Roma 9:1-33
9 Haʼu koʼalia lia-loos nuʼudar Kristu nia dixípulu; haʼu la bosok, tanba liuhusi espíritu santu haʼu-nia konxiénsia fó sasin
2 katak haʼu laran-triste tebes no fuan moras loos.
3 Haʼu prontu atu simu kastigu neʼebé haʼu-nia maun-alin sira merese atu hetan, katak haʼu-nia maun-alin ema Judeu sira neʼebé la halo tuir Kristu, se ida-neʼe ajuda sira.
4 Sira mak ema Izraél neʼebé Maromak hili nuʼudar oan-hakiak.+ Maromak fó glória ba sira, no halo aliansa ho sira,+ no fó Ukun-Fuan ba sira.+ Sira halo serbisu sagradu+ ba nia no nia fó promesa ba sira.+
5 Sira mai husi ita-nia beiʼala sira,+ no Kristu mós moris mai husi beiʼala sira-neʼe.+ Maromak, neʼebé aas liu hotu, hetan hahiʼi ba nafatin. Amen.
6 Maibé, neʼe la dehan katak Maromak nia liafuan la sai loos ona. Tanba laʼós ema hotu neʼebé mai husi Izraél mak “Izraél” neʼebé loloos.+
7 Maski sira mak Abraão nia bei-oan, maibé laʼós sira hotu mak Abraão nia oan loloos,+ hanesan hakerek nanis ona: “Bei-oan neʼebé promete ona ba ó sei mai liuhusi Isaac.”+
8 Neʼe katak, laʼós Abraão nia oan tuir isin mak Maromak nia oan loloos,+ maibé sira neʼebé moris liuhusi promesa,+ sira mak Abraão nia bei-oan loloos.
9 Tanba Maromak fó promesa tuirmai neʼe: “Iha tempu hanesan neʼe, haʼu sei mai no Sara sei iha oan-mane ida.”+
10 Laʼós neʼe deʼit, maibé husi ita-nia beiʼala Isaac, Rebeca koʼus oan-mane kaduak.+
11 Maromak deside ona oinsá atu hili ema ida, no ida-neʼe la depende ba ema neʼe nia serbisu. Maibé nia rasik sei hili ida neʼebé nia bolu. Tan neʼe, kuandu sira naʼin-rua seidauk moris ka seidauk halo buat neʼebé diʼak ka aat,
12 Maromak dehan ba Rebeca: “Ida primeiru sei sai atan ba ida segundu.”+
13 Neʼe hanesan hakerek nanis ona: “Haʼu hadomi Jacob, maibé odi Esaú.”+
14 Entaun, ita sei dehan saida? Maromak nia hahalok la loos ka? Lae duni!+
15 Nia dehan ba Moisés: “Haʼu sei hatudu laran-sadiʼa ba ema neʼebé haʼu hakarak hatudu laran-sadiʼa, no haʼu sei hatudu laran-diʼak ba ema neʼebé haʼu hakarak hatudu laran-diʼak.”+
16 Entaun, ida-neʼe depende ba Maromak, neʼebé iha laran-sadiʼa, laʼós depende ba ema nia hakarak ka ema nia hakaʼas an.*+
17 Tanba eskritura dehan ba Faraó:* “Tan razaun tuirmai neʼe mak haʼu sei husik ó moris: atu liuhusi ó mak haʼu bele hatudu haʼu-nia kbiit, no atu haʼu-nia naran bele fó sai iha mundu tomak.”+
18 Entaun, nia hatudu laran-sadiʼa ba ema neʼebé nia hakarak, maibé nia husik ema seluk sai ulun-toos.+
19 Entaun imi sei dehan ba haʼu: “Tanbasá mak Maromak fó-sala ba ema? Sé mak bele kontra Maromak nia hakarak?”
20 Maibé ó mak sé hodi hatán fali ba Maromak?+ Sasán neʼebé ema halo bele dehan fali ba ema neʼe: “Tanbasá mak ó halo haʼu hanesan neʼe?”+
21 Imi la hatene ka? Badaen iha kbiit atu uza rai-mean ida deʼit+ hodi halo sanan-rai neʼebé uza iha tempu espesiál, no mós sanan-rai neʼebé uza iha tempu baibain, loos ka lae?
22 Nuneʼe mós ho Maromak. Maromak hakarak hatudu sai ninia laran-nakali ba ema no halo ema hatene ninia kbiit, maibé, nia tahan ho pasiénsia ba ema neʼebé hanesan sanan-rai no merese atu halakon tiha.
23 Nia halo ida-neʼe atu hatudu sai ninia glória neʼebé boot ba ema neʼebé hanesan sanan-rai* neʼebé nia hatudu laran-sadiʼa,+ no sira sei simu kolen neʼebé nia prepara ona ba sira.
24 Ema neʼe mak ita neʼebé nia bolu ona, laʼós deʼit husi ema Judeu, maibé mós husi nasaun seluk.+
25 Hanesan nia mós dehan iha livru Oseias: “Sira neʼebé laʼós haʼu-nia povu+ haʼu sei bolu ‘haʼu-nia povu’, no feto neʼebé haʼu la hadomi haʼu sei bolu nuʼudar ‘doben’.+
26 No iha fatin neʼebé uluk haʼu dehan ba sira: ‘Imi laʼós haʼu-nia povu’, iha fatin neʼe mak haʼu sei bolu sira ‘oan husi Maromak neʼebé moris’.”+
27 Liután neʼe, Isaias fó sai kona-ba Izraél, hodi dehan: “Maski ema Izraél sira sai barak hanesan rai-henek iha tasi, maibé sira uitoan deʼit mak sei hetan salvasaun.+
28 Tanba Jeová* sei tesi-lia ba sira neʼebé hela iha rai, no nia sei halo hotu ida-neʼe ho lalais.”+
29 Isaias mós fó-hatene nanis ona, hodi dehan: “Se Jeová* neʼebé ukun tropa lalehan nian la husik bei-oan balu atu moris hela, ita sai ona hanesan Sodoma, no ita sei haree hanesan Gomorra.”+
30 Entaun, ita sei dehan saida? Maski ema husi nasaun seluk la buka atu sai ema laran-loos, maibé sira sai ona ema laran-loos+ iha Maromak nia oin tanba fiar.+
31 Maibé kona-ba ema Izraél, maski sira buka atu halo buat loos hodi tuir ukun-fuan, maibé sira la kumpre ukun-fuan.
32 Tanba razaun saida? Tanba sira hanoin katak sira bele sai ema laran-loos liuhusi hahalok, laʼós liuhusi fiar. Sira sidi iha “fatuk sidi nian”,+
33 hanesan hakerek nanis ona: “Haʼu tau fatuk+ sidi nian iha Siaun no fatuk boot neʼebé halo sira monu, maibé ema neʼebé tau fiar ba nia sei la sai triste.”+
