Skip to content

Sala neʼebé sei nunka hetan perdua mak saida?

Sala neʼebé sei nunka hetan perdua mak saida?

Bíblia nia resposta

 Sala neʼebé sei nunka hetan perdua mak ema nia hanoin no hahalok sala neʼebé hanetik ema ida atu labele hetan perdua husi Maromak. Oinsá ida-neʼe bele akontese?

 Maromak perdua ema neʼebé arrepende sira-nia sala, halo tuir Maromak nia matadalan iha sira-nia moris, no hatudu fiar ba Jesus Kristu. (Apóstolu 3:19, 20) Maibé ema ida bele sai toman atu halo beibeik sala no nunka troka ninia hanoin ka hahalok. Bíblia dehan katak ema hanesan neʼe iha laran neʼebé aat no sai toos “tanba sala nia kbiit atu lohi”. (Ebreu 3:12, 13) Hanesan rai-mean neʼebé sunu tiha no labele forma tan, ema hanesan neʼe iha laran neʼebé toos no kontra Maromak. (Isaias 45:9) Ema hanesan neʼe la merese atu hetan perdua husi Maromak. Nia halo ona sala neʼebé sei nunka hetan perdua.​—Ebreu 10:26, 27.

 Iha Jesus nia tempu, ulun-naʼin relijiaun Judeu balu halo sala neʼebé sei nunka hetan perdua. Sira hatene katak Maromak nia espíritu santu mak ajuda Jesus halo milagre sira. Maibé ho laran-aat sira dehan katak Jesus nia kbiit mai husi Diabu Satanás.​—Marcos 3:22, 28-30.

Sala oioin neʼebé bele hetan perdua

  •  Koʼalia aat Maromak tanba la iha koñesimentu. Uluk apóstolu Paulo koʼalia aat Maromak, maibé ikusmai nia hatete: “Uluk haʼu halo buat sira-neʼe tanba la hatene no la iha fiar, tan neʼe nia hatudu laran-sadiʼa ba haʼu.”​—1 Timóteo 1:13.

  •  Adultériu. Bíblia temi kona-ba ema neʼebé uluk halo adultériu, maibé sira troka sira-nia hahalok no Maromak fó perdua ba sira.​—1 Korinto 6:9-11.

“Haʼu halo ona sala neʼebé Maromak labele perdua ka lae?”

 Se Ita odi tebetebes sala neʼebé uluk Ita halo no hakarak atu halo mudansa, neʼe katak ita la halo sala neʼebé Maromak labele perdua. Maski karik Ita halo beibeik sala neʼebé hanesan, maibé Maromak sei perdua Ita se Ita la halo toos Ita-nia laran no la kontra Maromak.​—Isaias 1:18.

 Ema balu sente katak sira halo ona sala neʼebé Maromak sei nunka perdua tanba sira-nia laran kontinua fó-sala ba sira. Maibé Bíblia hanorin katak dala ruma ita-nia sentimentu bele lohi ita. (Jeremias 17:9) Maromak la fó podér ba ema ida atu tesi-lia ba ita. Neʼe katak ita mós labele tesi-lia ba ita-nia an rasik. (Roma 14:4, 12) Maromak bele fó perdua ba ita maski ita-nia laran nafatin fó-sala mai ita.​—1 João 3:19, 20.

Judas Iscariotes halo sala neʼebé Maromak labele perdua ka lae?

 Sin. Tanba Judas mak kaan-teen, nia naʼok osan neʼebé ema fó nuʼudar kontribuisaun atu halo atividade sagradu. Nia mós finje katak nia hanoin ema kiak, maibé loloos nia hakarak atu naʼok tan osan. (João 12:4-8) Judas nia laran sai toos toʼo nia sai traidór no faʼan Jesus ba osan-mutin 30. Jesus hatene katak Judas sei nunka arrepende ninia sala ho laran no Jesus bolu nia nuʼudar “ema neʼebé sei halakon tiha”. (João 17:12) Neʼe katak bainhira Judas mate, nia lakon ba nafatin no la iha esperansa atu hetan moris-hiʼas.​—Marcos 14:21.

 Judas la arrepende ninia sala ho laran. Nia fó sai ninia sala ba ulun-naʼin relijiaun sira, maibé nia la fó sai ninia sala ba Maromak.​—Mateus 27:3-5; 2 Korinto 7:10.