Lamentasaun 3:1-66
-
Jeremias fó sai ninia sentimentu no esperansa
א [Alef]
3 Haʼu mak mane neʼebé haree ona povu nia terus tanba Maromak nia ai-tonka hirus nian.
2 Nia duni sai ona haʼu no halo haʼu laʼo iha nakukun laran, laʼós iha naroman.+
3 Tuir loloos, nia foti liman hodi kontra beibeik haʼu loron tomak.+
ב [Bet]
4 Nia halo haʼu-nia isin sai fraku no haʼu-nia kulit sai namkurut;Nia halo tohar haʼu-nia ruin sira.
5 Nia halo serku ona ba haʼu; nia tau venenu moruk+ no hamosu susar haleʼu haʼu.
6 Nia obriga haʼu tuur iha nakukun laran, hanesan ema neʼebé mate kleur ona.
ג [Gimel]
7 Nia harii ona moru haleʼu haʼu, atu nuneʼe haʼu labele halai sai;Nia kesi metin ona haʼu ho korrente riti neʼebé todan.+
8 Bainhira haʼu halerik makaʼas atu husu ajuda, nia la simu* haʼu-nia orasaun.+
9 Nia taka netik haʼu-nia dalan ho fatuk boot sira neʼebé fera ona;Nia halo kleʼuk haʼu-nia dalan sira.+
ד [Dalet]
10 Nia subar hodi hein atu ataka haʼu hanesan ursu ida, hanesan leaun ida neʼebé subar hela.+
11 Nia obriga haʼu sees husi dalan no lees haʼu pedasuk ba pedasuk;*Nia husik hela haʼu mesak.+
12 Nia dada* ona ninia rama atu hana rama-oan ba haʼu.
ה [Hei]
13 Nia sona ona haʼu-nia rins ho rama-oan* husi ninia rama-fatin.
14 Ema hotu hamnasa haʼu. Durante loron tomak sira kanta hodi goza haʼu.
15 Nia halo haʼu bosu ho buat neʼebé moruk no halo haʼu hemu ai-tahan moruk nia been.+
ו [Vau]
16 Nia harahun haʼu-nia nehan ho fatuk britas;Nia dudu tun haʼu ba ahi-kadesan laran.+
17 Ita la husik haʼu hetan dame. Haʼu haluha ona buat neʼebé diʼak.
18 Haʼu dehan: “Haʼu-nia glória lakon ona, no haʼu mós lakon ona esperansa ba Jeová.”
ז [Zain]
19 Hanoin-hetan bá katak haʼu hetan terus no la iha uma,+ haʼu han ai-tahan moruk no venenu.+
20 Ita* sei hanoin-hetan duni no hakruʼuk hodi ajuda haʼu.+
21 Haʼu hanoin fali ida-neʼe iha haʼu-nia laran. Tan neʼe mak haʼu sei hein ho pasiénsia.+
ח [Hetes]
22 Tanba Jeová nia domin neʼebé laran-metin mak ita la lakon mohu,+Tanba ninia laran-sadiʼa la iha rohan.+
23 Dadeer-dadeer nia hafoun ninia laran-sadiʼa.+ Ita-nia laran-metin mak boot.+
24 Haʼu dehan: “Jeová mak haʼu-nia parte,+ tan neʼe mak haʼu sei hein nia ho pasiénsia.”+
ט [Tet]
25 Jeová hatudu laran-diʼak ba ema neʼebé tau esperansa ba nia,+ no ba ema* neʼebé kontinua buka nia.+
26 Diʼak se ema hein ho pasiénsia*+ atu Jeová salva nia.+
27 Diʼak se mane ida lori naha todan* durante ninia tempu joven.+
י [Iod]
28 Husik nia tuur mesak no tuur nonook deʼit bainhira Maromak tau naha neʼe ba nia.+
29 Husik nia hakruʼuk ho oin rabat ba rai-rahun,+ karik sei iha esperansa.+
30 Husik nia see ninia hasan ba ema neʼebé basa nia. Husik nia sai bosu ho liafuan tarata nian.
כ [Kaf]
31 Tanba Jeová sei la soe hela ita ba nafatin.+
32 Maski nia halo ema triste, maibé nia mós sei hatudu laran-sadiʼa tanba nia nakonu ho domin neʼebé laran-metin.+
33 Tanba ninia laran la gosta atu fó-terus ka halo ema sente triste.+
ל [Lamed]
34 Atu sama rahun ema dadur hotu iha rai,+
35 Atu hanetik justisa ba ema iha Maromak neʼebé Aas Liu Hotu nia oin,+
36 Atu lohi hodi hamatak ema iha kazu ruma,
Hahalok sira-neʼe Jeová la simu.
מ [Mem]
37 Se Jeová la fó mandamentu, sé mak bele fó sai liafuan ruma no kumpre ida-neʼe?
38 Buat aat la sai hamutuk ho buat diʼakHusi Maromak neʼebé Aas Liu Hotu nia ibun.
39 Tanbasá mak ema muramura kona-ba rezultadu husi sira-nia sala rasik?+
נ [Nun]
40 Mai ita haree didiʼak no hanoin kleʼan kona-ba ita-nia hahalok sira,+ no mai ita fila fali ba Jeová.+
41 Mai ita foti saʼe ita-nia liman ho laran tomak ba Maromak iha lalehan,+ hodi dehan:
42 “Ami halo sala no kontra ona Ita-Boot,+ no Ita seidauk perdua ami.+
ס [Samek]
43 Ho hirus Ita hanetik ona ami atu hakbesik ba Ita;+Ita duni ami no oho ami la ho laran-sadiʼa.+
44 Ho kalohan Ita hanetik ami atu labele hakbesik ba Ita, atu nuneʼe ami-nia orasaun labele toʼo ba Ita.+
45 Ita halo ami sai hanesan buat foʼer no folin-laek iha nasaun sira-nia leet.”
פ [Pei]
46 Ami-nia inimigu hotu loke sira-nia ibun kontra ami.+
47 Ami-nia moris nakonu ho taʼuk, lasu,+ terus no kanek.+
48 Haʼu-nia matan-been suli hanesan mota tanba haʼu-nia povu* rahun ona.+
ע [Ain]
49 Haʼu-nia matan-been suli nafatin, haʼu tanis la para,+
50 Toʼo Jeová hateke tun no haree husi lalehan.+
51 Haʼu sente triste bainhira haʼu-nia matan haree buat sira neʼebé akontese ba oan-feto* hotu husi haʼu-nia sidade.+
צ [Sade]
52 Haʼu-nia inimigu sira kasa haʼu la ho razaun hanesan kasa manu.
53 Sira koko atu halakon haʼu-nia moris iha rai-kuak laran; sira kontinua tuda fatuk ba haʼu.
54 Bee saʼe liu ona haʼu-nia ulun, no haʼu dehan: “Haʼu mate ona!”
ק [Kof]
55 Oh Jeová, haʼu bolu Ita-nia naran husi rai-kuak kleʼan.+
56 Favór ida, rona haʼu-nia lian. Keta taka tilun ba haʼu-nia halerik atu husu ajuda no kmaan.
57 Ita hakbesik ba haʼu iha loron neʼebé haʼu bolu Ita. Ita dehan: “Keta taʼuk.”
ר [Reix]
58 Oh Jeová, Ita defende ona haʼu-nia kazu. Ita salva* ona haʼu-nia moris.+
59 Oh Jeová, Ita haree ona sala neʼebé ema halo ba haʼu. Favór ida, fó justisa ba haʼu.+
60 Ita haree ona sira-nia hakarak atu halo aat ba haʼu, sira-nia planu aat hotu atu kontra haʼu.
ש [Sin] ka [Xin]
61 Oh Jeová, Ita rona ona sira-nia liafuan sadik, sira-nia planu aat hotu atu kontra haʼu,+
62 Liafuan husi inimigu sira-nia ibun no sira-nia lian bisubisu kontra haʼu loron tomak.
63 Haree toʼok ba sira. Maski sira tuur ka hamriik, sira goza haʼu ho sira-nia knananuk!
ת [Tau]
64 Oh Jeová, Ita sei selu fali ba sira tuir sira-nia hahalok.
65 Ita sei halo sira-nia laran sai toos, nuʼudar malisan neʼebé Ita fó ba sira.
66 Oh Jeová, Ita sei duni tuir sira ho hirus no halakon sira husi mundu.*
Nota-rodapé
^ Ka “nia hanetik”.
^ Ka karik “halo haʼu sai rai neʼebé mamuk”.
^ Orj., “sama”.
^ Orj., “oan-mane”.
^ Haree “Nefes” iha Glosáriu.
^ Haree “Nefes” iha Glosáriu.
^ Ka “ho nonook”.
^ Ka “lori ai-leba”.
^ Orj., “haʼu-nia povu nia oan-feto”.
^ Ka “sidade kiʼik”.
^ Orj., “sosa fali”.
^ Orj., “husi lalehan okos”.
