Judas 1:1-25

 Husi Judas, Tiago nia alin, no Jesus Kristu nia atan ida, hakerek ba sira neʼebé Aman Maromak hili ona no hadomi, no neʼebé nia tau matan atu sira bele sai ida deʼit ho Jesus Kristu.  Haʼu harohan katak Maromak haraik liután ninia laran-sadiʼa, dame no domin ba imi.  Maluk doben sira, uluk haʼu hakarak tebes hakerek ba imi kona-ba oinsá Maromak sei salva ita, maibé haʼu haree katak haʼu presiza hakerek hodi fó laran-manas ba imi, atu imi luta makaʼas hodi defende fiar neʼebé fó ona ba santu sira dala ida ba nafatin.  Haʼu hakerek ba imi tanba ema balu tama ona iha imi-nia leet. Sira mak ema neʼebé Eskritura fó-hatene horiuluk kedas atu hetan tesi-lia. Ema aat sira-neʼe uza sala Maromak nia laran-diʼak hodi halo hahalok neʼebé la iha moe no hatudu hahalok la laran-metin ba ita-nia Naʼi Jesus Kristu neʼebé sosa ona ita.  Haʼu hakarak fó-hanoin imi, maski imi hatene didiʼak ona ida-neʼe, katak Jeová salva povu ida husi rai-Ejitu, maibé ikusmai nia halakon tiha sira neʼebé la hatudu fiar.  No kona-ba anju sira neʼebé la kaer metin ba sira-nia pozisaun uluk nian hodi husik tiha sira-nia hela-fatin neʼebé loos, nia kesi metin sira nafatin iha nakukun laran toʼo tempu atu tesi lia ba sira iha loron boot.  Nuneʼe mós ho Sodoma no Gomorra no sidade neʼebé besik sira, sira mós saran sira-nia an ba sala-foʼer no halo tuir deʼit sira-nia isin nia hakarak neʼebé sala. Sira hetan kastigu ho ahi rohan-laek nian,* no neʼe sai nuʼudar avizu ba ita.  Maski nuneʼe, ema sira-neʼe tuir deʼit sira-nia hanoin la loos,* halo hahalok foʼer, la halo tuir ulun-naʼin sira, no koʼalia aat sira neʼebé Maromak hafolin.  Maibé kuandu arkanju* Miguel haksesuk malu ho Diabu kona-ba Moisés nia mate-isin, nia lakohi atu tesi lia no koʼalia aat Diabu, maibé nia hatete: “Jeová sei fó kastigu ba ó.” 10  Maibé ema sira-neʼe koʼalia aat kona-ba buat hotu neʼebé sira loloos la hatene. No hanesan animál neʼebé la bele hanoin, sira komprende deʼit buat neʼebé sira sente, no sira kontinua halo aat ba sira-nia an ho buat sira-neʼe. 11  Susar ba sira, tanba sira halo tuir ona Caim nia dalan, no sira halai lalais atu tuir Balám nia dalan neʼebé sala tanba hakarak simu kolen, no hanesan Kora, sira koʼalia aat naʼi-ulun sira, no tan neʼe sira lakon ona! 12  Ema sira-neʼe han hamutuk ho imi iha festa neʼebé imi halo atu hatudu imi-nia domin, maibé sira hanesan fatuk neʼebé subar iha bee okos. Sira mós hanesan bibi-atan neʼebé la moe hodi hanoin deʼit sira-nia kabun, no sira hanesan kalohan neʼebé la lori udan no neʼebé anin huu bá-mai; sira hanesan ai neʼebé la iha fuan maski iha nia tempu, neʼebé mate dala rua* no fokit sai ona. 13  Hanesan laloran fuik tasi nian hasai furin, sira hasai hahalok neʼebé la iha moe; sira hanesan fitun neʼebé laʼo arbiru deʼit no sei hatama tiha iha fatin neʼebé nakukun tebes ba nafatin. 14  Sin, Enoc, neʼebé nuʼudar jerasaun hitu husi Adão, nia mós fó-hatene nanis kona-ba sira, hodi hatete: “Haree! Jeová mai ho ninia anju santu sira rihun ba rihun 15  atu tesi lia ba ema hotu, hodi hamonu kastigu ba ema aat hotu tanba hahalok aat sira neʼebé sira halo no tanba buat aat hotu neʼebé ema aat sira koʼalia hasoru nia.” 16  Ema sira-neʼe muramura, no la kontente ho buat neʼebé sira simu. Sira halo tuir deʼit sira-nia hakarak rasik, no husi sira-nia ibun sira gaba an no koʼalia buat furak kona-ba ema seluk atu sira bele manán buat ruma. 17  Maibé ba imi, maluk doben sira, hanoin-hetan liafuan sira neʼebé uluk hatoʼo ba imi husi ita Naʼi Jesus Kristu nia apóstolu sira. 18  Sira hatete beibeik ba imi katak: “Iha tempu nia rohan, ema gozadór sira sei mosu mai, no sira sei halo tuir deʼit sira-nia hakarak rasik hodi halo buat neʼebé aat.” 19  Sira halo ema haketak malu, sira hatudu hahalok hanesan animál, no sira la iha Maromak nia espíritu. 20  Maibé imi, maluk doben sira, hametin imi-nia fiar neʼebé santu no halo orasaun tuir espíritu santu.* 21  Hodi nuneʼe, imi bele hela nafatin iha Maromak nia domin, nuʼudar imi hein ita Naʼi Jesus Kristu nia laran-sadiʼa neʼebé lori ita ba moris rohan-laek. 22  Imi mós kontinua hatudu laran-sadiʼa ba ema neʼebé duvida. 23  Salva sira hodi hasai sira husi ahi. No kontinua hatudu laran-sadiʼa ba ema seluk, maibé iha tempu hanesan halo ida-neʼe ho laran-taʼuk, nuʼudar imi odi sira-nia hatais neʼebé iha noda husi hahalok aat. 24  Maromak bele proteje imi atu labele sidi no bele halo imi hamriik ho ksolok nuʼudar ema neʼebé moos iha ninia futar-oin. 25  No iha Maromak mesak ida deʼit, nia mak ita-nia Salvadór liuhusi Jesus Kristu ita-nia Naʼi. Maromak deʼit mak merese glória, kmanek, forsa no direitu atu ukun, husi tempu uluk kedas, agora no ba nafatin. Amen.

Nota-rodapé

Jud 7 Neʼe koʼalia kona-ba lakon ba nafatin. Haree mós Apéndise 9.
Jud 8 Ka “mehi”.
Jud 9 Haree Apéndise 14.
Jud 12 Ka, “mate ona”.
Jud 20 Lia-gregu, pneuma. Haree Apéndise 7B.