Apokalipse 7:1-17

7  Depois neʼe haʼu haree anju haat hamriik iha rai nia sikun haat hodi kaer metin hela anin haat husi rai neʼe, atu nuneʼe la iha anin ida neʼebé huu ba rai ka ba tasi ka ba ai-hun sira.  No haʼu haree anju ida seluk mosu husi lorosaʼe, no nia kaer hela buat neʼebé nia simu husi Maromak atu tau marka ba ema; no nia bolu ho lian makaʼas ba anju haat neʼebé simu ona kbiit atu halo aat ba rai no tasi,  no dehan: “Keta halo aat ba rai ka tasi ka ba ai-hun sira toʼo ami tau tiha marka ba ita-nia Maromak nia atan sira-nia reen-toos.”  No haʼu rona númeru husi sira neʼebé hetan marka, neʼe mak ema naʼin-144.000, no sira mai husi suku hotu husi Izraél nia oan sira:  Husi suku Judá ema naʼin-12.000 mak hetan marka;husi suku Ruben ema naʼin-12.000;husi suku Gad ema naʼin-12.000;  husi suku Aser ema naʼin-12.000;husi suku Neftali ema naʼin-12.000;husi suku Manase ema naʼin-12.000;  husi suku Simeão ema naʼin-12.000;husi suku Levi ema naʼin-12.000;husi suku Issacar ema naʼin-12.000;  husi suku Zabulon ema naʼin-12.000;husi suku José ema naʼin-12.000;husi suku Benjamin ema naʼin-12.000 mak hetan marka.  No depois buat sira-neʼe, haʼu haree ema-lubun boot neʼebé la bele sura, neʼebé mai husi nasaun, suku, povu no lian hotu, sira hamriik iha kadunan nia oin no iha Bibi-Oan nia oin, sira hatais unuk mutin; no sira kaer ai-palmeira sanak iha sira-nia liman. 10  No sira kontinua haklalak ho lian makaʼas dehan: “Salvasaun mai husi ita-nia Maromak neʼebé tuur iha kadunan, no husi Bibi-Oan.” 11  No anju hotu hamriik haleʼu kadunan no haleʼu katuas sira no mós haleʼu anju haat, no sira hakneʼak ho oin ba rai iha kadunan nia oin hodi adora Maromak. 12  No sira dehan: “Amen! Ita-nia Maromak neʼebé iha matenek no kbiit tenke simu hahiʼi no glória, no kriatura hotu tenke fó hahiʼi ba nia no hatudu agradese nafatin ba nia. Amen.” 13  No katuas sira-neʼe ida husu haʼu dehan: “Ó hatene sé mak sira neʼebé hatais unuk mutin neʼe? Sira mai husi neʼebé?” 14  Haʼu hatán kedas ba nia: “Haʼu-nia naʼi, Ita mak hatene ida-neʼe.” No nia dehan ba haʼu: “Sira mak ema neʼebé liu terus boot, no sira fase tiha ona sira-nia unuk no halo mutin ona ho Bibi-Oan nia raan. 15  Tan neʼe mak sira hamriik iha Maromak nia kadunan nia oin; no sira halo serbisu santu ba nia loron no kalan iha ninia templu; no Ida neʼebé tuur iha kadunan sei prepara tenda ida ba sira atu proteje sira. 16  No sira sei la hamlaha no la hamrook tan, no loro-matan sei la sai manas liu ba sira, 17  tanba Bibi-Oan neʼebé iha kadunan neʼe nia sorin sei tau matan sira hanesan bibi-atan no sei dirije sira ba bee-matan moris nian. No Maromak sei hamaran matan-been hotu husi sira-nia matan.”

Nota-rodapé