bainhira Salomão nia oan-mane Roboão toʼo iha Jeruzalein, nia halibur kedas funu-naʼin hamutuk naʼin-180.000 husi umakain Judá tomak no suku Benjamim neʼebé hetan ona treinu,* atu halo funu hasoru umakain Izraél hodi bele hametin fali Roboão nia ukun nuʼudar liurai.+ 22  Tuirmai Maromak neʼebé loos koʼalia ba Semaias,+ Maromak loos nia atan, hodi dehan: 23  “Koʼalia ba Salomão nia oan-mane Roboão, liurai Judá, no ba umakain Judá no Benjamim hotu no povu restu sira: 24  ‘Jeová dehan nuneʼe: “Imi labele bá funu hasoru imi-nia maun-alin ema Izraél. Imi ida-idak tenke fila fali ba imi-nia uma rasik, tanba haʼu mak hamosu situasaun neʼe.”’”+ Entaun sira halo tuir Jeová nia liafuan no fila fali ba sira-nia uma, hanesan Jeová hatete ona ba sira. 25  Tuirmai Jeroboão harii* sidade Siquém+ iha área foho nian iha Efraim no hela iha neʼebá. Depois neʼe, nia bá harii* sidade Penuel.+ 26  Jeroboão hanoin iha ninia laran: “Karik David nia umakain sei ukun fali povu hotu.+ 27  Se povu sira-neʼe kontinua bá hodi hasaʼe sakrifísiu iha Jeová nia uma iha Jeruzalein,+ sira-nia laran mós sei fila fali ba sira-nia naʼi Liurai Roboão husi Judá. Sira sei oho haʼu no fila fali ba Liurai Roboão husi Judá.” 28  Bainhira Liurai Jeroboão koʼalia tiha ho ninia konsellu-naʼin sira, nia halo estátua karau-oan rua husi osan-mean+ no dehan ba povu: “Oh ema Izraél, atu bá Jeruzalein mak dook tebes ba imi. Imi-nia Maromak mak neʼe, nia mak Ida neʼebé lori imi sai husi rai-Ejitu.”+ 29  Tuirmai nia tau estátua ida iha Betel+ no ida seluk iha Dan.+ 30  Estátua sira-neʼe halo povu monu ba sala,+ no povu mós laʼo toʼo Dan atu adora estátua ida iha neʼebá. 31  Jeroboão mós harii uma adorasaun nian iha fatin aas sira no hili amlulik sira husi povu baibain, laʼós husi ema Levi sira.+ 32  Jeroboão mós halo festa ida hanesan festa iha Judá,+ iha loron 15 fulan-ualu. Nia hasaʼe sakrifísiu ba estátua karau-oan neʼebé nia halo ona. Nia hasaʼe sakrifísiu sira iha altár neʼebé nia halo iha Betel,+ no iha neʼebá mak nia fó knaar ba amlulik sira atu serbí iha fatin aas sira. 33  Iha loron 15 fulan-ualu, tuir fulan neʼebé nia rasik hili, nia komesa hasaʼe sakrifísiu iha altár neʼebé nia halo ona iha Betel, no nia halo festa ida ba povu Izraél. Nia saʼe ba altár neʼe atu hasaʼe sakrifísiu sira no sunu sakrifísiu hodi halo suar.

Nota-rodapé

Ka “ai-leba”.
Orj., “tenda”.
Orj., “hili tiha ona”.
Ka “hametin”.
Ka “hametin”.