Skip to content

Maromak nia Reinu iha Ita-nia laran ka lae?

Maromak nia Reinu iha Ita-nia laran ka lae?

Bíblia nia resposta

 Lae, Maromak nia Reinu ka Ukun laʼós buat ruma iha ema Kristaun nia laran. * Bíblia bolu Reinu neʼe nuʼudar “reinu lalehan nian” no neʼe ajuda ita komprende ho loloos Reinu neʼe iha neʼebé. (Mateus 4:17, Liafuan diak ba imi, edisaun segundu) Haree toʼok saida mak Bíblia fó sai neʼebé hatudu katak Maromak nia Reinu mak governu ida neʼebé ukun husi lalehan.

  •   Maromak nia Reinu iha ukun-naʼin sira, iha povu, iha lei no direitu atu kumpre Maromak nia hakarak iha lalehan no rai.​—Mateus 6:10; Apokalipse 5:10.

  •   Maromak nia governu ka Reinu sei ukun “povu, nasaun no ema neʼebé koʼalia língua oioin” iha rai. (Daniel 7:13, 14) Ukun neʼe simu ninia podér husi Maromak, laʼós husi ninia povu.​—Salmo 2:4-6; Isaias 9:7.

  •   Jesus hatete ba ninia apóstolu sira neʼebé laran-metin katak sira sei hamutuk ho nia iha Ukun lalehan nian no “tuur iha kadunan”.​—Lucas 22:28, 30.

  •   Maromak nia Ukun iha inimigu sira. No Ukun sei halakon ninia inimigu sira.​—Salmo 2:1, 2, 8, 9; 110:1, 2; 1 Korinto 15:25, 26.

 Bíblia la hanorin katak Ukun lalehan nian mak iha ita-nia laran no ukun iha ema nia laran. Maibé Bíblia hatudu katak “liafuan kona-ba Maromak nia Ukun” ka “liafuan diʼak kona-ba Maromak nia Ukun” bele no tenke fó influénsia ba ita-nia laran.​—Mateus 13:19; 24:14.

“Maromak ukun iha ema nia laran”, neʼe katak sá?

 Ema balu konfuzaun kona-ba Maromak nia Ukun iha neʼebé, tanba tradutór balu nia dalan atu tradús Lucas 17:21. Porezemplu, Tetun Dili Alkitab hatete katak “Maromak ukun iha ema nia laran”. Atu bele komprende eskritura neʼe ho loloos, ita presiza hanoin kona-ba eskritura neʼe nia kontestu.

Maromak nia Ukun laʼós iha Jesus nia kontradór sira-nia laran

 Jesus koʼalia daudaun ho ema Farizeu, neʼe mak grupu relijiaun ida neʼebé kontra nia no hola parte atu oho Jesus. (Mateus 12:14; Lucas 17:20) Sira mak ema neʼebé laran-makerek. Lójiku ka lae se Maromak nia Reinu mak iha sira-nia laran neʼebé makerek? Jesus hatete ba sira: “Imi-nia laran nakonu ho hahalok laran-makerek no hahalok aat.”​—Mateus 23:27, 28.

 Bíblia tradusaun seluk tradús Jesus nia liafuan iha Lucas 17:21 ho klaru: “Maromak nia reinu iha ona imi leet.” (Liafuan diak ba imi, edisaun segundu) “Maromak nia Ukun iha imi-nia leet.” (Tradusaun Mundu Foun) Ukun lalehan nian mak iha ema Farizeu sira-nia “leet” tanba Jesus, Liurai neʼebé Maromak hili atu ukun mak hamriik daudaun ho sira.​—Lucas 1:32, 33.

^ Relijiaun Kristaun barak hanorin katak Maromak nia Reinu mak iha ema nia laran. Porezemplu, iha Estadus Unidus relijiaun ida naran Convensaun Batista do Súl esplika katak Maromak nia Reinu bele signifika “Maromak nia ukun iha ema nia laran no moris”. Iha Amu-Papa Bento XVI nia livru ho títulu Jesus of Nazareth, nia hatete katak “Maromak nia Ukun mai husi laran neʼebé prontu atu halo tuir”.