Deuteronómio 17:1-20
17 “Imi labele hasaʼe karau ka bibi neʼebé moras ka iha kanek ruma nuʼudar sakrifísiu ba Jeová, imi-nia Maromak, tanba Jeová, imi-nia Maromak, sei hakribi ida-neʼe.+
2 “Se karik iha imi-nia sidade sira neʼebé Jeová, imi-nia Maromak, sei fó ba imi, mak imi hetan mane ka feto ida halo buat neʼebé aat iha Jeová, imi-nia Maromak, nia haree no kontra ninia aliansa,+
3 no ema neʼe laʼo sees hodi adora maromak sira seluk no hakruʼuk ba sira ka hakruʼuk ba loro-matan, fulan, ka tropa lalehan nian hotu,+ neʼe mak buat neʼebé haʼu la haruka imi atu halo.+
4 Bainhira ema fó-hatene imi ka imi rona kona-ba neʼe, imi tenke buka-hatene didiʼak problema neʼe. Se imi hatene ho loloos+ katak ema halo ona buat aat neʼe iha Izraél,
5 imi tenke lori mane ka feto neʼebé halo hahalok aat neʼe bá iha sidade nia portaun, no tuirmai imi tenke tuda mate mane ka feto neʼe.+
6 Ema neʼe tenke mate só deʼit se iha sasin naʼin-rua ka tolu.+ Imi labele tuda mate ema neʼe se iha sasin ida deʼit.+
7 Ema sira neʼebé sai nuʼudar sasin mak tenke tuda uluk nia, no tuirmai povu hotu tenke tuda mate nia. Imi tenke hasai tiha buat aat husi imi-nia leet.+
8 “Se kazu ruma mosu iha imi-nia sidade ida, no susar tebes ba imi atu tesi-lia ba kazu neʼe, maski neʼe mak kazu kona-ba oho ema,+ ka ema ruma kesar ninia maluk tanba kontra lei, ka ema ruma halo ona violénsia, ka problema sira seluk, imi tenke hamriik no laʼo ba fatin neʼebé Jeová, imi-nia Maromak, sei hili.+
9 Imi tenke bá hasoru amlulik Levi no juís sira+ neʼebé serbí iha tempu neʼebá, no hatoʼo kazu neʼe ba sira, no sira sei fó sai desizaun ba imi.+
10 Tuirmai imi tenke halo tuir desizaun neʼebé sira fó sai ba imi husi fatin neʼebé Jeová, imi-nia Maromak, sei hili. Halo tuir ho didiʼak buat hotu neʼebé sira haruka imi atu halo.
11 Imi tenke halo tuir ukun-fuan neʼebé sira hatudu ba imi no tuir desizaun neʼebé sira fó sai ba imi.+ Keta laʼo sees ba liman-loos ka ba liman-karuk, no halo tuir ho didiʼak desizaun neʼebé sira fó sai ba imi.+
12 Ema neʼebé ulun-toos no foti an* hodi la rona ba amlulik neʼebé halo serbisu ba Jeová, imi-nia Maromak, ka la rona ba juís, nia tenke mate.+ Imi tenke hasai tiha buat aat husi Izraél nia leet.+
13 No povu hotu sei rona kona-ba neʼe no sai taʼuk, no sira sei la ulun-toos no la foti an* tan.+
14 “Bainhira imi tama ba rai neʼebé Jeová, imi-nia Maromak, sei fó ba imi no imi foti rai neʼe no hela ona iha neʼebá, no imi dehan: ‘Ami sei foti liurai ida ba ami-nia an hanesan nasaun sira hotu neʼebé haleʼu ami’,+
15 se nuneʼe, imi tenke foti liurai ida neʼebé Jeová, imi-nia Maromak, mak hili.+ Imi tenke foti liurai husi imi-nia maun-alin nia leet. Imi labele foti ema estranjeiru neʼebé laʼós imi-nia maluk ema Izraél.
16 Maibé, liurai labele aumenta kuda barak ba nia an+ ka halo povu neʼe fila fali ba rai-Ejitu hodi sosa kuda barak tan,+ tanba Jeová dehan ona ba imi: ‘Imi labele fila fali liuhusi dalan neʼe.’
17 Nia mós labele hola feto barak nuʼudar ninia feen, atu nuneʼe ninia laran labele sees husi haʼu;+ no nia labele aumenta osan-mutin no osan-mean barak ba nia an.+
18 Bainhira nia tuur iha ninia kadunan atu ukun, nia tenke hakerek fali liafuan hotu husi Ukun-Fuan neʼe iha livru ida, katak husi livru Ukun-Fuan nian neʼebé amlulik Levi sira rai hela.+
19 “Liurai tenke rai hela livru neʼe nafatin, no tenke lee ida-neʼe durante loron hotu iha ninia moris tomak,+ atu nuneʼe nia bele aprende hamtaʼuk Jeová, ninia Maromak, no halo tuir liafuan hotu husi Ukun-Fuan neʼe no lei neʼe hodi kumpre buat sira-neʼe.+
20 Hodi lee beibeik, ninia laran sei la sente katak nia aas liu fali ninia maun-alin sira, no nia sei la laʼo sees ba liman-loos ka ba liman-karuk husi mandamentu sira, atu nuneʼe nia bele ukun ba tempu kleur, nia no ninia oan-mane sira iha Izraél nia leet.
