Primeiru Reis 1:1-53

  • David no Abisag (1-4)

  • Adonias hakarak sai liurai (5-10)

  • Natan ho Bat-Seba koʼalia ba David (11-27)

  • David fó sai katak Salomão mak sei sai liurai (28-40)

  • Adonias halai ba altár (41-53)

1  Liurai David katuas loos ona,+ no maski sira taka manta ba nia, maibé nia la sente manas.  Entaun ninia atan sira dehan ba nia: “Husik ami buka feto ida, feto virjen ida, ba ami-nia naʼi liurai, hodi nuneʼe nia sei hein no tau matan ba liurai. Nia sei toba besik liurai hodi naʼi liurai bele sente manas.”  Sira laʼo haleʼu Izraél nia área tomak hodi buka feto bonita ida, no sira hetan Abisag+ husi Sunem,+ depois neʼe, sira lori nia ba liurai.  Feto neʼe bonita tebetebes. Nia hein no tau matan ba liurai, maibé liurai la halo relasaun seksuál ho nia.  Iha tempu neʼebá Hagite nia oan-mane Adonias+ foti ninia an, dehan: “Haʼu sei sai liurai!” Nia haruka ema halo kuda-karreta ida ba nia no nia iha tropa sira neʼebé saʼe kuda, no mane naʼin-50 halai iha ninia oin.+  Maibé ninia aman nunka korrije nia,* hodi dehan: “Tanbasá mak ó halo nuneʼe?” Adonias mós mane neʼebé bonitu tebes, no nia moris depois Absalão.  Nia koʼalia ho Zeruia nia oan-mane Joab no amlulik Abiatar,+ no sira apoia no ajuda Adonias.+  Maibé amlulik Zadoc,+ Jeoada nia oan-mane Benaias,+ profeta Natan,+ Simei,+ Reí no David nia asuwaʼin sira+ la apoia Adonias.  Ikusmai Adonias hasaʼe bibi-malae, karau, no mós animál neʼebé bokur nuʼudar sakrifísiu+ besik fatuk Zoelete, neʼebé besik En-Rogel. Nia konvida ninia alin sira hotu, katak liurai nia oan-mane sira, no mós konvida liurai nia atan-mane hotu iha Judá. 10  Maibé nia la konvida profeta Natan, Benaias no David nia asuwaʼin kbiit boot sira, no nia mós la konvida ninia alin Salomão. 11  Nuneʼe Natan+ dehan ba Salomão nia inan+ Bat-Seba:+ “Ó rona ka lae, Hagite nia oan-mane Adonias+ sai ona liurai? Maibé Ita-nia naʼi David la hatene buat ida kona-ba neʼe. 12  Entaun agora, favór ida, rona ba haʼu-nia konsellu, atu nuneʼe ó bele salva ó-nia moris no mós ó-nia oan-mane Salomão nia moris.+ 13  Bá hasoru Liurai David no dehan ba nia: ‘Haʼu-nia naʼi liurai, Ita-Boot rasik mak jura ona ba Ita-nia atan-feto, hodi dehan: “Ó-nia oan-mane Salomão mak sei sai liurai, no nia mak sei tuur iha haʼu-nia kadunan hodi troka haʼu.”+ Entaun tanbasá Adonias mak sai fali liurai?’ 14  Bainhira ó sei koʼalia hela ho liurai, haʼu mós sei tama tuir ó no apoia ó-nia liafuan.” 15  Entaun Bat-Seba bá hasoru liurai iha liurai nia kuartu. Liurai katuas loos ona, no Abisag,+ feto husi Sunem, hein hela liurai. 16  Tuirmai Bat-Seba hakneʼak no hakruʼuk ba liurai, no liurai dehan: “Ó atu husu saida?” 17  Bat-Seba hatán: “Haʼu-nia naʼi, Ita-Boot rasik mak jura ona hodi Jeová, Ita-nia Maromak, no dehan ba Ita-nia atan-feto: ‘Ó-nia oan-mane Salomão mak sei sai liurai, no nia mak sei tuur iha haʼu-nia kadunan hodi troka haʼu.’+ 18  Maibé agora Adonias mak sai fali liurai, no haʼu-nia naʼi liurai la hatene buat ida kona-ba neʼe.+ 19  Nia hasaʼe ona karau, animál neʼebé bokur, no bibi-malae barak tebes nuʼudar sakrifísiu. Nia konvida liurai nia oan-mane hotu, amlulik Abiatar, no mós konvida Joab, xefe tropa nian;+ maibé nia la konvida Ita-nia atan Salomão.+ 20  Haʼu-nia naʼi liurai, agora ema Izraél hotu hein ba Ita atu fó-hatene sira kona-ba sé mak sei tuur iha liurai nia kadunan hodi troka haʼu-nia naʼi liurai. 21  Se lae, bainhira haʼu-nia naʼi liurai mate tiha,* ema sei haree kedas haʼu no mós haʼu-nia oan-mane Salomão nuʼudar traidór.” 22  Bainhira Bat-Seba sei koʼalia hela ho liurai, profeta Natan mós tama mai.+ 23  Ema fó-hatene kedas ba liurai, hodi dehan: “Profeta Natan iha neʼe!” Entaun Natan mai hamriik iha liurai nia oin no hakruʼuk ho oin ba rai. 24  Tuirmai Natan husu: “Haʼu-nia naʼi liurai, Ita-Boot mak dehan katak Adonias sei sai liurai, no sei tuur iha haʼu-nia kadunan hodi troka haʼu ka?+ 25  Ohin nia bá ona atu hasaʼe karau, animál neʼebé bokur, no bibi-malae barak tebes nuʼudar sakrifísiu.+ Nia konvida liurai nia oan-mane hotu, tropa nia xefe sira no amlulik Abiatar.+ Sira han no hemu hamutuk ho nia iha neʼebá, no sira kontinua dehan: ‘Viva Liurai Adonias!’ 26  Maibé nia la konvida haʼu, Ita-Boot nia atan, no la konvida mós amlulik Zadoc, Jeoada nia oan-mane Benaias,+ no Ita-nia atan Salomão. 27  Haʼu-nia naʼi liurai mak fó lisensa ba nia atu halo nuneʼe ka? Karik Ita-Boot hili ona nia atu tuur iha Ita-nia kadunan hodi troka Ita maibé seidauk fó-hatene ba Ita-nia atan.” 28  Liurai David hatán: “Bolu Bat-Seba mai.” Ho ida-neʼe, Bat-Seba mai no hamriik iha liurai nia oin. 29  Tuirmai liurai jura, hodi dehan: “Haʼu jura hodi Jeová, Maromak neʼebé moris, neʼebé salva ona haʼu husi susar hotu,+ 30  hanesan haʼu jura ona ba ó hodi Jeová, Izraél nia Maromak, dehan: ‘Ó-nia oan-mane Salomão mak sei sai liurai, no nia mak sei tuur iha haʼu-nia kadunan hodi troka haʼu!’ neʼe mak buat neʼebé haʼu sei halo ohin.” 31  Tuirmai Bat-Seba hakneʼak no hakruʼuk ho oin ba rai iha liurai nia oin no dehan: “Haʼu harohan katak haʼu-nia naʼi Liurai David moris ba nafatin!” 32  Liurai David dehan kedas: “Bolu amlulik Zadoc, profeta Natan, no Jeoada nia oan-mane Benaias+ mai.”+ Entaun sira mai iha liurai nia oin. 33  Liurai hatete ba sira: “Lori haʼu-nia atan sira hamutuk ho imi, no haruka haʼu-nia oan-mane Salomão saʼe haʼu-nia kuda-mula,*+ no lori nia ba Jion.+ 34  Iha neʼebá amlulik Zadoc no profeta Natan sei fui mina* ba nia+ nuʼudar liurai ba Izraél. Tuirmai imi tenke huu dikur no dehan: ‘Viva Liurai Salomão!’+ 35  Depois neʼe, imi tenke fila ho nia, no nia sei mai tuur iha haʼu-nia kadunan; nia sei sai liurai hodi troka haʼu, no haʼu sei fó knaar ba nia nuʼudar ulun-naʼin ba Izraél no Judá.” 36  Jeoada nia oan-mane Benaias hatete kedas ba liurai: “Amen! Haʼu harohan katak Jeová, haʼu-nia naʼi liurai nia Maromak, sei apoia ida-neʼe. 37  Haʼu hein katak Jeová sei hamutuk ho Salomão+ hanesan nia hamutuk ho haʼu-nia naʼi liurai, no nia sei halo Salomão nia kadunan sai kmanek liu haʼu-nia naʼi Liurai David nia kadunan.”+ 38  Tuirmai amlulik Zadoc, profeta Natan, Jeoada nia oan-mane Benaias,+ ema Kereti no ema Peleti,+ bá haruka Salomão saʼe Liurai David nia kuda-mula,+ no sira lori Salomão ba Jion.+ 39  Amlulik Zadoc foti dikur neʼebé mina iha laran+ husi tenda+ no fui mina* neʼe ba Salomão,+ no sira komesa huu dikur, no povu hotu komesa hakilar dehan: “Viva Liurai Salomão!” 40  Depois neʼe, povu hotu laʼo fila hodi tuir Salomão, sira huu flauta no kontente tebetebes, tan neʼe rai nakdoko* tanba sira-nia lian barullu.+ 41  Bainhira Adonias no ema hotu neʼebé nia konvida han hotu ona, sira rona lian neʼe.+ Bainhira rona dikur nia lian, Joab dehan kedas: “Tanbasá mak iha lian barullu iha sidade neʼe?” 42  Bainhira nia koʼalia hela, amlulik Abiatar nia oan-mane Jonatan+ mai. Tuirmai Adonias dehan: “Tama mai, tanba ó mak mane neʼebé diʼak,* no haʼu fiar ó lori liafuan diʼak.” 43  Maibé Jonatan hatán ba Adonias: “Lae! Ita-nia naʼi Liurai David hili ona Salomão sai liurai. 44  Liurai haruka amlulik Zadoc, profeta Natan, Jeoada nia oan-mane Benaias, ema Kereti no ema Peleti atu bá hamutuk ho Salomão, no sira haruka nia saʼe liurai nia kuda-mula.+ 45  Tuirmai amlulik Zadoc no profeta Natan fui mina* ba nia nuʼudar liurai iha Jion. Depois neʼe, sira fila fali husi neʼebá ho haksolok, tan neʼe mak sidade neʼe barullu. Neʼe mak lian neʼebé imi rona. 46  Liután neʼe, Salomão tuur ona iha liurai nia kadunan. 47  Laʼós neʼe deʼit, liurai nia atan sira tama ona hodi fó parabéns ba ita-nia naʼi Liurai David, hodi dehan: ‘Ami hein katak Ita-nia Maromak sei halo Salomão sai naran-boot liu fali Ita-nia naran, no nia sei halo Salomão nia kadunan sai kmanek liu fali Ita-nia kadunan!’ Ho ida-neʼe, liurai hakruʼuk iha ninia kama. 48  No liurai mós dehan: ‘Fó hahiʼi ba Jeová, Izraél nia Maromak, tanba ohin nia fó ona ema ida atu tuur iha haʼu-nia kadunan no nia husik haʼu haree ida-neʼe ho haʼu-nia matan rasik!’” 49  Ema hotu neʼebé Adonias konvida sai taʼuk, no sira ida-idak hamriik no sai husi neʼebá. 50  Adonias mós sai taʼuk tanba Salomão, entaun nia hamriik no bá altár, no nia kaer metin altár nia dikur sira.+ 51  Ema fó-hatene Salomão, hodi dehan: “Adonias sai taʼuk ba Liurai Salomão. Nia kaer metin hela altár nia dikur sira, hodi dehan: ‘Husik Liurai Salomão jura uluklai mai haʼu katak nia sei la oho ninia atan neʼe ho surik.’” 52  Ho ida-neʼe, Salomão dehan: “Se ninia hahalok diʼak, ninia fuuk-lahan ida mós sei la monu ba rai. Maibé se nia halo sala,+ nia tenke mate.” 53  Entaun Liurai Salomão haruka ema atu lori nia tun husi altár. Tuirmai nia tama no hakruʼuk ba Liurai Salomão, depois neʼe, Salomão hatete ba nia: “Fila ba ó-nia uma.”

Nota-rodapé

Ka “nunka hakanek ninia laran”.
Orj., “latan hamutuk ho ninia beiʼala sira”.
Ka “kuda-mula inan”. Neʼe mak oan husi kuda-burru aman no kuda-inan.
Orj., “rai nakfera”.
Ka “folin-boot”.