Éxodo 15:1-27

  • Moisés no ema Izraél nia knananuk (1-19)

  • Miriam hatán ho knananuk (20, 21)

  • Bee moruk sai fali midar (22-27)

15  Iha tempu neʼebá, Moisés no ema Izraél kanta knananuk tuirmai neʼe ba Jeová:+ “Haʼu sei kanta ba Jeová, tanba ninia glória mak boot tebes.+ Nia soe tiha kuda no tropa neʼebé saʼe kuda ba tasi kleʼan.+   Jah* mak haʼu-nia forsa no kbiit, tanba nia salva haʼu.+ Nia mak haʼu-nia Maromak, haʼu sei hahiʼi nia,+ haʼu sei fó glória ba haʼu-nia aman nia Maromak.+   Jeová mak funu-naʼin neʼebé kbiit boot.+ Ninia naran mak Jeová.+   Nia soe tiha Faraó nia kuda-karreta no ninia tropa ba tasi,+No ninia funu-naʼin sira neʼebé diʼak liu mout tiha iha Tasi Mean.+   Tasi nia laloran taka sira, sira mout hanesan fatuk ida iha bee kleʼan.+   Oh Jeová, Ita-nia liman-loos mak iha kbiit boot,+Oh Jeová, Ita-nia liman-loos bele harahun inimigu.   Ita bele soe tun ema neʼebé hamriik hasoru Ita ho Ita-nia kbiit neʼebé boot,+Ita-nia hirus lakan makaʼas hodi han sira hanesan duʼut-maran.*   No ho iis husi Ita-nia inus mak bee iha tasi butuk hamutuk,Bee hamriik metin hanesan didin neʼebé hanetik bee,No laloran boot sira sai metin iha tasi klaran.   Inimigu dehan: ‘Haʼu sei duni tuir sira! Haʼu sei toman sira! Haʼu sei fahe sasán neʼebé haʼu hadau husi sira toʼo haʼu kontente! Haʼu sei losu haʼu-nia surik! Ho haʼu-nia liman haʼu sei domina sira!’+ 10  Ita huu tasi ho Ita-nia iis, no tasi taka sira,+Sira mout hanesan besi todan* iha tasi neʼebé boot. 11  Oh Jeová, husi maromak sira hotu, sé mak hanesan ho Ita?+ Sé mak hanesan ho Ita neʼebé santu liu hotu?+ Ita mak Maromak neʼebé ema tenke hamtaʼuk ho knananuk hahiʼi nian, Maromak neʼebé halo buat kmanek sira.+ 12  Ita lolo Ita-nia liman-loos, no rai tolan sira hotu.+ 13  Ho Ita-nia domin neʼebé laran-metin mak Ita lori povu neʼebé Ita salva ona,+Ho Ita-nia kbiit mak Ita sei dirije sira ba Ita-nia hela-fatin neʼebé santu. 14  Povu sira sei rona,+ no sai nakdedar,Ema Filístia sei sente laran-taridu.* 15  Iha tempu neʼebá Edom nia xefe* sira sei sai taʼuk tebes,No Moab nia ukun-naʼin neʼebé iha kbiit boot* sei sai nakdedar.+ Ema Kanaan hotu sei lakon aten-brani.+ 16  Oh Jeová, sira sei sai taʼuk no nakdedar.+ Tanba ho Ita-nia liman neʼebé forte, sira sei la book an hanesan fatuk idaToʼo Ita-nia povu laʼo liu,Toʼo povu neʼebé Ita hili+ laʼo liu tiha.+ 17  Oh Jeová, Ita sei lori sira no tau sira iha foho neʼebé nuʼudar Ita-nia liman-rohan,+Fatin neʼebé Ita harii metin ona neʼebé Ita prepara ba Ita-nia an rasik atu hela,Fatin sagradu neʼebé Ita harii metin ho Ita-nia liman rasik, oh Jeová. 18  Jeová sei ukun nuʼudar liurai tinan ba tinan ba nafatin.+ 19  Bainhira Faraó nia kuda sira, hamutuk ho ninia kuda-karreta funu nian no tropa neʼebé saʼe kuda tama ba tasi,+Jeová halo tasi taka fali sira,+Maibé povu Izraél laʼo iha rai maran liuhusi tasi klaran.”+ 20  Tuirmai Arão nia biin, profeta Miriam, foti tamborín, no feto hotu laʼo tuir nia ho tamborín no dansa. 21  Miriam kanta hodi hatán ba mane sira: “Kanta ba Jeová, tanba ninia glória mak boot tebes.+ Nia soe kuda no tropa neʼebé saʼe kuda ba tasi kleʼan.”+ 22  Depois neʼe, Moisés lori ema Izraél sai husi Tasi Mean, no sira laʼo ba rai-fuik Sur no sira laʼo loron tolu iha rai-fuik, maibé sira la hetan bee. 23  Tuirmai sira toʼo iha Mara,*+ maibé sira labele hemu bee iha Mara tanba bee neʼe moruk. Tan neʼe mak nia hanaran fatin neʼe Mara. 24  Entaun povu hahú muramura hasoru Moisés+ no dehan: “Ami sei hemu saida?” 25  Moisés bolu Jeová,+ no Jeová hatudu ba nia ai-hun ida. No bainhira nia soe ai neʼe ba bee, bee neʼe sai midar. Maromak halo buat neʼebé akontese neʼe sai nuʼudar ezemplu atu nuneʼe povu bele hatene Maromak nia tesi-lia. Maromak koko sira atu haree se sira halo tuir nia ka lae.+ 26  Nia dehan ba sira: “Se imi rona didiʼak ba haʼu, Jeová, imi-nia Maromak, nia lian no halo buat neʼebé loos tuir haʼu-nia haree no halo tuir haʼu-nia mandamentu sira no ukun-fuan hotu,+ haʼu sei la lori ba imi moras sira neʼebé haʼu lori ba ema Ejitu,+ tanba haʼu Jeová mak kura imi.”+ 27  Depois neʼe, sira toʼo iha Elim, no fatin neʼe iha bee-matan 12 no iha ai-palmeira hun 70. Entaun sira hela iha neʼebá besik bee.

Nota-rodapé

“Jah” mak naran badak ba Jeová.
Orj., “duʼut-kain”.
Ka “besi-makdadi”.
Orj., “moras tuur-ahi nian”.
Ka “xeik”. Neʼe refere ba xefe ba suku ida.
Ka “ukun-naʼin neʼebé laran-aat”.
Naran neʼe katak “Moruk”.