Primeiru Reis 10:1-29

  • Liurai-feto husi Sabá vizita Salomão (1-13)

  • Salomão nia rikusoin boot (14-29)

10  Liurai-feto husi Sabá rona istória kona-ba Salomão nia naran-boot neʼebé lori glória ba Jeová nia naran,+ tan neʼe nia mai hodi koko Salomão ho pergunta sira neʼebé susar.*+  Nia toʼo iha Jeruzalein ho ninia atan barak.+ Nia mós lori kuda-kamelu neʼebé tula mina-bálsamu,+ osan-mean barak tebes no fatuk-murak oioin. Nia bá hasoru Salomão no koʼalia ho Salomão hodi husu buat hotu neʼebé nia hakarak hatene.  Salomão hatán ninia pergunta hotu. La iha pergunta ida mak susar demais ba* Liurai Salomão atu esplika ba nia.  Bainhira liurai-feto husi Sabá rona ona Salomão nia matenek hotu,+ no haree uma neʼebé Salomão harii,+  ai-han iha ninia meza,+ oinsá ninia ema-boot sira tuur, atan sira neʼebé serbí iha meza no mós dalan neʼebé atan sira-neʼe hatais, atan neʼebé tau matan ba liurai nia hemu, no mós sakrifísiu sunu nian neʼebé Salomão hasaʼe beibeik iha Jeová nia uma, buat sira-neʼe halo liurai-feto neʼe hakfodak toʼo lakon ninia forsa.*  Ho ida-neʼe, nia hatete ba liurai: “Istória neʼebé haʼu rona iha haʼu-nia rai rasik kona-ba buat hotu neʼebé Ita-Boot halo ona* no kona-ba Ita-nia matenek mak loos duni.  Maibé haʼu la fiar istória sira-neʼe toʼo haʼu mai no haree ho haʼu-nia matan rasik. Tuir loloos, sira konta buat uitoan deʼit ba haʼu. Ita-nia matenek mak boot liu no Ita riku liu fali istória neʼebé haʼu rona ona kona-ba Ita.  Ksolok ba Ita-nia povu, no ksolok ba Ita-nia atan sira neʼebé kontinua hamriik iha Ita-nia oin, tanba sira rona ba Ita-nia matenek!+  Fó hahiʼi ba Jeová,+ Ita-Boot nia Maromak, neʼebé simu ona Ita hodi hili Ita tuur iha kadunan atu ukun Izraél. Jeová hili Ita nuʼudar liurai atu tesi-lia ho justisa no ukun ho hahalok loos tanba ninia domin neʼebé la iha rohan ba Izraél.” 10  Tuirmai liurai-feto fó osan-mean kilograma 4.100* no mina-bálsamu barak tebes+ no fatuk-murak oioin+ ba liurai. Ema ida nunka lori tan mina-bálsamu barak hanesan ho mina neʼebé liurai-feto husi Sabá fó ba Liurai Salomão. 11  Hirão nia ró sira neʼebé lori osan-mean husi Ofir+ mós lori ai-kameli+ barak tebes husi Ofir, no lori mós fatuk-murak oioin+ atu fó ba Salomão. 12  Liurai uza ai-kameli atu halo ai-riin ba Jeová nia uma no ba liurai nia palásiu no mós atu halo arpa no instrumentu neʼebé iha talin ba kantadór sira.+ Ema nunka lori tan ai-kameli barak hanesan neʼe no nunka haree tan toʼo ohin loron. 13  Liurai Salomão fó sasán oioin ho laran-luak ba liurai-feto husi Sabá, no mós fó tan buat naran deʼit neʼebé liurai-feto neʼe hakarak no husu. Depois neʼe, liurai-feto neʼe fila fali ba ninia rai hamutuk ho ninia atan sira.+ 14  Osan-mean neʼebé Salomão simu iha tinan ida nia laran hamutuk kilograma 22.780,*+ 15  laʼós neʼe deʼit, nia mós manán osan husi ema neʼebé laʼo-rai hodi fila liman no husi negósiu-naʼin sira, no mós husi ema Arábia nia liurai sira hotu no governadór sira iha rai neʼe. 16  Liurai Salomão halo eskudu boot 200 hodi uza osan-mean neʼebé kahur ona ho besi.+ Nia uza osan-mean kilograma 6 ho grama 800* ba eskudu ida-idak.+ 17  No nia mós halo eskudu kiʼik* 300 hodi uza osan-mean neʼebé kahur ona ho besi. Nia uza osan-mean kilograma 1 ho grama 700* ba eskudu kiʼik ida-idak. Tuirmai liurai tau buat sira-neʼe iha uma ida naran Uma Ai-Laran Líbanu.+ 18  Liurai mós halo kadunan boot ida hodi uza marfín*+ no taka ho osan-mean neʼebé halo moos ona.+ 19  Iha eskada hakat neen atu saʼe ba kadunan, no iha kadunan neʼe nia leten iha hena kabuar, no iha fatin atu tula liman iha kadunan nia sorin-sorin, no iha estátua leaun rua+ iha kadunan nia sorin-sorin. 20  No iha estátua leaun hamutuk 12 neʼebé hamriik iha eskada neen, leaun ida iha eskada ida-idak nia ninin iha sorin-sorin. La iha nasaun ida mak halo kadunan hanesan neʼe. 21  Liurai Salomão nia kopu hotu halo husi osan-mean, no sasán hotu neʼebé rai iha Uma Ai-Laran Líbanu+ halo husi osan-mean neʼebé moos. La iha sasán ida mak halo husi osan-mutin, tanba iha Salomão nia tempu osan-mutin la iha folin.+ 22  Tanba liurai iha ró Tarsis+ sira neʼebé halo viajen hamutuk ho Hirão nia ró barak. Tinan tolu dala ida, ró Tarsis sira-neʼe lori osan-mean, osan-mutin, marfín,+ lekirauk no manu-pavaun ba Salomão. 23  Nuneʼe Liurai Salomão sai naran-boot liu fali liurai sira hotu iha mundu kona-ba rikusoin+ no matenek.+ 24  No ema iha mundu tomak buka atu hasoru Salomão* hodi rona ninia matenek neʼebé Maromak fó ona ba nia.+ 25  Tinan-tinan, ema neʼebé vizita liurai, sira ida-idak lori prezente ida. Prezente sira-neʼe mak hanesan sasán husi osan-mutin, sasán husi osan-mean, roupa, armas funu nian, mina-bálsamu, kuda no kuda-mula.* 26  Salomão kontinua halibur kuda* no kuda-karreta sira. Nia iha kuda* 12.000+ no kuda-karreta 1.400, no rai iha sidade ba kuda-karreta nian no mós besik liurai nia hela-fatin iha Jeruzalein.+ 27  Liurai halibur osan-mutin barak tebes iha Jeruzalein toʼo hanesan deʼit ho fatuk barak, no halibur ai-sedru barak tebes hanesan ai-sikómoru* iha área Sefela.+ 28  Salomão nia kuda sira sosa husi rai-Ejitu, no liurai nia negósiu-naʼin barak sosa kuda-lubun sira* tuir folin neʼebé loloos.+ 29  Kuda-karreta ida-idak neʼebé sosa husi rai-Ejitu, folin osan-mutin 600, no kuda ida folin osan-mutin 150. Tuirmai, sira faʼan fali ba ema Hetes+ nia liurai sira hotu no ba liurai sira husi rai-Síria.

Nota-rodapé

Ka “ho ai-sasiʼik sira”.
Orj., “La iha buat ida mak subar husi”.
Ka “kona-ba Ita-Boot nia liafuan”.
Orj., “talentu 120”. Haree Ap. B14.
Orj., “talentu 666”.
Orj., “siklo 600”. Haree Ap. B14.
Neʼe mak eskudu neʼebé baibain hanadór sira uza.
Orj., “mina 3”. Haree Ap. B14.
Ka “buka atu haree Salomão nia oin”.
Neʼe mak oan husi kuda-burru aman no kuda-inan.
Ka “tropa neʼebé saʼe kuda”.
Ka “tropa neʼebé saʼe kuda”.
Ka karik “Salomão nia kuda sira sosa husi rai-Ejitu no husi rai-Kue, no liurai nia negósiu-naʼin sira sosa kuda husi rai-Kue”. Karik rai-Kue mak rai-Silísia.