Marcos 12:1-44

12  No nia hahú koʼalia ba sira ho ai-knanoik, dehan: “Mane ida halo toʼos uvas nian, no nia tau lutu haleʼu, no keʼe fatin sama uvas nian no harii mós uma aas ida,* depois neʼe nia fó-aluga* ba toʼos-atan sira, no laʼo ba rai liʼur.  Kuandu tempu koʼa nian toʼo ona, nia haruka ninia ema ida ba toʼos-atan sira, atu nuneʼe nia bele hetan uvas-fuan balu husi toʼos-atan sira.  Maibé, sira kaer nia, baku nia, no haruka nia fila ho liman-mamuk.  No nia haruka ema seluk tan ba sira, no sira baku ema neʼe nia ulun no hamoe nia.  No nia haruka ida seluk tan, no sira oho ema neʼe. No nia haruka ema barak tan, maibé toʼos-atan baku sira balu no oho balu seluk.  Nia iha tan ema ida, neʼe mak ninia oan-mane neʼebé nia hadomi. Nia haruka ninia oan neʼe ba sira, hodi hanoin: ‘Sira sei respeitu haʼu-nia oan.’  Maibé toʼos-atan sira koʼalia ba malu dehan: ‘Nia mak ida neʼebé sei simu toʼos neʼe nuʼudar liman-rohan. Mai ita oho tiha nia, no ninia liman-rohan sei sai ita-nian.’  Entaun sira kaer no oho nia, no soe nia ba toʼos nia liʼur.  Saida mak toʼos-naʼin sei halo? Nia sei mai no oho toʼos-atan sira, no nia sei fó toʼos uvas nian ba ema seluk. 10  Imi seidauk lee buat neʼebé eskritura dehan ka? Basá eskritura hatete: ‘Fatuk neʼebé badain sira la simu, neʼe sai ona fatuk neʼebé importante liu.* 11  Ida-neʼe mai husi Jeová, no ida-neʼe furak tebes iha ita-nia matan.’” 12  Ho ida-neʼe, sira buka dalan atu kaer nia, basá sira hatene katak nia koʼalia kona-ba sira kuandu nia konta ai-knanoik neʼe. Maibé sira taʼuk ema-lubun, entaun sira sai no husik nia. 13  Tuirmai sira haruka ema farizeu balu no mós ema neʼebé apoia Herodes hodi bá hasoru nia, atu nuneʼe sira bele hetan sala husi ninia liafuan. 14  Kuandu sira toʼo, sira dehan ba nia: “Mestre, ami hatene katak Ita-Boot sempre koʼalia buat loos no Ita la todan ba sorin, tanba Ita la tesi lia tuir deʼit buat neʼebé matan haree, maibé Ita hanorin Maromak nia dalan hodi tuir lia-loos. Entaun, sala ka lae atu selu impostu ba Liurai Roma nian?* 15  Ami tenke selu ka lae?” Tanba hatene sira-nia laran-aat, nia hatete ba sira: “Tansá mak imi koko haʼu? Lori mai haʼu osan denáriu ida atu haʼu haree.” 16  Sira fó ida ba nia. No nia hatete ba sira: “Sé-nia oin no naran mak neʼe?” Sira hatán: “Liurai Roma nian.” 17  Tuirmai Jesus hatete: “Fó ba Liurai Roma buat neʼebé Liurai Roma nian, no ba Maromak buat neʼebé Maromak nian.” Ho ida-neʼe sira hakfodak tebes kona-ba nia. 18  Tuirmai, ema saduseu* sira, neʼebé dehan katak la iha moris-hiʼas, mai no husu nia: 19  “Mestre, Moisés hakerek mai ita katak se ema ida nia maun mate no husik hela nia feen no la iha oan, ninia alin* tenke hola feto neʼe no iha oan ba ninia maun. 20  Iha maun-alin naʼin-hitu, no ida primeiru hola feto, maibé kuandu nia mate nia la iha oan. 21  No ida segundu mós hola feto-faluk neʼe, maibé kuandu nia mate, nia la iha oan. Nuneʼe mós ho ida terseiru. 22  No sira naʼin-hitu hotu la iha oan. Ikusmai feto neʼe mós mate. 23  Entaun, iha tempu moris-hiʼas nian, husi sira naʼin-hitu neʼe, feto neʼe sei sai sé-nia feen loos? Basá sira naʼin-hitu hotu kaben ho nia.” 24  Jesus hatete ba sira: “Imi hanoin sala tanba imi la hatene Eskritura no mós la hatene Maromak nia kbiit. 25  Kuandu sira moris hiʼas husi mate, mane sira sei la kaben no feto sira sei la sai ema nia kaben, maibé sira sei sai hanesan anju sira iha lalehan. 26  Imi seidauk lee istória neʼebé Moisés hakerek kona-ba ai-hun* neʼebé lakan ka? Maromak koʼalia kona-ba mate sira neʼebé sei moris hiʼas kuandu nia dehan ba Moisés: ‘Haʼu mak Abraão nia Maromak no Isaac nia Maromak no Jacob nia Maromak.’ 27  Nia laʼós Maromak ba ema neʼebé mate, maibé Maromak ba ema neʼebé moris. Imi-nia hanoin sala duni.” 28  No eskriba ida iha sira-nia leet rona sira diskute malu, no nia haree katak Jesus hatán ba sira iha dalan neʼebé diʼak, entaun nia husu ba Jesus: “Mandamentu ida-neʼebé mak ulukliu hotu?” 29  Jesus hatán: “Ida ulukliu mak: ‘Rona bá, oh Izraél, Jeová mak ita-nia Maromak, no iha Jeová ida deʼit. 30  No ó tenke hadomi Jeová ó-nia Maromak ho ó-nia laran tomak, ho ó-nia moris* tomak, ho ó-nia neon tomak, no ho ó-nia kbiit tomak.’ 31  Ida tuirmai mak: ‘Ó tenke hadomi ó-nia maluk hanesan ó-nia an rasik.’ La iha mandamentu neʼebé boot liu fali sira-neʼe.” 32  Eskriba neʼe hatete ba nia: “Mestre, buat neʼebé Ita dehan tuir duni lia-loos: ‘Maromak mak Ida deʼit, no la iha ida seluk neʼebé hanesan Nia’, 33  no kona-ba hadomi Maromak ho laran tomak, ho neon tomak,* no ho kbiit tomak, no mós hadomi ita-nia maluk hanesan ita-nia an rasik mak folin-boot liu fali sakrifísiu animál nian no sakrifísiu sunu nian hotu.” 34  Jesus haree katak nia hatán ho matenek, neʼe duni Jesus dehan ba nia: “Ó la dook husi Maromak nia Ukun.” Maibé, ema ida la brani atu husu tan pergunta ba nia. 35  No nuʼudar Jesus kontinua hanorin iha templu, nia dehan: “Tansá mak ema eskriba sira hatete katak Kristu mak David nia oan? 36  Liuhusi espíritu santu David rasik dehan: ‘Jeová hatete ba haʼu-nia Naʼi: “Tuur iha haʼu-nia liman-loos toʼo haʼu tau ó-nia inimigu sira iha ó-nia ain okos.”’ 37  David rasik bolu nia Naʼi, entaun oinsá mak nia David nia oan?” No ema-lubun neʼe rona ba nia ho kontente. 38  No nuʼudar nia hanorin, nia dehan tan: “Matan-moris bá, tanba eskriba sira laʼo bá-mai ho unuk neʼebé naruk no hakarak ema kumprimenta sira iha merkadu, 39  no iha sinagoga laran, sira gosta atu tuur iha oin. No kuandu sira han iha festa, sira mós hakarak tuur iha fatin neʼebé importante liu. 40  Sira mak hadau feto-faluk sira-nia sasán,* no halo orasaun naruk iha ema nia oin. Sira sei hetan kastigu neʼebé makaʼas liu.” 41  Tuirmai nia tuur, no husi fatin neʼe nia bele haree osan-fatin sira. Nia haree ema barak tau osan ba osan-fatin. No ema riku sira tau osan-besi barak. 42  No feto-faluk kiak ida mai, hodi tau osan kiʼik rua ho folin neʼebé kiʼik tebes. 43  No Jesus bolu ninia dixípulu hodi dehan ba sira: “Haʼu hatete loloos ba imi katak feto-faluk kiak neʼe tau barak liu fali sira seluk neʼebé tau osan ba osan-fatin. 44  Basá sira hotu tau buat neʼebé resin husi sira-nia rikusoin, maibé feto-faluk neʼe, maski nia kiak, nia fó buat hotu neʼebé nia iha.”

Nota-rodapé

Mc 12:1 Neʼe mak fatin atu hein toʼos, hodi nuneʼe naʼok-teen no animál sira sei la tama ba toʼos.
Mc 12:1 Karik toʼos-atan sira promete atu fó uvas-fuan balu nuʼudar folin atu aluga.
Mc 12:10 Haree nota-rodapé iha Mt 21:42.
Mc 12:14 Iha lia-gregu dehan katak, “César”.
Mc 12:18 Haree Apéndise 14.
Mc 12:19 Bíblia la fó sai se maun ka alin mak mate.
Mc 12:26 Ida-neʼe koʼalia kona-ba ai-hun neʼebé iha tarak.
Mc 12:30 Lia-gregu, psiké. Haree Apéndise 7A.
Mc 12:33 Iha lia-gregu dehan katak, “kbiit atu komprende”.
Mc 12:40 Iha lia-gregu dehan katak, “tolan feto-faluk nia uma”.