Segundu Korinto 3:1-18
3 Ami presiza fó koñese fali ami-nia an ba imi ka? Hanesan ema balu, ami mós presiza karta rekomendasaun ba imi ka husi imi ka lae?
2 Imi rasik mak ami-nia karta+ neʼebé hakerek iha ami-nia laran, no ema hotu hatene no lee karta neʼe.
3 Tanba imi mak Kristu nia karta neʼebé ami mak hakerek nuʼudar Maromak nia serbisu-naʼin.+ Karta neʼe hakerek laʼós ho tinta maibé ho espíritu husi Maromak neʼebé moris, laʼós iha fatuk-belar,+ maibé iha isin, iha fuan-laran.+
4 Ami fiar metin ba Maromak kona-ba neʼe liuhusi Kristu.
5 Ami la dehan katak ami rasik bele halo serbisu neʼe, maibé Maromak mak ajuda ami halo serbisu neʼe.+
6 Maromak mak ajuda ami atu bele sai nuʼudar haklaken-naʼin ba aliansa foun,+ laʼós ba ukun-fuan neʼebé hakerek ona,+ maibé haklaken-naʼin ba Maromak nia espíritu, tanba ukun-fuan neʼebé hakerek ona lori kastigu-mate,+ maibé Maromak nia espíritu fó moris.+
7 Ukun-fuan neʼebé lori ba mate neʼebé bahat iha fatuk,+ mai ho glória boot toʼo ema Izraél labele hateke ba Moisés nia oin tanba glória neʼebé nabilan husi ninia oin,+ maibé glória neʼe atu lakon mohu.
8 Entaun, buat neʼebé Maromak nia espíritu bele kumpre+ tenke iha glória neʼebé boot liután,+ loos ka lae?
9 Tanba se Ukun-Fuan neʼebé lori kastigu-mate+ iha glória boot,+ serbisu neʼebé halo ema sai ema laran-loos tenke iha glória neʼebé boot liután!+
10 Tuir loloos, buat neʼebé uluk simu glória, agora lakon ona ninia glória tanba ida seluk iha glória boot liu fali ida-neʼe.+
11 Se ukun-fuan neʼebé atu lakon mohu mai ho glória,+ entaun aliansa neʼebé iha agora hetan glória boot liután!+
12 Tanba ita iha esperansa hanesan neʼe,+ ita bele koʼalia ho aten-brani,*
13 no ita la halo hanesan Moisés kuandu nia taka ninia oin ho hena+ atu nuneʼe ema Izraél labele hateke ba rezultadu husi ukun-fuan neʼebé sei lakon mohu.
14 Maibé sira-nia neon la komprende.+ Tanba toʼo ohin loron, hena neʼe sei taka netik sira-nia oin bainhira sira lee aliansa tuan nian,+ tanba ho deʼit Kristu nia ajuda mak bele hasai hena neʼe.+
15 Tuir loloos, toʼo ohin loron kuandu sira lee Moisés nia livru,+ hena ida taka netik sira-nia laran.+
16 Maibé kuandu ema ida fila fali ba Jeová,* hena neʼe sei hasai tiha.+
17 Jeová* mak Espíritu,*+ no iha fatin neʼebé iha Jeová* nia espíritu, iha mós liberdade iha neʼebá.+
18 No ita hotu, tanba la iha hena ida taka netik ita-nia oin, ita haleno Jeová* nia glória hanesan espellu, no ita nakfila an husi glória ida ba glória seluk* hodi sai ninia ilas. Jeová,* Espíritu neʼe,* mak halo nuneʼe duni.+
Nota-rodapé
^ Ka “koʼalia nakloke”.
^ Haree “Pneuma” iha Glosáriu.
^ Orj., “husi glória ba glória”.
^ Ka karik “liuhusi Jeová nia espíritu”. Haree “Pneuma” iha Glosáriu.
